給至愛的傻馬

今年o既今日真搞鬼~傻馬喺馬交,傻魚喺東瀛...雖然前日同關生一齊食飯當慶祝咗,但係喺正日傻魚都要做返啲嘢o既.

傻馬,生日快樂!

祝傻馬事業有成,財源滾滾~

冇買禮物,咁就喺度送個飛吻喇~

給至愛的傻馬

今年o既今日真搞鬼~傻馬喺馬交,傻魚喺東瀛...雖然前日同關生一齊食飯當慶祝咗,但係喺正日傻魚都要做返啲嘢o既.

傻馬,生日快樂!

祝傻馬事業有成,財源滾滾~

冇買禮物,咁就喺度送個飛吻喇~

失魂

返到傻家至發覺唔記得拎部腦條電線...冇電點上網呀?!!唯有聽日去秋葉原睇下買唔買到囉...

無奈數一數

近排好無奈.除咗嘆息之外,冇其他嘢可以做...日日得閒得滯係咁搖頭,無奈...

無端端上唔到網...叫人上o黎整咗兩次,都係話樓下機房個制鬆咗.整完上到一陣又死線...無奈...

再叫人上o黎睇,今次話係路由器老化壞咗要換.都唔知關唔關天氣太熱,熱爆咗嚿嘢...無奈...

傻馬下令要傻魚游過大海做咕喱,日日一條死魚喺條街做蕩婦,仲搞到周身骨痛...無奈...

關生成日放飛炮,搞到傻馬冇得歡樂正記...無奈...

傻馬個老細一句仲未請到人,傻馬就要留耐啲...無奈...

傻魚諗住返日本陪下傻馬,所以接咗份貼錢工...勁無奈...

下星期一一條死魚返東京十日,但係只返四日工...勁無奈...

澳門酒店上唔到網,索性連腦都唔帶,搞到冇機打...勁無奈...

去賭場睇人賭錢.死魚學人精神賭錢,估細開大,估大開圍...超無奈...

滯澳每日行程-十一點去賭場,十二點半同傻馬食晏,兩點半返酒店睇卡通,七點同傻馬食晚飯...超無奈...

上個月"咸豐"玩完嘢之後,傻魚就冇咗份兼職,搞到傻魚冇錢使...超無奈...

畀朋友話:「嘩~傻魚就好喇...唔使做,日日都少奶奶生活.好羨慕呀!」超・級・勁・無・奈!

其實都唔係好差...話無奈不如話係悶...返到日本一條魚都唔知食乜好...主婦,可唔可以黐飲黐食呀?

連線

終於上到網喇...可惜一陣又要出發坐大飛過大海...星期五晚再報導過...哎~好無奈...

澳游後記

[聲明]此篇網誌純屬個人意見,不涉及針對成份.

今次去澳門住咗幾日,令傻魚更加肯定一件事.任何一個去旅游覺得好o既地方,去住會覺得唔係咁好.上次去澳門,可能係第一次去,樣樣都覺新奇好玩...加上即日來回,又去咗大酒店食自助餐,覺得都唔錯.但係今次唔係去玩,住多幾日發覺澳門唔好住.傻馬就更加迫埋奶奶隱退,搶咗個百彈教主o黎做...

首先...的士...真係好似唔想做咁...就算喺旺區都經常截唔到的士.再加上態度勁差同拒收五百蚊港紙,令傻馬狂彈.當然當中都有好人,但係真係好少囉...

跟住就係餐廳.可能香港人畀人寵壞晒,覺得一入餐廳坐低一定要有杯水或茶.偏偏澳門就冇呢種服務,搞到傻馬勁多微言.不過呢樣嘢對傻魚o黎講又可有可無,因為傻魚一定唔會飲.澳門啲餐廳會隨時唔開門或早收,搞到傻魚要周圍搵食.去過咁多間餐廳,得囍館係有服務.好多餐廳仲唔收五百蚊港紙添...

酒店...唔知係咪傻馬公司慳錢,搵咗間三星酒店畀傻馬.間酒店位於旺區,出面幾條馬路朝朝早都塞車.間酒店唔算好差,但係個廁所就...好明顯係啲員工平時清潔做得唔好,傻魚覺得好恐怖.仲有就係,明明已經將啲沐浴露同洗頭水空樽丟棄,但係酒店員工執房嗰陣冇擺返枝新o既畀傻馬.見啲沐浴露同洗頭水都唔係咁好用,最後唯有去屈神買.

澳門本身除咗賭場同一啲名勝古蹟,都冇乜地方可以畀人去下.對於一啲好似傻魚咁要留幾日但係又唔去賭o既人o黎講,真係悶到曉生蛋...要去同可以去o既地方,基本上兩日都已經可以去晒...跟住可以去邊?唔知...咪唯有返酒店囉...

其實唔止澳門...日本都係...去玩的確唔錯...但係去長住又真係唔覺有幾好.成日聽人講,人離鄉賤,呢句說話一啲都冇錯.有乜嘢比自己地頭更好呀?!!家,永遠是最好的!!!

後記:今朝一早返咗香港,結果下午就八號風球...傻馬已經九秒九沖去碼頭,但係都係趕唔到船.結果就搭巴士去拱北經珠海去羅湖返香港.呢篇網誌係喺關生屋企打o既,所以一陣夜啲同關生去上水接完傻馬落元朗打冷,跟住返屋企至寫返囍館o既資料.

富貴魚游澳記

嘩哈哈哈~竟然畀傻魚偷到街線喎...梗係乍乍林報導下喇...

星期一下午三點由屋企出發,搭四點半o既船過大海會傻馬.原本天晴氣朗,一上到船冇耐就開始落大雨喎...都話傻魚係條富貴魚o架喇~仲唔係貴人出門招風雨?!!去到過關排咗一輪,都幾多人.之後等咗半個鍾至見到傻馬.兩條友搭的士去酒店擺低啲嘢就去醫肚.嗰晚去咗某雜誌介紹o既葡式茶餐廳.傻馬話三點幾食咗嘢,唔肚餓.傻魚就叫咗個葡國雞,馬介休球同葡式燒排骨.一時唔記得影相,不過傻馬話啲嘢麻麻地...食完返酒店途中又落雨喎.好在唔係好遠咋~講起間酒店…個浴室好恐怖,而其他就中下…沖完個涼兩條友都散晒,即刻上床訓喇.

星期二一早八點起身...其實已經訓遲咗…乍乍林梳洗完就沖出門.落到街,又落雨…今日傻馬要去氹仔做嘢,所以傻魚就跟的士去氹仔玩.點知買完個包等咗半個鍾都仲未截到的士.一個咁旺o既區竟然冇的士o黎喎…離晒譜o架~幾經辛苦終於上到的士,仲要撞親個頭起咗棟樓添…因為傻馬己經遲到,送咗傻馬去威尼斯人之後至去氹仔街市.諗住去食豬仔包,去到至知要三點鍾至有得食喎.搞錯~無計咪唯有過對面食麥記早餐,跟住行經關公廟拜一拜,然後行咗去官也街.條街短短,唔使五分鍾就行完.入咗去鉅記買兩包花生糖畀張生,順便暢散啲五百蚊港紙.(因為的士佬同舖仔,都唔肯收五百蚊港紙…吹漲!)望一望個時間,都仲係十點幾咁早,去邊好?無聊走咗去睇住宅式博物館,嘆下冷氣,影咗幾張相做功課.

望一望個荷花池,跟住去咗咀香園買咗三十二蚊嘢,又暢多張五百蚊紙.然後行返去麥記買杯嘢飲嘆冷氣.鬼咪~朝早落完雨後又陽光普照…想熱死人咩?!!等到差唔多三點,見對面越o黎越多人,咪過對面排隊買豬仔包.咁啱撞到商台搞笑二人組幫三色台拍遊戲節目.食完隻豬仔包無所事事又唔知做乜好…諗咗一諗,無聊學人搭巴士去漁人碼頭.等咗半個鍾至見到架巴士.

去到暈暈地求其影咗堆相交功課之後就坐咗喺度嘆海風睇直昇機同渡輪.

吹咗兩個鍾,見太陽伯伯收緊工咪起程行埋個漁人碼頭同影相.

行到咁上下,見個觀音像喺對面咪過去影咗幾張相囉.見傻馬咁晏都仲未有短訊,拎咗個電話出o黎一睇…哎呀~原來傻馬話仲未收工叫傻魚食自己.傻魚梗係唔制喇!話咗打邊爐o架嘛…又等咗成個鍾,終於見傻馬喺氹仔飛的到.

去咗囍館食番茄薯仔豬骨湯打邊爐.個湯好味,啲番茄果然煲極都唔爛,最後仲成煲湯飲完至走.

食完行去影新葡京個彩波,然後搭的士返酒店沖涼訓覺.

星期三朝早八點傻馬搵酒店叫的士返工,而傻魚就九點去麥記食咗個早餐,然後搭巴士去媽閣廟拜神.

暈暈地又完全唔知要點拜,買咗香燭,照住伯伯o既說話點燭然後上香.拜完都係十點幾,唔知去邊好…諗起大三巴好似有衫買,咪搭巴士去囉.繼續暈住買咗兩件衫畀傻馬,然後走去星巴買杯嘢飲諗住坐返幾個鍾.坐坐下收到傻馬個短訊話會返酒店附近買嘢順便食飯,問傻魚喺邊食唔食嘢.傻魚話喺大三巴,叫傻馬過o黎一齊食.

諗住搵某間超滑豆腐花舖,遇到個好心叔叔介紹去另一間老字號食.啲豆腐花好滑,傻馬食咗兩碗.食完點幾鍾,陪傻馬去酒店附近買完電腦嘢返酒店休息.澳門啲的士真係唔休做…成日都截唔到的士…連電招都冇的士…離晒譜!呢兩日傻馬截的士截到火起,仲話澳門係百冇.

夜晚等傻馬返酒店擺低個袋一齊去附近大排檔食魷魚雞絲炒河同鴨絲炒河.

一見到碟炒河,傻馬彈咗句:嘩~下午茶餐呀~咁碟嘢又真係細咗啲o既…食完去屈神買咗隻超細洗頭水就返酒店沖涼訓覺喇~

星期四朝早傻馬照舊八點返工,而傻魚就訓到九點半至落街食麥記早餐.坐咗一陣諗唔到去邊好,咪喺酒店附近行下囉.

行過契嫲屋企,出去拜拜叫契嫲睇住傻爸.跟住見天陰氣爽咪繼續四周圍行囉.

點知行行下行咗去大三巴喎…嘩~唔覺唔覺行到咁遠添…即刻行返轉頭…返到酒店附近已經兩點,去大家樂食咗個魚香茄子肉絲飯就返酒店休息喇.傻馬呢日早收工,返酒店訓咗一覺就落街食上海嘢.點知間上海店冇開,結果買桂林米粉外賣返酒店食.最美中不足係附近冇豆腐花食...

聽日一早返香港,夜晚等傻馬收工返香港一齊搵關生食飯...

失蹤記

尋日唔知點解成朝條線都斷下斷下咁...熄咗幾次之後仲死埋添...搞錯呀!冇網上會死人o架~同老爺奶奶飲完茶返屋企再試睇下條線有冇返生,跟住老爺就打電話畀"鼻屎"查訊."鼻屎"啲技術人員檢查完一輪後話冇事喎...但係就依然上唔到網.無奈唯有等今日下午"鼻屎"派人o黎睇下乜事囉...搞到尋日悶到癲.好在傻馬喺度,都叫做有個人可以講下嘢唔使發霉...

今日又同奶奶去飲茶...冇計,傻馬想日日都食灌湯餃...凈係等位都等咗個幾鍾,飲早茶變咗飲午茶.之後趕返屋企等"鼻屎"個人o黎,入屋睇咗一陣就落機房搞咗一輪.再返上o黎就話係機房個插鬆咗.傻馬即刻試下上唔上到網,確保冇事至放人走.就係咁傻魚失蹤咗一日半...聽日陪傻馬過大海,聽聞間酒店冇網上...傻魚又要失蹤四日喇~哎~

日本港太大聯盟之花火鑑賞大會

之前七月中原本搞咗個花火鑑賞大會,奈何因為打風而被迫腰斬.八月喺東京有好多花火大會,唔知有冇網友有興趣拉大隊一齊去睇呢?

東京四大花火之一o既隅田川花火大會喺七月二十八日經已舉行.另外三個花火大會資料如下:

第三十二回江戶川区花火大会 (1萬4千發)

日期: 2007年8月4日(六)

時間: 下午7時15分至8時半

地點: 江戶川 (JR総武線市川駅南口徒行15分鍾)

去年人數: 約139萬人

網頁: http://www.ei-net.city.edogawa.tokyo.jp/event/event2.html

第二十回東京灣大華火祭 (1萬2千發)

日期: 2007年8月11日(六)

時間: 下午7時至8時20分

地點: 晴海

去年人數: 約68萬人

網頁: http://www.walkerplus.com/hanabi/kanto/detail/fw0484.html

神宮外苑花火大会 (1萬70發)

日期: 2007年8月16日

時間: 下午7時半至8時半

地點: 明治神宮外苑

去年人數: 約17萬人

備註: 入場有料

網貢: http://jingu-hanabi.com/

有興趣o網友可以約埋一齊去睇.好可惜傻魚唔喺日本,只可以做下搞手...大家玩得開心啲,影多啲相交下功課喎.

香港聚會小報

今日尖沙咀差啲水浸...唔使問點解都知乜事喇~唔知o既繼續睇埋落去囉!傻魚五點半準時到達集合地點.轉咗一圈都唔見其他人,驚認唔到啲網友咪追魂電話尋人囉.等咗十分鍾終於見到兩位網友喇~抖咗一陣,見其他網友話遲啲會自已上酒樓,咁咪起程去酒樓囉.坐咗半個鍾,頂唔順嗌咗兩個小食咬下,跟住就見第三位網友現身喇.一路傾一路等,其他網友都陸陸續續蒲頭.到差唔多七點九,十個大人加一個小朋友坐晒喺度等最後一位嘉賓到達.見小朋友好似肚仔餓,諗住叫碟飯食住先.

網友情緒"天然高",傻魚提咗幾次個餐有炒飯都聽唔到.最後就梗係...食剩一啖...八點前終於齊人喇~個餐食咗乜?去片...相...至啱...(係喎...唔記得影條片添...失敗!)

八點鍾準時上菜.

可能已經坐咗好耐o既關係,啲餸係好快就上到成枱都係...兩歲小朋友揸住成嚿咬,好叻仔.

再加上啲網友不斷影相同噴口水,所以個進度係超級慢...

o黎埋呢個餸,張枱已經冇晒位喇...

就喺大家食緊翅o既時候,小朋友拗訓覺.媽咪唯有推小朋友出去行幾轉返o黎再到爸爸接手.

傾得開心得滯,差啲唔記得要做功課...條魚已然畀人輪完,皮都冇埋...

呢味都係突然醒起未影...好在都仲有個型喺度.

到呢隻雞上枱時,個個都差唔多停晒手咁滯.

今晚o既第二個炒飯...到最後係食剩一半有多,打包收場.

諗咗好耐都唔知啲壽包可以賀邊位...終於係畀咗個藉口用o黎賀小朋友下個月中生日.

成枱都係餸,個個掛住噴口水...見皇帝陰陰嘴笑就知今餐幾掂喇...

全場最嘈係呢一圍枱...傾生仔,湊仔,靈異嘢...乜都笑餐死~

兩男九女一小童...口水浸腳,笑聲震耳,語驚四座,爆肚穿腸...一家三口走先,之後大肚婆話眼訓要返屋企所以埋單.大肚婆走咗之後其他網友傾到十一點幾都仲唔拾得走...好在今日唔係好旺場,冇人等位.如果唔係實畀人趕呀~今日傻魚係三陪,陪食陪飲陪笑...真係好開心o既一餐...原本諗住去附近飲杯嘢,但係見好多網友都好攰,所以就散會喇.下次幾時?最快都要九月喇~八月輪到関東区喇.好多新人報到,要搞個迎新會至得...