柴可夫"司機"

今朝起身食完個早餐之後盤算緊晏晝啲節目點編排,可惜傻妹一個電話搞亂晒所有行程...話說幾年前傻妹好醒哋將張結婚證書鎖喺保險箱裡面...早排傻妹畀人搶手袋,連銀行保險箱條鎖匙都冇埋.依家個女出咗世要去整出世紙,要拎返張結婚證書出o黎...朝早去銀行,啲職員要傻妹四點鍾再去,到時會安排開鎖佬爆鎖喎...傻妹夫要返工,傻妹咪打o黎搵傻魚做柴可夫"司機"囉...
三點鍾去載傻妹,傻妹叫個嬸嬸帶埋姨甥女一齊去...吓?!!點解呀?仲諗住好快就搞掂,傻魚應該仲有時間去行下街...點知搞咗成個鍾,姨甥女喺架車度就喊咗成個鍾...冇帶奶粉冇奶食,肚餓喊到拆天咁...唯有飲水頂住先.真係陰公豬囉...載完傻妹返屋企又夠鍾接傻媽喇.傻妹又打o黎話要買奶粉...結果就載埋傻媽同傻二姑媽一齊去"超大型新超市"搵奶粉.可惜賣晒冇貨,白行一趟...送咗傻二姑媽返去,返到娘家都成七點鍾.仲要係成村人等齊人食飯...食完飯姨甥仔又話要返屋企,又要送佢返...去到例牌會坐下至走,不過聽到傻妹話傻細妹買到奶粉,一陣會拎上o黎喎...諗住等埋傻細妹,點知傻細細佬打o黎問傻魚去咗邊咁耐都唔返...要用車又唔早響喎...乍乍林揸返架車返娘家,一返到就收到傻細妹夫電話.原來傻細妹夫見到傻魚架車,問傻魚係咪返咗娘家,仲問傻魚出唔出去食宵夜.都好喎...雖然散散地...等緊傻細妹夫打o黎傻魚至落樓.
一講曹操,曹操就到...傻魚要去食宵夜喇~呵呵!

反甲

今日本來好開心...老友小魔女請一日假陪傻魚玩,仲約埋好友芳姑食晏傾偈.因為換咗電話,睇唔返啲短訊,諗住約咗十一點.傻爸今日有啲嘢做,揸咗架車出去.咁傻魚咪搭的士囉.去到啱啱好十一點,但係唔見人喎...打畀小魔女至知原來係約咗十一點半.哈~好在小魔女喺附近行緊商場,傻魚就過去會合小魔女.行到差唔多時間就返去集合地點,一去到咁啱撞到芳姑.時間啱啱好.
先去傻細妹夫間舖睇下.芳姑畀傻魚同小魔女"昆",買咗件衫.助長經濟之餘又助長埋間舖o既銷量.唔錯唔錯...呵呵~之後去醫肚...食完傾咗一陣就去行街.行行下芳姑收到個電話,之後就話要去見個客要走先.冇計喇...目送芳姑過完馬路之後,傻魚同小魔女就轉場去行另一個商場.小魔女差啲畀傻魚"嘈"到買咗條裙同鞋.最終都忍到手唔買住...對鞋...哈哈~之後小魔女介紹傻魚去買包點,傻魚買咗九個.然後小魔女就去搭車返屋企,而傻魚就行返去傻細妹夫間舖等傻爸o黎載.九個包有三個係分開另一盒,請傻細妹夫同佢個妹妹仔員工食.一人一個食得好開心.小魔女,多謝你o既好介紹!
今日又落大雨.傻爸o黎接傻魚嗰陣啲雨細咗少少.傻魚冇帶遮,見到傻爸架車咪跑出去伸手拉車門囉.不過傻爸唔記得開車門,結果搞到傻魚反甲!!!好痛呀~流血添呀!嗚~接埋傻媽同傻二姑媽,傻魚即刻畀隻手指傻媽睇.傻媽話要剪咗啲指甲至得...點剪喎...仲黐住啲肉o架...好痛呀...唔理喇...黐塊膠皮算喇.
食完飯姨甥仔嘈住要返屋企,傻魚咪載佢返囉.好在冇塞車啫.隻百厭精係咁喺架車度嘈,搞到傻魚遲咗轉線又唔知去咗邊...好在都叫做有方向感,可以返返去原路.下次都係唔好畀隻百厭精坐前座.去到上樓坐下,轉交傻細姨丈封利是畀傻妹.功成身退就返歸去.一陣搵傻馬傾下偈先...隻手指真係好痛...

四百幾公里之旅(二)

八點幾醒咗,大懶魚唔願離開張床...都唔知攤咗幾耐,直到小朋友開門搵傻魚姐姐.梳洗完之後就一齊食早餐...網友媽咪整咗蛋治,加杯奶茶,好幸福呀!
問網友媽咪小朋友尋晚瞓得好唔好,網友媽咪話小朋友成晚發惡夢.可能係傻魚同小朋友玩得癲得滯...真係唔好意思呀,網友媽咪.今日都係唔好咁玩喇.不過小朋友見有人同佢玩,對方唔多畀反應都好,佢自己都玩得好投入.
見外面陽光普照,曬到無論...晏啲可能會落雨,早少少出去行下囉...一行出去,真係乜都溶呀...不過溶極啲體內脂肪都仲喺度,點解呀?!!如果可以溶埋啲肥膏,你話幾好...行咗一陣商場就去搵個地方坐低食晏.其實啲早餐都仲未消化晒,傻魚勉強食晒成碟意粉.食完坐下,然後就同網友媽咪去超市買餸.網友媽咪排隊畀錢嗰陣,傻魚就帶小朋友去坐電動車仔.之後再行多一陣就返歸喇...實在太熱喇...
返到屋企小朋友唔願瞓晏覺,係咁拉住傻魚姐姐玩.為免小朋友今晚又瞓得唔好,傻魚都唔敢同小朋友玩得咁癲.小朋友今日o既情緒真係高到爆.網友媽咪畀咗支奶小朋友飲,諗住小朋友玩多一陣就會瞓.傻魚咪帶小朋友入房喺張床度碌o黎碌去囉.全程傻魚係攤喺張梳化度,而小朋友就好興奮咁喺度周圍碌...碌咗好耐都唔願瞓,反而係傻魚差啲瞓著.
傻魚見差唔多時間,就拎晒啲嘢出廳,順便叉下傻細細佬個電話,費時一陣冇電叫唔到傻細佬o黎接傻魚.之後打個電話畀傻細姨丈,問清楚佢幾點會到.再同小朋友玩多陣,夠鍾走人喇...同小朋友講傻魚姐姐要返屋企,小朋友指指自己問網友媽咪小朋友呢?網友媽咪話小朋友依家咪喺屋企囉,傻魚姐姐要返去搵傻媽喇.小朋友想跟傻魚姐姐返屋企喎...小朋友,你真係氹得傻魚姐姐好緊要開心.傻魚姐姐都好唔捨得你呀~之後網友媽咪就帶埋小朋友送傻魚落樓.傻魚見落緊雨仔就喺樓下同網友媽咪,小朋友講拜拜.網友媽咪,小朋友,明年過年喺香港見喇~多謝網友媽咪同小朋友熱情款待!
出到去大門口,傻細姨丈已經喺度等緊.去到巴士總站附近搵嘢食,傻魚諗住請傻細姨丈食飯...點知傻細姨丈唔肯...哎呀~傻細姨丈專程o黎載傻魚去車站,又請傻魚食飯,搞到傻魚好鬼唔好意思.傻細姨丈仲要等埋傻魚上埋車至走...下次傻細姨丈去澳門玩,傻魚一定要好好安排下至得.
今晚勁呀!傻魚包晒成架十八座位超級豪華巴士呀!哈哈~成架巴士得傻魚同司機哥哥,想點坐都得.過境嗰陣個入境處哥哥見到都好奇問咗傻魚幾句.停咗一次等司機哥哥食晚餐然後就飛車直踩...見差唔多到車站就拎個電話出o黎,諗住打畀傻細佬叫佢o黎載傻魚.點知個電話冇電喎...玩嘢咩?!!四點幾至叉完,十一點唔夠就冇晒電...乜鬼電話o黎o架...試下開唔開到先...咦?!!好似得喎...點知一開機就接到傻細佬個電話,響咗一嘢就冇電自動熄機...再試多次先...又開到喎...打畀傻細佬,喂!快啲接電話喇...跟住一聽到有人接電話,傻魚就話:「冇電,就到,快o黎...」跟住又冇電熄機喇...去到車站落車過對面路停低,就見到傻細佬同傻爸架車.返到娘家差唔多十二點,傻細佬即刻拎佢個舊電話同傻魚交換.算佢醒目喇...就咁完成咗九百公里o既旅程.依家o既心情係,快啲過年喇~

四百幾公里之旅(一)

一早六點幾起身,七點幾同傻爸一齊出去食早餐.食完返娘家休息一陣又夠鍾出門口喇.驚塞車早啲起程,所以去到巴士站都仲有好多時間.傻爸原本想等埋傻魚上車至走,但係傻魚驚傻爸辛苦,所以就叫傻爸走先.
十八座位豪華巴士只有四位乘客,真係打橫瞓喺度都得.目的地距離四百幾公里,需時四個幾鍾...(係咪o架...)預計中午一點可以到逹...(有冇咁快呀?)巴士準時九點鍾開車.九點幾傻魚打咗個電話畀傻細姨丈,好在搵到人啫.傻細姨丈話今日要三點幾至得閒,咁傻魚就話唔緊要,自己搭的士應該冇問題.之後就約聽晚一齊食飯.四個鍾咁長,做乜好?瞓囉...
今次出遊o既主要目的係去探網友媽咪同小朋友,順便拎啲嘢畀網友媽咪.成程車傻魚既興奮又擔心...興奮係可以見返網友媽咪同小朋友,不過擔心小朋友已經唔記得傻魚姐姐...途中停咗一次車畀啲人去廁所,之後又停多一次畀啲人去食晏.加上落大雨,巴士開慢咗少少.再加上入境排長龍,結果去到巴士總站已經兩點幾.傻魚寫咗兩個短訊畀網友媽咪,去到目的地又寫多兩個.後來至發覺網友媽咪個電話唔係香港電話...擺咗個大烏龍添...
終於都見到面喇~小朋友竟然仲記得傻魚姐姐呀~開心到暈呀!同小朋友玩咗幾個鍾,等埋阿爸爸返o黎就一齊出街食飯.途經超市入去買咗個大西瓜,小朋友同傻魚都好開心.網友媽咪帶傻魚去食上海菜,個小龍包同咸肉菜炒飯都唔錯.傻魚好開心係咁食,食到好鬼飽...多謝網友媽咪同小朋友爸爸請傻魚食飯~
返到屋企小朋友係咁拉住傻魚同爸爸玩.其實平時呢啲時間小朋友都瞓咗.所以傻魚就同小朋友講傻魚姐姐好眼瞓,不如一齊去瞓囉.終於氹咗小朋友去瞓,傻魚上咗一陣網,食埋西瓜都差唔多瞓喇.聽晚返娘家,有啲唔捨得添...

人肉導航

今日原本約咗一班好友去"高茶".可惜朋友細眼要穿州過省去飲,而朋友表哥又整親隻腳行動不便喎...結果就只好改行程.好友律師仔同靜香兩公婆先o黎接傻魚去食個午餐,然後去表哥屋企探"病"...去到見到有好多紅毛丹,靜香同傻魚就老實不客氣咁一人拎一堆...哈~
傾咗好耐,大家都諗緊下場做乜好...傻魚實在太耐冇唱歌喇...所以就決定去唱歌.即刻打畀傻細細佬問架車幾點返娘家,傻細細佬話已經喺娘家喇...咦?!!唔係話要驅車去打波咩?咁早返?唔理喇...表哥因腳場揸唔到車,所以就一車人先去傻魚娘家攞車.跟住靜香就去載契仔契女,而傻魚就載律師仔同表哥去"涼亭".見仲有時間,就喺"兜巴星"飲嘢傾偈.傾到咁上下就去攞房唱歌,咁啱靜香同契仔契女o黎到...真係時間啱啱好.一邊食自助餐一邊唱,好開心...最開心係契仔契女,係咁拉住傻魚契媽出去拎嘢食.唱咗一個鍾,個電話突然響...傻細佬打o黎問傻魚幾點返,因為傻媽想去睇孫女.噢~~~完全冇咗回事!!!好鬼掃興呀...不過冇計,咪死死氣話個半鍾後返囉...唱多幾首就差唔多夠鍾,好唔願走添...律師仔話帶契仔契女送傻魚去停車場,傻魚擺低啲錢就拉住契女走.臨出門口靜香話傻魚搞掂晒啲嘢之後可以返轉頭再唱過...都好喎...如果早搞掂就返兜喇.差唔多返到娘家諗住打返去叫傻媽落樓,點知傻爸話傻妹夫o黎接走晒啲人...搞錯呀?!!早響喇...咁傻魚咪唔使返o黎載囉...再打個電話畀傻細佬,傻細佬叫傻魚去接佢哋返娘家.好喇...應該識去o既...不過好大雨睇唔到路,迷咗路點算?
真係烏鴉口...太大雨完全認唔到路,早咗一個街口轉...結果唔知兜咗去邊...打畀傻細佬,傻細佬就搵傻妹夫教傻魚點行.好在有人肉導航啫...最後終於去到.上樓坐咗一陣至走,返到娘家都已經十一點幾.咁夜唔使返轉頭去唱歌喇.一陣打個電話畀律師仔先...聽朝好早要出門,仲未執嘢添...哈~掛住玩,真係姓乜都唔記得...

"火燭鬼"與友聚

玩咗咁多日人仔,係時候見下啲大人.今朝好早就醒咗等姨甥生o黎,之後幫傻爸手整"傻爸招牌"榨菜雞絲粥.一食完雞粥,十點半都未到,"火燭鬼"傻爸吹雞拉大隊出門口.先載傻魚去買車飛,然後再送傻魚去會友...不過由於"火燭鬼"過份心急,傻魚十一點前就到咗會合地點...仲有半個鍾,企喺條柱度會變"發霉柱女"...諗起尋日買錯咗啲嘢畀傻妹,橫掂有時間,落樓下望下先...可惜搵唔到想要o既嘢,咪周圍蕩下先囉.蕩到咁上下時間,就返去做"柱女".
老死小魔女準時到達,但係老友芳姑就影都唔見.等等下覺唔多對路,打個電話搵芳姑.芳姑話搵緊個集合地點,少少唔耐煩咁收咗線.繼續等咗一陣都仲未見人,又打畀芳姑問佢喺乜位置,叫佢企喺度等.去到都係唔見人,原來芳姑喺另一個入口等.終於見到面喇~芳姑帶埋夫婿o黎介紹畀傻魚同小魔女識.雖然多咗個男人唔多方便講嘢,但係都無損大家o既心情,一樣照高談闊論.成餐飯都傾得好開心.最開心係見到芳姑終於搵到個勁鍚佢o既好歸宿.
食完傾咗一陣,約實下星期三再見,然後芳姑就同夫婿先走,而傻魚同小魔女就去附近購物.先去傻細妹夫間舖擺低啲嘢,再去附近買咗幾件衫畀傻馬.小魔女話要去剪下個頭,咁傻魚就返傻細妹夫間舖度等.之後一齊去附近超市買少少嘢,然後返去傻細妹夫間舖度拎返啲嘢.個白痴電話咁啱冇電,咪順便打埋個電話問傻細佬喺邊.原來傻細佬之前打過電話畀傻魚,咁啱冇電搵唔到人...即刻叫傻細佬兜返轉頭o黎接傻魚.
返到娘家散散地...休息咗一陣,"火燭鬼"又叫人起程去幫傻妹買嘢,然後出街食飯.姨甥仔一聽到有街去就開心到暈...買完嘢食完飯,又一車人上去探傻妹.由於"火燭鬼"傻爸喺度,坐咗一陣就話要走...所以今日傻魚冇"玩女",淨係去"溝女"...哈~

小魔女送畀傻魚o既禮物,勁可愛呀~多謝你呀,小魔女!希望小魔女都鍾意傻魚送o既禮物仔.傻魚冇偏心o架...芳姑份禮物一早就已經郵寄到府上...人人有份o架!嘻~

配角

今朝起身搞掂晒啲嘢,等隻頑皮仔放學返o黎.食完晏畀佢打咗陣機就教佢做功課,然後踼佢上樓小睡.瞓醒就載佢去返補習班,然後去接傻媽同傻二姑媽收工.之後順便去幫傻妹買珍珠末.買完載傻二姑媽返屋企,順路去接返姨甥仔返娘家食晚飯.一食完餐飯,嘴都未抺,姨甥仔就嘈住要返屋企睇妹妹.等埋傻細細佬就起程去傻妹度.

一出世到依家都鍾意咁樣側住個頭仔瞓...

唔知點解,今日個嘴仔多咗逹嘢...
其實傻魚次次返娘家主要都係陪下傻爸.不過自從呢個人仔出世之後,傻爸就變咗配角...冇計喇...對住呢個四日大o既人仔,點都會有點兒"新屎坑"o既...哈哈~見多佢幾次,下次再見嗰陣又唔同晒o架嘛...不過...傻魚都有陪傻爸,只係分咗少少時間出o黎玩下人仔啫...嘻嘻~

打鑊金

今日瞓到十點至起身.唔知點解瞓極都唔夠,個人好攰...尋晚食剩一碗仔飯,諗住炒飯食.但係見到傻爸買咗腸粉畀傻魚食,晏啲至炒畀姨甥仔囉...一點幾傻爸煮午餐嗰陣,傻魚就走去搭單搲材料.等傻爸切好晒啲嘢,傻魚就起鑊炒飯...哈~姨甥仔話個炒飯好味,食完個炒飯唔肯再食粥.是旦喇...個炒飯都夠飽.
食飽飯之後,呢個頑皮仔開始發作...係咁撩事鬥非,想同傻魚隻揪喎...傻魚梗係唔鬼睬佢喇...唔睬佢衰,變本加厲,開始出手打埋o黎...真係佛都有火...即刻捉住佢,諗住打屁股.但係一諗到打佢屁股自己隻手都會痛喎,咁就搣屁股囉.頭一兩嘢隻靚仔諗住傻魚同佢玩,所以不停笑仲還手添...繼續搣多幾嘢,佢先知驚即刻走上樓避.之後乖咗一陣又想再o黎,畀傻魚鬧完死死氣拎住本漫畫攤喺傻魚張床度睇.
傻妹同姨甥女今日出院喇!傻妹夫接完陪月婆就去醫院接傻妹.返到屋企搞掂晒啲嘢就過o黎娘家食晚飯,食完就載姨甥仔同傻魚返屋企.傻妹夫返到去擺低啲嘢之後即刻又要出去拎嘢.傻妹叫姨甥仔做功課,但係姨甥仔就掛住同妹妹玩.三吹四請至捨得開始做功課,但係做做下又走去攞零食食.傻妹冇氣話咗佢幾句,唔聽喎...咁又係姨媽出手o既時候...又畀人打鑊金...跟住喊到豬頭咁...喊完死死氣去做埋啲功課,唔識做就o黎問傻魚姨媽.一做完傻魚就畀返啲零食佢食,仲畀佢睇卡通.傻妹因為好攰,所以返房瞓.頑皮仔有卡通睇即刻靜晒.
哥哥嘈完到妹妹.瞓到咁上下就喊,一抱上手就即刻收聲瞓覺...放返落床仔一陣又喊...就係咁,傻魚好忙咁抱o黎抱去.陪月婆話唔可以成日抱喎...但係當佢喊到拆天咁,都要去抱下佢o架...順手打下個屁股仔,搞到媽咪辛苦咗三十二個鍾之後仲要捱一刀!

睇下...幾鬼醜樣呀!
傻妹屋企真係百無...傻魚唯有打返娘家叫傻爸準備齊啲磨刀石呀,舊報紙呀,被呀之類...聽日仲要去買多個細奶撙...等傻妹夫拎完嘢返o黎之後載傻魚返娘家.今日畀兩個靚仔靚妹玩到謝晒...

熱鬧

一早畀人整醒,梳洗完之後就出去食早餐.食飽就去載住傻爸,傻媽去兜埋傻二姑媽去醫院探傻妹.去到見到親家一堆人圍住姨甥女,好熱鬧.傻爸留咗一陣就載傻媽同傻二姑媽返公司,而傻魚就留低繼續玩"女".玩咗成個鍾,傻妹夫就拉大隊去飲茶,然後載傻魚返娘家.傻妹聽晚出得院喇.好嘢~
太早起身好眼瞓...諗住小睡片刻...瞓咗一個鍾就畀姨甥仔整醒,跟住就收到契女電話.約好今晚過去睇間新屋,跟住就係咁上網...上上下網突然落大雨,係大到可以準備掛黑雨警告咁...好恐怖~因為咁周圍都大塞車.傻妹夫打o黎話趕唔切去接姨甥仔,傻爸就即刻飛車過去接.
場雨落咗好耐,老友小魔女話之前幾日都係咁...可能個天知道傻魚要返娘家,所以就連落幾日大雨降下溫,等傻魚唔使咁辛苦...呵呵~等好友律師仔o黎載傻魚去佢間新屋,啱啱一到就見到契女沖出o黎狂叫...入到屋見到細孖契仔扭計喊晒口...參觀完間屋就一齊去食晚飯.由於今日太眼瞓,所以食完飯就載傻魚返娘家...
唔得喇...傻腦個總制隨時會熄...乍乍林沖個涼瞓先...

有喜呀~

今日真係開心到暈~上個星期傻細佬話畀傻魚知應該會喺呢兩個星期發生,傻魚至知道件事...半年前傻媽去香港玩嗰陣仲講緊係"擬似",之後就冇人再通知傻魚.個個當傻魚已經收到通知咁...傻細佬仲講笑話可能喺傻魚落機嗰日,即係今日...真係畀傻細佬講中咗.
今日傻細妹o黎接機,提起件事,傻細妹話唔知個實況.傻魚即刻打畀當事人,原來己經進行中.傻魚一返到娘家,鯨吞咗一碗仔粥,然後就叫埋傻爸一齊出發.不過傻爸話唔去,咁就唯有同傻細妹兩個人去囉.去到見到傻妹攤咗喺度好辛苦咁....哈...講咗咁耐都仲未報喜添~冇錯!!!傻魚又做姨媽喇~(狂呼中~)
傻妹尋日朝早十一點見紅入院,醫生見傻妹之前嗰胎係開刀,就叫傻妹考慮開刀.但係傻妹想順產,所以就堅持唔開刀.由於上一胎係開刀生,所以今胎就唔可以催生.攤咗廿幾個鍾,條腰骨痛到死,又瞓唔到攰到極,傻妹就諗好唔好開刀早啲搞掂算喇...結果捱咗三十個鍾,啲陣痛都只係每隔五,六分鍾一次,唔夠密.傻妹終於頂唔順,同醫生講要開刀.醫生安排咗六點半做手術.見仲有成個鍾,傻魚同傻細妹即刻落一樓食啲嘢,順便畀傻妹休息下瞓下.今日唔知係咪好日,好多人生仔,搞到成七點二可以入手術室.喺七點四十二分,唔願自己出o黎o既姨甥女終於出世喇~八點鍾姑娘就推住姨甥女上三樓畀傻魚見下.傻魚即刻幫姨甥女拍第一條片.個頑皮女不停喺度玩口水,一聽到傻魚話佢肉酸就笑...好搞嘢...之後姑娘就推走姨甥女去洗白白,而傻魚同傻細妹就上六樓病房等傻妹.一上到六樓即刻打咗個電話畀傻爸報喜,然後打畀傻妹夫問佢幾點會到.跟住就兩條傻嘢喺度呆等啲姑娘推返傻妹上房.傻妹上到房冇幾耐,傻妹夫就帶住姨甥仔o黎到.呵完傻妹,就拉大隊落三樓睇姨甥女.影完一輪相,傻魚就同傻細妹走先...
尋晚冇瞓,加上喺醫院搞咗差唔多六個鍾,返到娘家已經散晒.諗住乍乍林搞埋份文件貓畀黃小萀,點知竟然上唔到網喎...整咗一輪都係唔得,唯有整完抄去傻細佬部機至貓囉...聽朝一早要起身載傻媽同傻爸去醫院探傻妹.嘩~講起就興奮!!!

空中飛人

飛喇飛喇...傻魚又飛喇...失蹤個半月,畀好多人追魂咁追...中間發生o既事,等傻魚飛返娘家抖順條氣至交代喇~o黎緊仲會報喜添o架...呵呵呵~