呆等

近排心情大上大落。流產完之後冇想像中咁傷心，但咁樣反而仲驚！到咗最近睇親啲戲都話大肚好辛苦好難，睇到我喊晒！等緊月經，唔知幾時嚟。最好九月頭嚟，然後每個月都有。咁就可以喺十一月個月經之後做人，趕得切喺明年九月中出世。我希望一屋都係處女座！觀音大史，得唔得呀？

希望

前日洗咗一機衫，晾完乾咗收返，之後煮咗三餸一湯，食完飯熨埋啲衫，結果疲累到極點。一去廁所，又流血。尋日朝早去覆診嗰陣，面青口唇白。等咗成個鐘，驗埋尿，又卑人插一輪。醫生話一切都好好，以後唔再需要返去覆診。之後仲會間唔中出血，但都係少少。醫生又再次提醒，一定要等三次月經之後至可以再懷孕。再問醫生係乜嘢原因，醫生都係話原因不明，應該係染色體有問題。會唔會係因為中咗妊娠毒，醫生又話唔係。咁啫係冇得預防喇！卑完錢就搭的士去新宿東口問機票價錢，又起咗價！問完搭電車返屋企，順便買埋啲日用品同便當。返到屋企成個人散晒！之後開始偏頭痛。食完個飯之後頂唔順食咗兩粒特効，但個頭都仲係好痛。痛到瞓唔到！唉！希望月經快啲嚟，個個月準時嚟，然後喺十二月受孕，下年九月生對龍鳳胎！觀音大史，希望您保佑我夢想成真！多謝菩薩！

落雨

上星期五落咗成日雨，上星期六亦落咗半日雨。個天，彷彿在為我而哭泣。之後嘅半日，涼涼地幾舒服。BB睇咗場好精彩嘅煙花！星期一下午出院嗰陣，上咗的士之後落咗幾滴雨。返到屋企之後又落咗幾分鐘大雨。可能個天見我唔係好喊，所以就幫我喊。老公好錫我，叫我休息一個月。放工去買埋餸，返到嚟又要做家務又要照顧我。真係辛苦晒老公！BB，媽媽帶唔到你嚟呢個世界，真係好遺憾，雖然媽媽近排成日話你曳，又話你唔乖，仲話媽媽唔錫你，其實媽媽好愛你！希望你去咗一個好好玩，好開心嘅地方。媽媽會為你頌經。觀音大史，麻煩你幫我睇住BB。

流產

終於都完咗！今朝諗住瞓一陣，點知六點幾啱瞓著七點鍾就卑姑娘叫醒量血壓同體溫。姑娘問有冇肚痛，有冇流血。當時唔痛，只係流緊少少血。姑娘走咗之後諗住瞓返，點知就嚟科喇！突然覺得個肚裡面有舊圓嘢向體外衝出嚟，然後就啵一聲爆開嘅感覺。跟住啲血就係咁狂流。即刻撳鐘叫姑娘，話卑姑娘知好似有嘢流咗出嚟。姑娘即刻去攞塊大啲嘅姨媽巾，返到嚟見到我啲血流得好勁，即刻又跑返出去拎個成人尿片，即刻幫我除褲換。個肚開始痛。過咗一陣又感覺到有三舊嘢流咗出嚟，然後個肚就唔痛喇。換完尿片之後就一直唔敢郁，平瞓喺度。諗住終於可以瞓，點知個肚就開始痛一陣，冇嘢一陣，然後又痛一陣咁。結果係完全瞓唔到。醫生原本應該喺八點幾嚟，結果十點至蒲頭。醫生話同上級報告完，上級嘅見解都同佢一樣。個胎冇咗心跳同埋太細，加埋流咗咁多血，今次係小產。由於今日係星期日，人手唔夠，所以如果可以嘅話就等到聽日至做，除非我開始狂流血不止。下晝會嚟卑藥我食，幫我開個子宮口，然後聽朝做手術清理個子宮。我一路聽一路喊，好似卑人判咗死刑咁。之後醫生話聽朝做手術唔可以食嘢，問我輸鹽水好唔好。問我？我亂到乜都諗唔到！結果醫生叫我今日食嘢，聽日唔可以食。醫生走咗之後我係咁喊。老公過咗一陣嚟到，問點樣。話咗卑老公知，老公又話會唔會係照錯。又問醫生係咪卑咗乜藥我食，或者打咗乜針，點會咁啱會流咁多血。我話冇。講講下到咗十一點，姑娘嚟幫我換衫轉返去普通婦產房。去到婦產房安頓之後，我話要去廁所。嗰個尿片真係麻鬼煩。左手又插住支針，除同着都好辛苦。痾完尿諗住企起身，就感覺到有舊好大舊嘅嘢跌咗出嚟。即刻抹乾淨着返個尿片同褲。一望！嚇親！有舊好似胎兒嘅物體喺個廁所度！即刻走出去叫老公搵姑娘。姑娘跟咗我入廁所，我指卑姑娘睇。就咁我望咗兩眼，個胎深深咁印咗入腦。姑娘即刻叫我返床，然後見到姑娘去搵嘢裝起個胎。隔咗一陣有姑娘嚟推我去檢查。老公想跟埋嚟，但我叫老公留喺床度等我。入到去又卑人狂插一輪。之後醫生拎住個裝住個胎嘅樽仔話，嗰個係個胎兒同胎膜。照完見到個子宮乾淨晒，個胎已經完全滑晒出嚟。至於聽朝個手術，就唔需要做。由於我仲流緊血，所以要睇晏啲會唔會止血。如果仲係咁勁流就好麻煩。流少咗嘅話就可以拔走支針。一陣會開啲子宮收縮藥同抗生素卑我食。返到床話卑老公知，老公都好唔開心。之後十二點食晏，食完晏趕咗老公返去瞓陣，順便執少少嘢嚟。我都瞓咗一陣，然後兩點幾卑姑娘叫醒食藥。之後就一路眼光光，等老公嚟。四點鍾見無聊就拎支探熱針探熱，三十七度少少燒。四點九打咗個電話卑老公，提佢帶嘢，順口叫佢慢慢嚟。老公真係好聽話，六點至到。等到我條頸都長埋。老公擺陣嘅時候，姑娘送晚餐嚟。食完上咗一陣網，聽到廣播話探病時間已完，叫啲家屬朋友準備離開。我即刻叫老公等等，衝入廁所換返條底褲同瞓覺衫，然後卑啲污漕衫老公拎返去。之後拎住個尿片搵姑娘處理。之後話咗卑細妹知，然後同黃小姐傾偈。傾傾下姑娘嚟量血壓同探熱，然後問我食咗藥未。差啲唔記得添！即刻食，再繼續傾。到九點鐘熄燈，開始睇戲希望瞓到。結果瞓咗半個鐘就熱醒咗，全身不停流汗，瞓唔返添！今次真係要多謝觀音大史嘅保佑，令我逃過我最怕嘅手術一劫。希望觀音大史保佑我快啲好返，然後生返對龍鳳胎！

入院

終於都要搞到入院。前晚流完血，打卑醫院問，都打定輸數！見啲血好似冇流得咁勁，尋日就走咗去睇花火。去到行咗好耐，心諗今次衰咗喇！之後去食嘢嗰陣更加唔舒服。返到車站行返屋企途中覺得好似有舊嘢流咗出嚟，心諗死喇！冇喇！流埋出嚟喇！返到屋企去廁所嗰陣，真係有舊嘢！心裡一沉。即刻冲埋個涼，然後打去醫院。醫生聽完之後話最好去一去醫院檢查，睇下使唔使入院。去到等咗成個鍾，又卑人狂插！真係痛苦！原本醫生都諗住係流產。但再睇真啲，裡面仲有一個胎。睇得唔清楚，好似見唔心跳，但又好似見到有嘢郁。為咗再進一步檢查，結果要入院。入院要抽血，仲要係抽手指公附近，痛到飛起！抽完血支針仲要插住，要嚟之後輸盥水用。嗰個位到宜家都仲痛！之後又等咗好耐至上到病房。老公差唔多五點至返屋企瞓。一陣八點幾醫生會嚟檢查，又要卑人狂插一輪。老公會喺九點幾十點嚟！唉！又唔知要使幾多錢喇！冇喇！今次都係凶多吉少！唔制！卑返個仔我！