加減磅

自從健身會籍到期冇續之後,身形加咗幾個碼...加得最勁嗰排係之前整親腰骨要長訓嗰個月同呢幾個月.呢幾個月經常有偏頭痛要食止痛藥而令本身唔係咁好o既腸胃更差.個胃一唔舒服就要食嘢,搞到成日都要搵嘢食.減肥節食?!!唔使諗!!!都唔夠半日個胃就起革命.條腰骨又未完全好返...點算好???之前搭飛機去旅行嗰陣仲俾個地勤姐姐誤會儍魚係大肚婆!!!儍魚唔制呀~!!!

利是

大年初一,新蒸頭,梗係要拜個年喇!喺度祝大家"豬"圓"肉"潤,"豬"光寶氣,"豬"事順暢,"豬"事如意...

今年係第一年派利是,所以搵咗幾款得意利是封.其實儍魚不嬲都唔係咁鍾意嗰啲紅噹噹o既傳統利是封.搵咗好耐至搵到呢幾款,仲要係唔貴.尋晚已經派咗幾封...俾五個寶貝龍貓仔,放喺籠底做壓歲錢.遲啲過完年拎返出o黎買嘢俾佢哋食.

聽日要去嫲嫲度拜年.要派利是...好肉痛...收入少好多,但係就要支出好多...過年...冇計喇~

擺酒...

近排睇到好多人喺部落格分享人生的一大喜事.睇到準新人o既嗰份喜悅之餘,仲有佢哋o既忙碌,緊張與不安.可惜呢啲儍魚全部都體驗唔到.儍魚喺人生一大喜事當中只係同其他到賀o既賓客一樣.那份無奈同忿怒相信冇乜人會明白.

上年係結婚o既好年.好多人都一窩蜂咁搞結婚.年初二返嫲嫲度拜年嗰陣,唔知講開啲乜,嫲嫲問儍馬幾時同儍魚結婚.儍魚當然唔出聲.而儍馬就話遲啲先.之後有一日老爺就話唔擺酒住都得,但係要喺圍村擺咗盤菜宴先.仲話到時儍馬同儍魚都唔使出現.見啲老人家講咗咁多次,連一向好少出聲o既老爺都開聲咁講,咪唯有話好.心諗擺盤菜宴又唔係擺酒,是旦喇.

於是,嫲嫲就擇咗幾個吉日.三個5月o既吉日同兩個8月o既吉日.嫲嫲就話想喺5月7號.仲話擺完盤菜宴,就去嫲嫲度敬茶,跟住夜晚喺酒樓擺幾圍酒席請啲親戚飲.咪住!!!敬茶?!!擺酒?!!之前冇聽講過喎...又話擺盤菜宴唔使出現o既?儍魚當時有啲被人呃咗上神枱o既感覺.嫲嫲不停叫儍馬決定邊日擺.儍馬問儍魚,儍魚梗係話要諗諗.跟住儍魚去咗東京出差.返到o黎,嫲嫲同儍魚講要儍魚一齊去準備5月7號o既嘢...5月7號?!!幾時決定o架?邊個話o架?當時儍魚真係好嬲!!!點解要咁急?究竟係邊個結婚?儍魚仲諗住8月叫埋屋企人飛過o黎...嫲嫲問儍魚屋企人會唔會飛o黎飲,儍魚就話儍爸心臟病,而儍媽整親條腰唔搭得飛機.係事實冇呃佢老人家.但係當時儍魚根本仲未通知屋企人.嫲嫲仲問會唔會請朋友去飲.儍魚話唔會.之後嫲嫲問儍魚租唔租婚紗,晚裝之類擺酒嗰晚著.儍魚話唔使.心諗咁急點搞咁多嘢呀?!!非常之唔開心囉...邊有人擺酒擺到儍魚咁o架!

5月6號晚俾嫲嫲叫咗去佢度話要上頭喎...乜上頭唔係儍媽做o既咩?!!點解係男家o既長輩同儍魚上頭?於禮不合喎...一啲都冇興奮同緊張o既感覺.加上擔心到時嫲嫲同奶奶會嘈起上o黎,咁點算?!!儍馬就"警告"奶奶唔好咁多嘢講.5月7號朝早牛記笠記去到圍村,強顏歡笑食完個盤菜宴,跟住就急急脚去嫲嫲度.點知敬敬下茶至發覺儍馬其中一個阿叔唔知去咗邊...成村人等咗佢好耐,原來佢去咗買嘢.明知要飲茶就唔好周圍走,飲埋先喇...跟住仲有個唔知乜水遠房親戚飲茶嗰陣整鬼儍魚,話儍魚太細聲,聽唔到儍魚嗌佢乜喎...仲俾說話儍魚聽,暗示咁急結婚係另有內情.激死儍魚!!!諗住敬完茶俾啲長輩可以走.點知嫲嫲突然叫咗儍馬個堂細佬埋o黎要儍馬同儍魚敬茶俾佢喎!儍魚真係呆咗呀!點可以咁架?真係火都o黎埋!!!敬完茶,儍魚拉住奶奶同儍馬粒聲唔出走返屋企.臨走前嫲嫲叫儍馬五點到酒樓.返到屋企儍魚問奶奶點解可以咁冇大冇細.奶奶梗係唔會放過講嫲嫲壞話o既機會喇!嫲嫲話過唔可以著牛記笠記去酒樓.但係儍魚真係好嬲!!!結果儍魚著咗條西褲加笠記去酒樓,仲要專登遲成個鍾,六點幾至到.喺酒樓,儍魚同其他賓客係冇分別.同儍馬個堂妹玩到癲晒.當日擺咗四圍净係請儍馬啲親戚.四圍酒...四圍走喎...真係"好聽"呀!!!敬酒嗰陣,個唔知乜水遠房親戚又玩嘢.話乜年中請飲,年尾生仔,明年年頭擺满月記住請佢喎...儍魚嗰刻真係嬲到極點呀!!!佢咁講啫係話儍馬同儍魚係奉子成婚喇?!!都話唔好搞到咁急...俾人咁講,儍爸同儍魚顏面可在?!!食完之後一肚氣面黑黑返屋企.當晚儍馬感冒,食咗藥個人呆下呆下,根本唔知周圍發生緊乜事...事後話返俾儍馬知,儍馬都好無奈.

原本長子嫡孫結婚係應該大事舖張,喜氣洋洋.唔明點解要搞到咁急.赶住做乜?求婚?!!儍馬使乜做啫?!!嫲嫲幫儍馬做晒喇!!!雖然已經註咗冊,但係儍魚同儍馬講,如果嫲嫲問起幾時註冊,就話俾嫲嫲知遲啲先!!!等佢驚下都好.儍媽問儍魚會唔會返去擺酒,儍魚即刻話怕怕.搞到儍魚大小姐出嫁唔可以風風光光,實屬儍爸與儍魚人生一大憾事.需知儍魚係儍爸o既掌上明珠.儍爸雖然冇講出口,但儍魚知儍爸,仲有大伯係好想儍魚返去大排延席.或者儍魚係應該咁做...或者...遲啲先喇...等儍魚有朝一日減肥成功,可以靚爆鏡去影結婚相,到時至一次過擺埋酒,風光出嫁!!!(呵呵呵~)唔錯喎...同一個人可以嫁三次.咁生活咪唔會咁枯燥,更唔怕冇新鮮感,冇刺激囉!!!

奶奶與儍魚

奶奶唔太喜歡儍魚.奶奶曾經同儍馬講儍魚接近儍馬係另有目的.曾經同奶奶好"老死"o既師奶甲就咁同儍魚講過...

師奶甲:「儍魚真係好嘢!可以同奶奶一齊住咁耐都相安無事.」

儍魚:「好多時無謂吵吵鬧鬧.免得儍馬同老爺難做.」

師奶甲:「其他師奶個個都講佢搵到儍魚咁o既心抱真係佢前三世修落o既福.佢份人咁難相處,如果係換咗第二個,一定唔會同佢住.佢仲四周圍同人講儍魚係貪儍馬啲錢至同儍馬一齊.其實係佢拾到寶至真.」

儍魚:「...」

儍馬既唔係有錢人,亦唔係個疏財o既人.就算儍魚幾個月冇工開都唔會俾錢儍魚使.貪錢o既話一定唔會搵儍馬囉...

---------------------------------------------------------------------------------------

儍魚喺屋企除咗拾自己間房,其他家務都唔做.所有煮飯洗衫拖地都係奶奶做.原因唔係儍魚大小姐唔識做或懶.只係儍魚覺得奶奶喺呢個家"服務"咗咁耐,突然有一日多咗個人走o黎搶晒奶奶o既嘢o黎做,搞到奶奶冇晒地位,以奶奶o既性格一定會大吵大鬧,啫多批評.到時就會家嘈屋閉,老爺同儍馬就會好難做.加上儍魚要返工,冇乜時間做家務.又可以令奶奶覺得個家冇咗佢唔得.直到有幾次俾儍魚見到奶奶點洗衫之後,儍魚決定自己洗返自己啲衫.

儍魚本身皮膚好敏感之餘,對氣味都好敏感.奶奶洗完o既衫,就算有用柔順劑,尤其係儍馬啲衫,都仲會有汗酸味.而其他o既衫都唔會有柔順劑o既香味.原來奶奶用屋企部冇浸衫功能o既洗衣機o黎浸衫,仲要係浸幾個鍾,甚至係大半日.浸都唔緊要,問題係奶奶洗一件衫用一匙洗衣粉,洗一百件衫都係用一匙洗衣粉!!!咁浸法,就算係乾淨o既衫都係俾其他污漕衫整臭晒.當然部洗衣機裏面都臭埋.

儍魚:「奶奶,你驚部洗衣機洗得唔夠乾淨要浸下先洗o既話,喺厠所浸咗先至放入去洗喇.部洗衣機冇浸衫功能,咁浸法部機會壞o架.仲會搞到部機臭晒.」

奶奶:「部機係儍魚搞臭o架.成日洗完啲衫都唔拎去掛.咁焗法乜都臭喇!我洗衫洗咗幾廿年,點會唔知點洗衫呀!」

儍魚:「洗乾淨咗o既衫又點會臭呀?!!啲衫浸咗幾個鍾,啲水都變成黑色.再用啲黑色o既水洗衫,就算落晒成樽柔順劑,啲衫都唔會乾淨同香.部機又點會唔臭喎...奶奶自己嗅下喇!儍馬o既衫,呢件係奶奶洗o既,而呢件係儍魚洗o既.同一部機,點解儍魚洗啲衫會咁香,而奶奶洗o既仲會有汗味呀?啲衫又唔係好緊要污漕,唔使浸都得喇.要浸o既話落多啲洗衣粉.」

奶奶:「總之我浸衫唔會整臭部洗衣機.儍魚以後洗完啲衫好快啲拎去掛,唔好擺喺度整臭部機.」

注:全程儍魚都係好聲好氣,而奶奶就越講越大聲.

最後,儍魚o既衫儍魚自己洗返,而儍馬啲返工衫就俾儍魚洗,訓覺衫就俾奶奶洗.

--------------------------------------------------------------------------------------------

試過有幾次儍魚自動請纓煮飯.同奶奶去買完餸返屋企,諗住需要浸o既浸咗先,要洗o既就洗咗先.當然,奶奶就不繼出口又出手指指點點教儍魚點做,搞到儍魚亂晒.儍馬都有幫手,三個人迫喺個廚房度,轉個身都難.

奶奶:「啲菜要洗幾次至得o架...啲材料要抄下先至煲o架...要落啲老抽o架...」

儍馬:「得喇!得喇!儍魚識煮o架喇!你出返去先喇!」

奶奶:「得閒都唔落廚煮一次,有幾識呀?」

儍馬:「都話識咯!!!出去喇!等你咁教法十點都冇飯食...」

奶奶心不甘情不願咁離開個廚房.結果遲咗半個鍾開飯,老爺同儍馬都話好好味.但係奶奶就...

奶奶:「差唔多喇...煮多幾年可能會好啲o既...」

幾次都係咁,之後就當然係奶奶唔喺屋企食飯唔煮飯嗰陣至由我上陣做大廚!!!

--------------------------------------------------------------------------------------------

奶奶當儍馬係三歲細路咁照顧.成日覺得儍馬冇咗佢照顧就會病.儍魚曾經因為想搬出市區近返工而俾奶奶哦咗半年.

奶奶:「做乜要搬出去啫?住喺度咪幾好.有人煮埋俾你哋食,又有湯飲.搬出去住,乜都要自己做,咁辛苦.」

儍魚:「返工遠,一來一回就冇咗三個鍾.加班攰到死都仲要搭個幾鍾地鐵巴士至返到屋企.第二日又要早起身返工喎...搬近啲可以慳返啲時間,訓多個鍾都好呀!」

奶奶:「好多人都係咁喇.好多人都冇能力搬出去,日日都係咁.人哋都得,點解儍魚唔得呀?」

儍魚:「其他人係咁唔代表儍魚都要係咁.其他人唔搬係其他人o既事.儍魚唔想咁辛苦囉...仲有,屋企間房都冇乜位俾我擺嘢...」

奶奶:「總之唔準搬!!!」

結果,儍馬頂唔順奶奶日哦夜哦,加上搵唔到合適o既租盤而暫時打消搬屋o既念頭.兩個月後有一日...

奶奶:「聽聞隔離座有個大單位放盤喎.不如賣咗呢層樓買隔離座個大單位咪夠住囉.咁你哋咪唔使搬囉!」

儍魚:「唔係夠唔夠住o既問題.隔離座離公司咪一樣係咁遠.都冇分別.買隔離座不如唔好買.搬過隔離同搬出市區都係要使錢,倒不如搬出市區.」

奶奶:「市區乜都貴過人,有乜好?唔買咁就唔準搬!」

儍魚真係幾嬲.儍魚明白奶奶想同儍馬一齊住.但係儍馬再咁樣同奶奶一齊住落去,儍馬永遠都唔會獨立,唔識照顧自己.咁儍馬點樣照顧儍魚呀?奶奶有冇諗過以後冇人照顧儍馬o既話,儍馬點算呀?終於搬屋事件喺儍魚炒咗老板魷魚之後不了了之.

********************************************************************************

儍馬喺日本搵到份新工,遲啲會去東京返工.但係儍馬遲遲都唔肯話俾老爺同奶奶知.上個星期儍魚上大陸工作前就叫儍馬同奶奶講.奶奶知道之後都冇講啲乜.但係儍魚知道其實奶奶係好擔心同好唔捨得.而儍魚雖然唔可以長時間留喺東京陪儍馬,但係儍魚却非常開心.儍馬終於可以離開奶奶去學習點樣照顧自己喇.