外語

儍魚幾年前喺日本留過學.去日本之前讀咗一年日文,打咗底至膽粗粗隻身渡東瀛.儍魚想同大家分享一下讀外語o既心得.

外語,無論係乜嘢語言,若果唔用都會好快忘記.但係有好多外語,都好難有機會可以經常用到.比如日文.除非喺日系公司做嘢時個日本人上司净係識講日文,又或者有好多日本人朋友,如果唔係都幾難搵到機會用日文.想學日文或學緊日文o既朋友可以點至練好啲日文?其實都好簡單.只要製造到多啲睇同聽o既機會就得.同埋,學外語時緊記唔好自己一個人去學.搵多個朋友一齊學,咁課餘時間可以有個人一齊練習.有朋友一齊學,一齊玩會更易學得成.儍魚就係同老友一齊去學日文.每日講電話時都會用超屎o既有限日文亂咁講.

到學到咁上下,文字同基本發音都記得之後,開始學文法時最大o既障礙係詞彙唔夠.通常學外語都會從日常會話開始.點樣可以增加日常會話o既詞彙?答案係漫畫.睇漫畫,就算唔明啲字講乜都大概猜到個意思.當時儍魚就去搵啲細路o既漫畫睇.睇得多就自然會明,自然會識多好多字.

到學完基本o既文法,儍魚膽生毛學人去睇小說.當然唔係睇嗰啲文學小說喇.儍魚係睇少女愛情小說.雖然唔鍾意愛情小說,但係係唯一睇得明明哋o既小說.一路睇一路查字典.睇睇下,不知不覺咁學識好多高級啲o既文法.同時間,儍魚亦冇放棄睇儍魚至愛o既漫畫.一路咁升級上去,睇o既漫畫就由細路漫畫變成較深o既偵探漫畫,而少女愛情小說就變成好深o既文學小說.久而久之,翻字典o既次數就越來越少.就係咁,儍魚喺短時間內學到好多新嘢.

學外語除咗文法煩,詞彙多,難記之外,發音亦係一個難題.點樣可以學好啲發音?文字o既發音同音樂一樣,只可以模仿.另外,聽得多就自然會模仿到.儍魚當年聽好多音樂,睇好多動畫,有時會聽下日本電台.當然,若果身在日本o既話就容易得多.儍魚喺日本期間,基本上係一有時間就會睇電視.有乜嘢比電視教學好?!!學到嘢之餘仲可以娛樂.

其實學外語唔係一味靠死讀就得.好多時死迫自己去死記反而會有反效果.儍魚從來都唔會迫自己做任何嘢.曾經俾儍馬同其他同學話過儍魚考試唔溫書.但係唔溫書都考到,激死大家!!!唔係誇口,儍魚因為要陪儍馬考日語一級試,至今總共有五張日語一級證書.除咗第一張之外,其餘o既都考到三百二十分以上.(註:满分係四百分)次次儍馬睇到儍魚啲分數都會好唔開心.次次儍馬都會話唔明點解儍魚考試前唔溫書都可以攞咁高分,而自己死讀爛讀反而唔合格.儍馬成日話係儍魚出貓,仲試過迫儍魚交出出貓絕招!!!出貓絕招就冇喇...出師秘笈就有幾本.咪就係朋友,日本漫畫,日本小說,日本流行音樂,日本動畫,日劇,日本電影,同日本電台.想要?!!唔好意思...啲秘笈要自製至有效o架.呵呵~

嫁

網友子魚睇完儍魚個部落格回應話愛情o既力量好偉大,令儍魚可以忍受奶奶咁耐.子魚仲話就算佢幾愛對方,若然同對方屋企人唔夾就唔會嫁俾對方.其實,儍魚想講,儍魚只係嫁咗俾儍馬而唔係嫁俾老爺奶奶.

現今呢個年代,除咗有錢o既大戶人家,已經冇乜所謂嫁入門o既觀念.大不了咪搬開唔一齊住,一年見幾次咪算囉.但係儍魚由細到大都生長喺一個家庭觀念極重o既環境裡面.老爺奶奶係儍馬o既父母,咁啫係儍魚o既長輩.儍魚想搬出去住唔係因為奶奶難頂,而係為咗儍馬,為咗自己.儍馬由細到大都俾人話係裙脚仔.奶奶到宜家都仲當儍馬係三歲細路咁照顧.再咁落去,儍馬永遠都唔會識自己照顧自己,永遠都唔識自立.奶奶仲可以咁樣照顧儍馬幾耐?儍魚又可唔可以同儍馬百頭到老?冇人知,亦冇人可以保證.萬一有朝一日冇人喺儍馬身邊照顧儍馬,咁儍馬點算呀?咁當然,儍魚係大小姐,要人照顧.大小姐又點會照顧人o架?!!

係,奶奶有時係真係幾難頂.但係無謂同奶奶嘈.一來,會令老爺同儍馬難做.二來,會令奶奶討厭儍魚,咁儍魚以後就冇乜好日子過.三來,家嘈屋閉,無謂喇!其實儍魚好明白奶奶o既心情.終於等到個寶貝仔去完日本讀完書返o黎,點知個仔帶多個女人返o黎同自己争喎.做人阿媽o既,梗係擔心個仔遇人不淑俾人呃喇.就算冇俾人呃,都驚個仔俾人蝦.做奶奶o既只不過係想俾個下馬威個心抱,等個心抱知道自己同個仔都唔係好蝦o既.再加上奶奶o既性格,霸道,專制,要面,好多時仲唔係好講道理添...試問同一個唔講道理o既人嘈個結果會係點?!!有理說不清o既争吵都係不吵為妙.奶奶要面難落台,儍魚咪俾個下台階奶奶,扶埋奶奶落台囉.大家和和氣氣咁咪幾好.雖然宜家奶奶對儍魚咁好係驚儍魚帶走儍馬.但係人心肉做.儍魚相信終有一天奶奶會真心鍚儍魚.又或者,以奶奶o既智商,儍魚永遠都只係一個"拐子婆",一個搶走佢個寶貝仔o既壞人.

奶奶係儍魚o既借鏡.儍魚不時警惕自己,唔可以好似奶奶對嫲嫲咁對代奶奶.今年過年,儍魚做咗兩件大事.儍魚成功迫奶奶喺年廿九同嫲嫲食團年飯.更成功咁迫奶奶喺年初二去嫲嫲度拜年同食開年飯.個個叔父嬸母都好佩服儍魚.因為佢哋十幾年都勸唔到阿"大嫂"返去同阿"奶奶"食飯.以後每年奶奶再冇藉口唔去嫲嫲度食飯.長輩,就算幾唔啱都係要尊重.希望奶奶有朝一日會明白儍魚o既用心.

瑜伽

前幾日一間瑜伽中心打o黎問儍魚有冇興趣去體驗一下做瑜伽.儍魚見無聊加上少少興趣,前日上咗去試玩伸展瑜伽.去到梗係四周圍睇下望下.間瑜伽中心地方都幾大幾乾淨.儍魚好怕同一啲冇乜文化修養o既人共處同一個空間.好在啲會員都唔會好雑.教伸展瑜伽個導師都好細心.但係就得一個鍾唔係好夠.個過程好舒服,儍魚差啲搵埋周公子一齊玩.玩完,沖埋個涼之後當然會有個"營業專員"姐姐仔等住"服侍"儍魚,希望可以喺儍魚身上擠出"魚油"去滋潤一下份人工.儍魚其實都有興趣想入會.所以儍魚就問有冇啲短期會籍.因為喺下個月中如果儍馬個工作簽證一批,儍魚就要同儍馬一齊去日本.如果佢有一個月會籍計劃,儍魚啲魚油一定不保.只可惜世上係冇咁筍o既事.所有會籍都係一年.講下講下,可能見儍魚真係有心想玩瑜伽,就同儍魚講之前做過一個兩個月o既計劃,可以幫儍魚問下上級可唔可以做返,但個價錢會貴啲.如果儍魚家財百萬,儍魚會即刻扑鎚.儍魚話要返去睇下啲時間再決定.個姐姐仔當然唔會咁輕易放儍魚走,而儍魚梗係唔會咁易俾人困住.瑜伽係好玩,但係儍魚都係鍾意跑步機多啲.咁當然如果部跑步機隔離有人教埋瑜伽就至好喇!

人生何求

今日同個老友喺網上傾咗好多嘢.老友話公司遲啲會搬到好遠,返工好唔方便所以想轉工.儍魚就問老友鍾唔鍾意份工,做得開唔開心.老友話麻麻地鍾意,但都算開心.儍魚再問老友份工值唔值得山長水遠,長途跋涉咁去返.老友話唔係值唔值得o既問題,而係屋企仲有好多事情要做,如果返工時間長咗就冇時間做屋企嘢.儍魚就話老友生活太過緊張.其實係觀點與角度o既問題.成日諗住仲有十幾樣嘢要做,次次都赶死赶命咁去做只會越忙越亂,越亂就越係做唔完.換另一個角度,諗住只得十幾樣嘢要做,心情輕鬆啲,少咗好多錯亂就自然做得快手啲.好多時都係越赶越遲,唔赶反而唔遲.老友都話儍魚講得啱.

人,其實要求好簡單.只要生活無憂,開心就满足.但係每個人都生活無憂同開心o既定義都唔同.有啲人只要三餐溫飽,有瓦遮頭就叫生活無憂.但係有啲人就覺得要餐餐山珍海味,大魚大肉,住豪宅,坐靚車至稱得上係生活無憂.有啲人覺得有時間同心愛o既人手拖手去行街,就算喺屋企樓下食碗麵都開心.但係有啲人就要時時收到厚禮,一年去幾次環遊世界至會開心.人,要求得越多就會越唔開心.成日諗要點樣令自己生活好過點,倒不如諗下世上有幾多人比自己更不幸,自己其實已經好幸福.所謂知足常樂.儍魚提議老友應該去享受長途跋涉o既返工路程,享受塞車,享受人生每分每秒.老友話時間就係金錢,但係享受人生都好重要.儍魚叫城市人老友輕鬆啲,老友話村姑肯定會比老友開心好多.儍魚話老友要求太多,老友話自己要求好簡單.儍魚話老友只係想生活稳定.但係老友就話儍魚唔明白,老友只求工作稳定.工作稳定等於收入稳定,咁生活就自然稳定.老友諗咗一諗,覺得儍魚講得都幾有道理.

儍魚好明白老友o既心態.反而係老友唔明儍魚想講o既"道理".可能儍魚已經超出咗一般人可以理解o既境界.可能儍魚上咗神枱.冇乜人可以理解點解儍魚可以食一片麵包,飲一啖水都咁開心.其實,有乜嘢比可以冇病冇痛活喺世上更值得開心呀!!!有包食,有水飲比冇得食冇得飲好好多喎.咁唔係值得開心咩?儍魚成日都講,船到橋頭就自然直.諗咁多做乜?!!每日笑一笑,生活樂逍遙!!!儍魚係咪應該去出家做尼姑,得閒講下佛偈?!!講笑!!!儍魚又點會放棄同儍馬一齊開心喎...

一句到尾,簡單就是開心,無求就是快樂.

通波仔

正話儍細佬話俾儍魚知儍爸五月要做通波仔手術.儍魚一知道啲眼淚就唔受控制咁不停流.五月儍魚喺東京,返唔到去陪儍爸.儍細佬話係小手術叫儍魚唔使擔心.點會唔擔心喎...心臟手術喎!!!小手術都係手術呀.儍細佬話儍爸唔想儍魚返去陪佢老人家.儍魚唯有聽話唔刺激儍爸囉.今晚肯定訓唔到...睇返自己啲時間表,雖然好想早啲返去,但係真係安排唔到時間.儍魚決定九月尾返去兩個星期.九月,快啲到喇...

核突

上個星期幫間日本公司做翻譯,搵咗啲外快幫補下生活.第二日返工途中搭地鐵嗰陣見到啲好核突o既嘢.話說當時儍魚喺中環搭地鐵去灣仔.架地鐵到站,儍魚見到嗰卡車有好多空位,仲諗住有位坐好開心.一踏入車廂之際,就傳o黎異味.原來之前有人喺車廂裏嘔吐.乘客紛紛走避,只有少數人企喺遠處,包括儍魚.短短三個站o既車程,儍魚不斷胡思亂想.心諗嘔嗰個人會唔會有傳染病...儍魚會唔會被傳染...直到儍魚喺灣仔落車,都唔見有地鐵職員o黎清理.儍魚想同地鐵職員講,但係因為好赶時間,心諗應該會有其他乘客會咁做,所以儍魚就一支箭咁沖咗出地鐵站.但係直到今時今日,儍魚都好自責.萬一啲嘔吐物係有會傳染o既細菌,咁咪會有好多人會病囉?!!不過諗深一層,地鐵公司應該加強清潔車箱,派多啲清潔工人駐守喺幾個站,不時上車清潔下.咁樣乘客至可以搭得更安心...