一轉眼十年光景.

期間的起起落落,糖酸苦辣,不言而喻.

最大的轉變是,家裡多了一個人.

應該說,多了個小魔鬼.

從那一刻起,世界就只圍住她轉.

少了自由,少了自我.

現在更因為她,執起教鞭.

時間變得不夠用,睡眠變得奢侈.

正努力找回自己,找回遺失的"我".

新宿麺屋武蔵

要咗個濃郁湯底,咸咗啲...個角煮肥膏唔多, 正. 食到有果香味, 整體都算ok...

逃過一劫

三月三日傻魚獨自一人先返香港工作,而今朝傻馬搭早機返香港.十二點幾傻魚興高采烈驅車去機場接傻馬,中途收到神戶同事個電話,第一句就話...

神戶同事:｢傻魚老公可能返到去喎...｣

傻魚:｢吓?點解呀?｣

神戶同事:｢傻魚冇睇新聞咩?｣

傻魚:｢冇喎...依家揸緊車去緊機場...｣

神戶同事:｢啱啱東北大地震,成田空港即時關閉.今日之內都應該唔會開返,所以傻魚老公今日應該上唔到機.｣

傻魚:｢今朝十點機都飛唔到?正話出門口之前查香港機場到逹航班時間表,見到班機準時到逹喎...幾點震呀?｣

神戶同事:｢啱啱冇幾耐之前.連東京都好震下...｣

傻魚:｢咁大鑊?!!｣

神戶同事:｢如果係今朝十點機,應該冇影響.｣

一收線就收到老爺電話,又係講返同樣嘢.收咗線又到老友打嚟問.之後神戶同事又打嚟報告實況.就咁一路揸車一路不停接電話,搞到傻魚好擔心傻馬會唔會真係上唔到機...直到見到傻馬至鬆一口氣.即刻話畀傻馬知,點知傻馬話唔記得掹熱水煲條電線...死喇!!!會唔會震跌個水煲,搞到傻家著火o架?!!上車之後就叫傻馬打畀老爺報平安.返到屋企台台電視都喺度報導緊東北大地震o既事,話嚟緊不斷會有大大小小的餘震.好嚴重o既大地震,見到心都寒晒.諗起網友甲君,即刻打個電話睇下佢哋有冇事.然後打畀傻爸報平安.

今次逃過一劫,如有神助.話說傻馬當初決定幾時返香港嗰陣係諗住聽日至飛.之後買機票時又心大心細,問傻魚好唔好請多一日假遲一日返東京.當時傻魚就話請多一日,早一日返香港.就係呢一句,傻馬就唔使經歷呢一次大地震.唔知點解,當時覺得早返香港好過遲返東京.多謝觀音娘娘的庇佑.依家好擔心傻家唔知震成乜樣...

元宵節

今日係元宵節,又係農曆情人節.喺呢日,除咗會食齋之後,仲有一樣好重要o既食物係一定要食o既...

就係湯圓!!!元宵節唔食過湯圓,就好似個年仲未過完咁...所以今晚煲咗芝麻湯圓,個糖水落咗好多薑.食完暖笠笠~

十日前整o既椰汁年糕,食咗成個星期...

好成功!!!個樣都見得下人...呵呵~傻馬叫傻魚過幾日再整喎...
農曆情人節通常會去賞燈同猜燈迷.原本諗住又去中華街湊熱鬧,但係今日係平日...傻馬聽日仲要返工,所以放棄.日本人過西洋情人節,仲要係由女方為心意o既男士送上朱古力以示告白.收到朱古力o既男士要等一個月,喺三月十四日回禮以表心意.冇收到回禮o既女士,啫係冇行喇.呢個咁獨特o既禮儀只係日本至有,係喺戰後啲朱古力生產商諗出o黎促銷朱古力o既橋段.所以喺情人節最好賣o既唔係花,而係朱古力.對於收慣花同禮物o既香港女性o黎講,日本呢種"習慣"真係匪夷所思...西洋情人節又好,農曆情人節都好,只要係同情人一齊,天天都可以係情人節~

白色情人節

仲諗住今日只係落雨.四點幾開始落雨,到咗七點幾傻馬返o黎嗰陣話落冰粒.到咗九點幾傻馬込去露台一望,大叫話落大雪呀~今年第二場雪,竟然係喺情人節!傻魚今日中午仲諗緊,冇白色新年,又冇白色農曆新年,連白色情人節都冇,整個白色元宵都好喎...真係話口未停,真係實現咗呀!!!太興奮!!!!!!!!

做晒防寒同防跣措施,出去駅行一轉.請大家唔好理條片個傻婆講乜...實在太白痴喇!宜家聽返覺得好好笑.真係好低能勁白痴.見到好多人跣低,有啲車跣軚,好危險.宜家仲落緊雪,希望可以落到聽日喇...
今個情人節雖然冇花冇禮物冇燭光晚餐冇朱古力,但係就喺大雪中漫步非常浪漫~願天下有情人永結同心,如影隨形,如魚得水,如膠似漆,甜蜜幸運!!!

磐梯滑雪場

今日係紅日,建国記念日.今個冬季第二次滑雪...傻馬滑上癮...傻魚五點幾就醒咗,但係整極傻馬都唔願起身.之後仲話傻魚叫傻魚快啲瞓...哼!!!好心做壞事,嬲嬲地唔理傻馬自己先起身慢慢梳洗.原本話六點半要出門口,但係六點二十傻馬仲喺張床度完全冇想起身o既跡象.到傻魚話"六點半喇,仲唔起身",傻馬即刻成個彈起.當然,傻馬唔敢話傻魚做乜唔早啲出聲...衰咗喇...搞到要半跑咁去搭電車去新宿.好在住得近,去到見仲有時間可以慢慢行.

嘩~個天好陰呀!仲落緊毛毛雨.氣象台話今日可能會落雪添...睇下都庁個頂,幾鬼多霧呀!

果然,喺七點十五分開始落雪呀!仲越落越大.新宿終於落第一場雪喇~真係太興奮!!!即刻叫傻馬落車拍返條片先.可能因為落雪有人遲到,架巴士遲咗廿分鍾至開車.

由於太趕,冇時間去便利店買飯團做早餐.所以喺中途九點幾停廁所位時沖咗去買嘢食.原本諗住買包,但係畀傻魚見到呢個便当.好似好好味咁,二話不說即刻畀錢!

實在係太肚餓,加上又暈車...左邊係辣辣地o既豬肉,勁好味~中上方係燒雞塊,味道一般.左上方係吉列吞拿魚,好味!雖然好肚餓,但係都食唔晒.勉強食多幾啖,凈返少少豬肉同飯畀傻馬清埋.

傻馬買咗兩個包,但係就只食咗呢件.見到都覺甜~

去到十二點幾,遲咗個幾鍾.咁就少咗個幾鍾滑喇...

好大雪呀~

仲好鬼多人添!!!

咁多人點滑?排咗好耐隊去攞鞋同板,之後好在好快搵到儲物櫃擺低啲袋.跟住去換吊車飛.咁搞一搞,又冇咗大半個鍾.今次傻魚又係叫傻馬自己去玩唔好迫傻魚上山.傻馬見有乜時間,所以都冇同傻魚辨駁.傻魚就走咗去同啲初學小朋友一齊滑.呢個滑雪場好正,有個小斜坡畀啲小朋友玩,仲唔使行上去,有條自動電梯"載"埋你上去.就咁傻魚喺嗰度玩咗半日,好好玩呀!不過,畀個靚仔嘲笑...

傻馬就一支箭沖去排隊搭纜車上山.

溫馨提示,好貼心!

山頂...

好靚~

可惜傻魚見唔到.

不過唔緊要,傻馬影低晒畀傻魚睇.

傻馬話下次一定要傻魚上山喎...

好靚o既雪!!!

但係見到咁,好驚喎...

望到另一個滑雪場.

中級?傻馬話好玩.

呢個斜度勉強可以.

但係就唔知要用幾耐時間至落到去囉...

見到樹又會驚撞埋去,越驚就越沖埋去啲樹度...恐怖!!!

雪山上都有鳥居...

仲可以穿過去.

嘩!仲有啲咁好玩o既嘢...

呢度應該係上級,唔係傻魚呢啲"呢"可以去...滑到三點,肚餓...打畀傻馬,傻馬又冇接電話.個場太大,搵唔到人添...諗住傻馬應該唔會食,試打多一次有人接就一條友去搵食.咁啱傻馬落到山腳接到電話,即刻同傻魚會合.

傻魚叫咗個辣椒醬炸雞飯,配豚汁.好開胃,好味.

傻馬叫咗個天麩羅烏冬,落咗大量七味粉.傻馬一食完又出去滑過,而傻魚就坐咗一陣休息下.

出到去見到傻馬拍緊片,同傻馬講已經四點得返半個鍾滑.

傻馬即刻上山...而傻魚就返去同啲小朋友一齊滑.其實嗰度除咗畀小朋友滑之外,仲會喺嗰度教滑雪.另外都見好多唔多識滑o既大人喺度練習.

嘩嘩嘩~

實在太靚喇~

好多人停喺度欣賞...

白茫茫一片...

好想搬返傻家!!!

話咁快又到四點半.喺度同傻馬會合之後,影咗幾張相就夠鍾要去還嘢喇.

呢個滑雪場夜間都可以滑,只滑夜晚仲會平啲.

所以除咗見到好多人走,都見到好多人啱啱到.

記住呢度,下年一定要再o黎!!!

五點鍾集合,五點四開車.返到新宿已經係十點幾...好攰呀!!!
資料: 磐梯滑雪場

太陽劇團之寶箱

今日去睇表演.遲咗少少出門口,去到原宿離開演時間只有十分鍾.半跑咁趕過去...

好在唔係好遠啫.

冇錯!!!

係太陽劇團o既表演.個名係梵文,意思係寶箱.

原本坐喺另一邊第廿一行.咁啱今日因為安全理由嗰啲位冇開,所以被轉到呢個第三行靚位~近距離接觸,好在冇比啲演員整蠱.

中場有三十分鍾休息,可以出去大堂買下手信同埋食下嘢.

只有喺現場只買到o既特別版光碟.

大發有份贊助,當然就要就地賣下廣告喇.

好鍾意呢架車~

見到好多人買目錄.

仲有好多其他唔同種類o既產品.

地下多處都可以見到投影機射出o既"招牌".

咦?!!也唔係四千円咩?原來係兩款唔同o既光碟.呢個係冇後台精華片段.

睇完七點幾,出到街竟然開始落雨...睇咗個好精彩o既表演,頻頻有驚喜,完全冇冷場.到目前為止已經睇咗太陽劇團四個唔同o既表演.好期待其他o既表演,唔知幾時至會有.有興趣o既朋友,唔使急.呢次日本公演到明年年中至結束,大家可以搵個方便自己o既地點去欣賞呢個咁精彩o既表演.公演時間同地點如下:
東京(原宿-国立代々木競技場): 2月2日至5月8日,加場:5月21日至7月18日-時間表
大阪(中之島特設会場): 8月4日至10月10日-時間表
名古屋(名古屋Dome): 11月23日至明年1月22日-時間表
福岡(筥崎宮外苑): 明年2月9日至4月1日-未有時間表
仙台(場所未定): 明年4月19日至6月3日-未有時間表
票價:由七千円至一萬三千円
資料: