奶奶與儍馬

對於一個母親o黎講,自己o既仔女係永遠都長唔大,永遠都係小朋友.但係有好多媽媽都明白,喺適當o既時候要識得放手,等啲仔女學識自立同自主.好可惜,奶奶唔係其中一個...

奶奶:「儍馬,快啲飲咗碗湯...」

儍馬:「得喇!擺低喇!一陣飲...」

奶奶:「唔好擺...宜家飲...快啲!我睇住你飲...」

每一晚奶奶都會咁,食完晚飯冇幾耐就會拎住碗湯入儍馬房,睇住儍馬飲完碗湯,跟住拎返個碗出去洗.除咗湯之外,每晚都會有"愛心"生果送到儍馬面前,之後奶奶仲會喂埋儍馬食燕窩至肯收手去訓.

....................................................................................................

奶奶:「聽日凍呀!記住着多件衫.儍魚,快啲幫儍馬搵件外套俾儍馬,聽朝睇住佢着喎!」

儍魚:「儍馬咁大個人,凍o既話會自己識搵多件衫着o架喇!又唔係三歲細路仔...」

奶奶:「儍馬就係唔識...咁凍親病咗點算呀?」

儍魚:「今次凍親病咗,下次儍馬咪識凍要着多件衫囉.下下咁樣要人照顧,儍馬點識自己照顧自己呀?」

奶奶:「咪你要照顧佢囉!」

奶奶,儍馬又唔係儍魚個仔...咁大個人都仲要人咁樣照顧,第時冇人理咪死得?!!儍魚係大小姐o黎o架,都要人照顧o架,又點可以咁樣照顧人喎...乜唔係儍馬要照顧儍魚o既咩?!!

...................................................................................................

奶奶:「儍馬,聽日會落雨喎!記得帶傘呀!」

兩分鐘後...

奶奶:「大風呀!個窗唔好開咁大,凍呀!」

幾分鍾後...

奶奶:「儍馬,你近排食埋咁多熱氣嘢,快啲飲咗呢杯涼茶!」

幾分鐘後...

奶奶:「儍馬,你好似好耐都冇食維他命B同C喇喎...揸住,食咗先...」

兩分鍾後...

奶奶:「儍馬,早啲訓喇!晚晚都咁夜訓...聽日仲要返工o架...快啲訓喇!唔好再打機喇!」

就係咁,每晚九點至十二點,奶奶都會不繼咁出出入入間房,搞到儍魚同儍馬冇辦法静静地做自己o既嘢...所以日間儍魚鍾意關埋房門,咁樣奶奶就會少啲敲門入o黎問呢樣講嗰樣...

********************************************************************************

儍魚同儍馬去咗一轉日本玩.返到o黎奶奶不停咁講自己照顧得啲龍貓仔幾好,但啲龍貓就唔多肯同佢玩.去旅行梗會買嘢俾奶奶喇!儍魚買咗個好正o既金龜電話繩同一件好靚o既白色抓毛外套俾奶奶.奶奶好鍾意,開心到笑唔停口.第二日仲着住件外套出街話要俾啲師奶朋友睇佢件新靚衫喎...

老爺與奶奶

通常,兩公婆出到外面喺外人面前都會俾面對方.就算唔俾面,都唔會落自己老公或老婆o既面.但係儍魚家奶奶却喺外人面前落盡老爺o既面...所謂o既外人就係所有識得奶奶o既人.當中當然有唔少人見過老爺,同老爺傾過偈.尤其係當提到婆媳問題時,奶奶就會不留情面咁落嫲嫲同老爺o既面.

奶奶:「我老公正一愚孝o黎o架...個阿媽話一,佢唔敢話二o架...邊有人咁o架...明知係個阿媽唔啱都唔敢出聲講句公道説話,由得個阿媽話個老婆喎...」

儍魚心諗:「咁以後儍馬咪可以出聲幫儍魚講說話,話奶奶唔啱囉?!!如果唔啱聽,仲可以攞正牌唔聽添...唔錯喎...」

...................................................................................................

奶奶:「以前買呢層樓嗰陣,人哋阿媽不知幾巴閉.周圍話俾人聽佢個仔有幾叻,買到樓...」

師奶甲:「嗰陣時上到樓好威水o架!」

奶奶:「係...但係層樓o既首期如果唔係我返屋企問我媽借我做女嗰時賺落o既錢,佢個仔有得咁威?!!又唔見佢俾錢個仔買樓?!!佢個仔賺得嗰雞碎咁多...我呀以前做女嗰陣揾錢仲多過佢個仔呀!!!冇我佢個仔邊買到層樓呀?懶巴閉!!!層樓寫我個名係咪應份呀?你話喇...」

師奶甲:「...」

都唔知俾乜反應好....

....................................................................................................

師奶乙:「你老公退咗休,以後咪可以兩公婆去下旅行囉...」

奶奶:「諗都咪諗呀!!!佢嗰啲人呀,孤寒到死o架...啲錢呀諗住死咗帶落棺材都唔會俾你使...佢阿媽敎o架...有錢唔好俾老婆使呀...退休金有幾錢都唔話我知,驚死我會使晒佢啲錢咁...」

師奶乙:「係咪你唔問所以佢唔講呀?」

奶奶:「我真係唔問呀...費時佢以為我侯住佢啲錢呀!」

儍魚心諗:「奶奶你個個月都有家用收,理得老爺有幾錢退休金呀...冇俾家用就話啫...」

...................................................................................................

師奶丙:「心抱仔呀!你老爺好臭脾氣o架?」

儍魚:「點解咁問呀?」

師奶丙:「冇...我見你奶奶成日同我哋講個老公成日鬧佢,俾面色佢睇喎...八卦問下啫...」

儍魚:「...」

奶奶呀!你叫儍魚點答好呀?答係,老爺都冇成日發脾氣,儍魚唔想講大話喎...答唔係,就搞到好似係奶奶講大話,會令奶奶喺啲朋友面前冇晒面...所以最終儍魚都係扮儍,將話題扯去第二度...

***************************************************************************

最近都冇乜時間上o黎寫日記.忙下公司啲嘢,又忙下旅行o既嘢...仲要忙埋照顧屋企班嘩鬼龍貓仔...勁忙...而奶奶依然好多節目,日日出街,三日唔埋兩日就話唔返o黎煮飯食.尋晚唔煮飯又唔講,搞到儍魚同儍馬九點幾至叫外賣食.而老爺就八點幾煮咗個麵...

嫲嫲與奶奶

嫲嫲係奶奶o既奶奶.嫲嫲唔係一齊住.嫲嫲同奶奶仍婆媳糾紛o既表表者,幾十年o既恩恩怨怨,牙齒印極深.經過儍魚由叔嬸親戚度聽到o既加埋平日o既觀察,得出以下o既結論:

1. 所有o既事端都可追溯到一個關鍵人物身上.此人就係姨婆,嫲嫲o既親妹.

姨婆:「阿大嫂,你奶奶返到鄉下周圍同人講你o既壞話.你老公就一路都唔出聲,由得個阿媽係咁唱自己個老婆...」

姨婆:「大嫂,我登你唔低呀...你奶奶同啲親戚出o黎飲茶,係咁不停話你激親佢喎...」

好多時候,其實係姨婆o既片面之詞.而奶奶因一早就覺得嫲嫲針對自己,所以姨婆係火上加油.姨婆當然有向儍魚落過藥,但精明o既儍魚當然睬佢都儍,避免捲入呢啲咁麻煩o既爭執之中.

2. 姨婆同嫲嫲好可能係因為錢銀而翻臉.聽聞姨婆以前常坐大飛過海,返o黎之後好多時都會搵嫲嫲借錢.懷疑係因為嫲嫲唔肯借錢而令姨婆老羞成恕,所以拉攏奶奶o黎激嫲嫲.事實...冇人知...

3. 奶奶成日講話嫲嫲周圍唱佢唔識搵錢之餘仲使晒老爺o既錢去買靚衫靚鞋.仲話唔明一個煮飯婆買咁多靚衫唔知着俾邊個睇...其實又唔怪得晒嫲嫲o既...有邊個阿媽見到個仔辛辛苦苦搵錢返o黎轉個手俾個心抱使咗去買靚衫會唔心痛o架...儍馬之前買咗個手提電話俾儍魚,奶奶個心都痛,都唔舒服o架...奶奶唔敢出聲咋.如果唔係儍魚早就聾咗喇...好在儍魚唔使儍馬啲錢啫...

4. 奶奶經常講嫲嫲針對佢,大時大節得奶奶一個喺廚房由朝做到晚,而其他嬸仔就可以乜都唔做等食,食完就走得,剩返奶奶一個做到半夜至返得屋企.如果遲咗到嫲嫲度,仲會聽到好多有骨o既說話.儍魚又覺得嫲嫲冇錯喎...乜大心抱唔係永遠都係俾人話得最多冇得還口,做得最多冇得還手o架咩?仲要見到個全職家庭主婦o既大心抱着到身光頸靚咁遲到喎...仲唔無名火起呀...

5. 奶奶話嫲嫲唔俾面佢喎...點解要個奶奶俾面個心抱架?乜唔係個心抱要俾面個奶奶o架咩?咁儍魚係咪都可以唔使俾面奶奶呀?!!

結果,奶奶有十幾年冇去嫲嫲度過節之餘,就連過年都唔去同嫲嫲拜年.其他嬸母都有要求儍魚叫埋奶奶一齊返嫲嫲度食飯,可惜心病難醫.

儍魚:「奶奶呀,一齊返嫲嫲度食飯喇!」

奶奶:「唔去!人哋都冇叫我去,費時去到有說話聽...」

儍魚:「兩個加埋都百幾歲喇...嫲嫲都咁老咯,仲有幾多年呀!一年至見幾次,你咪當俾面佢老人家,認一次低威,返去食個飯囉...」

奶奶:「又唔見佢俾面我?!!我點解要向佢認低威呀?你講得啱呀!仲有幾多年啫...到時佢兩腳一伸,我咪去上柱香咪叫俾面佢囉!!!」

聽完奶奶咁講,儍魚突然好討厭呢個奶奶!!!永遠只有後輩俾面前輩,亦只有後輩向前輩低頭.佢唔尊重長輩之餘,仲要喺儍魚面前講啲咁o既嘢喎...咁啫係以後儍魚都可以咁對佢,而佢都冇得怨,亦冇資格去怨喇!!!從嗰日開始,儍魚就少咗陪奶奶行街,更少咗同奶奶講嘢.當然儍魚仍然會尊重奶奶呢個長輩,因為儍魚同奶奶唔係同一類人,更加唔想好似奶奶咁無大無細!儍魚唔想有日行出街無端端俾雷劈呀!!!儍魚係一個有家教,有教養,知書識禮o既好孩子...

*******************************************************************************

奶奶今日一早出去做完運動,中午返o黎搞完一輪,蒸咗兩條粟米俾儍魚食之後,又出咗去同師奶朋友飲茶買餸.問奶奶點解冇留返啲飯俾儍魚炒飯,奶奶話啲飯太少唔夠炒,所以咪唔留囉.搞到儍魚一心諗住今日有超好味午餐肉雞蛋炒飯食,開心咗成晚...不過算喇...今晚奶奶話整好好味雑菜粉絲煲,當打個和囉!!!

溝通

儍魚來自大家庭.由細到大屋企人都會有講有笑,有吵有鬧,熱鬧非常.儍馬屋企人丁單薄之餘,仲好鬼冷清...好快儍魚就發覺,儍馬屋企人好少溝通.真係少得好緊要...個個都係非必要時都唔會開聲講嘢,但係佢哋唔係唔鍾意講嘢喎...通常會聽到奶奶一個人喺度講,冇人應亦冇人答嘴.

..................................................................................

奶奶:「你哋睇下隻狗仔幾得意,個樣幾儍,幾似屋企啲龍貓仔...」(滔滔不絕咁可以講成個鍾...)

老爺,儍馬,儍魚:「...」

奶奶:「嘩!個細路幾得意喎...不過儍馬細個仲得意呀!眼仔碌碌,一叫佢個名佢就會笑到唔見眼.個個都話儍馬好可愛o架!以前好少人會買波鞋牛仔褲俾啲細路着.所以人人見到儍馬着條牛仔褲襯對波鞋仔,個個都讚儍馬似日本仔好鬼有型,好鬼得意...」 (删除以下二千幾句...每次可以講兩,三個鍾...內容儍魚倒轉都識背...)

老爺,儍馬,儍魚:「...」

................................................................................

奶奶:「儍魚呀...問你老爺今晚食唔食飯呀...」

儍魚:「點解你自己唔問呀?老爺喺十步範圍之內喎...老爺宜家都聽到你講嘢o架...」

老爺:「...」(扮聽唔到...)

奶奶:「你去問喇...費時佢又唔應我呀...」

儍魚:「...」

.................................................................................

老爺:「我下個星期去新疆玩...」

儍魚:「去幾多日呀?」

老爺:「兩個星期...有啲地方車去唔到,要騎駱駝o架...」 (好興奮咁同儍魚講新疆o既事)

出發當日...

老爺:「儍魚,我將旅行啲資料同保險放喺呢度.仲有呀,你如果買開雑誌幫我買埋我嗰啲喇!」

儍魚:「哦...知喇!」

奶奶喺房探頭出o黎見老爺出咗門口...

奶奶:「你老爺去邊呀?去幾耐呀?」

儍魚:「老爺冇話你知咩?」

奶奶:「冇喎...啲人點會講呀...出門去邊唔講,唔返o黎食飯又唔出聲,諗住打個電話問下佢喇...點知又唔聽電話,飛留言又唔覆喎...」 (删去之後幾廿句...呻咗成個鍾...)

儍魚:「...」

儍魚:「儍馬,老爺啲旅行資料同保險放咗喺度喎...」

儍馬:「哦...佢話咗俾你知咪得囉...」

儍魚:「...」

.................................................................................

奶奶:「儍魚,打個電話問你老爺今晚返唔返o黎食飯喇...打咗成個鍾都搵唔到人...」

儍魚用手提一打,老爺即刻接電話...

奶奶:「你話啲人呀...咁都得o既...有乜事搵佢求命就死喇...」 (删去之後幾廿句...又呻咗成個鍾...啲內容儍魚識背晒咁滯...)

就係咁,儍魚就成為儍馬家各人o既傳聲筒.就算人齊喺晒度,都要搵儍魚傳話...如果有一日儍魚離開咗,咁佢哋點算呀?佢哋唔係諗住儍魚呢一世都唔會離開啩...定係佢哋有方法令儍魚永遠都走唔出呢個家?!!

***************************************************************************

返到屋企發現奶奶冇留起啲飯俾儍魚聽日午餐炒飯食...係無功者飯餸不留?係奶奶嬲咗所以唔留?(但係儍魚從來都冇做過會激嬲奶奶o既事...)定係儍馬冇同奶奶講呀?!!睇o黎下次都係打多個電話直接同奶奶講好啲...