唔舒服

今日好唔舒服.食完個晏之後開始想反胃.之後走去拎咗幾粒提子食,食完好似好啲喎.見冇乜就出門口去銀行過數.點知出到街又好唔舒服.個腹部好似抽下抽咁痛,又好似有嘢想跌出o黎咁...總之好唔舒服.去完銀行,過唔到數,本簿仔又打完冇位再打,又搵唔到傻馬...唯有去行一百円店買少少嘢,跟住返傻家.唔知關唔關唔夠瞓o既事呢?希望聽日唔會咁喇...

確定

體溫一直都企高,個胸一直脹痛,自己都懷疑緊係唔係.上星期三手痕拎咗支驗孕棒出o黎驗,出現咗條粉紅色o既淺色線.睇返說明書,應該係早期.再等多星期,尋日又拎支驗孕棒o黎驗.今次條線係紅色.所以今日就去搵醫生,查清楚等個心定啲.戰戰兢兢入到去,醫生搞咗好耐,好似搵唔到咁...心諗唔通係炸糊?!!搞咗一輪,醫生指住舊黑色嘢話呢個就係個肧胎,四星期多大細.之後醫生又話個子宮太長,所以照得唔清楚.然後醫生話兩個星期後再o黎睇過,到時至可以斷定係唔係.21號要上機,有少少擔心...臨走醫生仲提醒話唔好亂食藥.都總算係確定咗,唔使估估下.兩個星期後去睇下有冇心跳,同埋幾多個心跳.好期待!!!龍鳯胎,會唔會o黎呀?!!呵呵~發下夢先.