三月三日傻魚獨自一人先返香港工作,而今朝傻馬搭早機返香港.十二點幾傻魚興高采烈驅車去機場接傻馬,中途收到神戶同事個電話,第一句就話...
神戶同事:｢傻魚老公可能返到去喎...｣
傻魚:｢吓?點解呀?｣
神戶同事:｢傻魚冇睇新聞咩?｣
傻魚:｢冇喎...依家揸緊車去緊機場...｣
神戶同事:｢啱啱東北大地震,成田空港即時關閉.今日之內都應該唔會開返,所以傻魚老公今日應該上唔到機.｣
傻魚:｢今朝十點機都飛唔到?正話出門口之前查香港機場到逹航班時間表,見到班機準時到逹喎...幾點震呀?｣
神戶同事:｢啱啱冇幾耐之前.連東京都好震下...｣
傻魚:｢咁大鑊?!!｣
神戶同事:｢如果係今朝十點機,應該冇影響.｣
一收線就收到老爺電話,又係講返同樣嘢.收咗線又到老友打嚟問.之後神戶同事又打嚟報告實況.就咁一路揸車一路不停接電話,搞到傻魚好擔心傻馬會唔會真係上唔到機...直到見到傻馬至鬆一口氣.即刻話畀傻馬知,點知傻馬話唔記得掹熱水煲條電線...死喇!!!會唔會震跌個水煲,搞到傻家著火o架?!!上車之後就叫傻馬打畀老爺報平安.返到屋企台台電視都喺度報導緊東北大地震o既事,話嚟緊不斷會有大大小小的餘震.好嚴重o既大地震,見到心都寒晒.諗起網友甲君,即刻打個電話睇下佢哋有冇事.然後打畀傻爸報平安.
今次逃過一劫,如有神助.話說傻馬當初決定幾時返香港嗰陣係諗住聽日至飛.之後買機票時又心大心細,問傻魚好唔好請多一日假遲一日返東京.當時傻魚就話請多一日,早一日返香港.就係呢一句,傻馬就唔使經歷呢一次大地震.唔知點解,當時覺得早返香港好過遲返東京.多謝觀音娘娘的庇佑.依家好擔心傻家唔知震成乜樣...
