東京

尋日終於搬入東京間新屋...搞咗成日,走o黎走去買嘢,攰到嘔.今日同儍馬個朋友出去食晏,跟住去買咗啲日用品.行到攰攰地坐低飲杯嘢,順便上下網.唔知仲要等幾耐至可以喺屋企舒舒服服咁上網?部腦冇乜電,唔可以打咁多字.唯有打住咁多先,等遲啲至更新.

打麻雀

尋晚學人打通宵麻雀,打到個頭鬼死咁痛!頭個圈都仲有嬴...四圈之後輸一百二十蚊呀!!!係少...但都心痛o架!!!都話咗唔識打o架喇...搞到要交學費...連續幾日大出血,仲輸埋錢添...好慘呀!!!今日好鬼忙,唔打咁多字喇!聽日出發,唔知幾多日上唔到網...希望可以快啲搵到屋,快啲可以搬入去,快啲可以上網!!!

風水輪流轉

今日輪到儍魚到成床都係嘢...其實啲行李都拾得八八九九,淨返啲用緊同"暫時失蹤"o既物件.拾緊嘢點解仲咁有閒情上網?!!當然係因為阿緊張大師二號儍馬唔喺度喇!吊頸都要抖下氣o架...俾儍馬吹到人都就o黎癲...仲有三日,倒數緊.唔知搞唔搞得掂啲嘢.希望儍馬唔好又整件嘢叫儍魚搞...真係有十條命都唔夠!!!哎...都係快手啲拾埋啲嘢先...

救命呀!!!

前晚儍馬又搞到成床都係嘢...結果儍魚等到半夜三點幾至見返張床,四點幾至有得訓... 尋日晨早七點就要爬起身去兼職.全日都成條死魚咁,個頭仲好痛... 好在中間有成三個鍾休息,儍魚就同其他一齊兼職o既日本人一齊去食午餐.食食下接到儍馬o既電話...

儍馬:「做緊嘢呀?」

儍魚:「唔係呀...食緊嘢...做乜?」

儍馬:「冇呀...收到日本公司個姐姐仔隻貓仔話公司幫我哋簽租約需時十日喎...問我哋可唔可以住喺親戚度耐啲...」

儍魚:「吓?!!十日?使唔使呀?搞乜要搞咁多日呀?」

儍馬:「唔知喎...咁點算呀?」

儍魚:「乜點算呀?一係打俾儍馬姨睇下可唔可以喺佢度住幾日囉...」

儍馬:「幾日咋?!!咁跟住點呀?」

儍魚:「等儍魚返去今晚至傾喇...」儍魚個頭痛到爆...唔想再諗嘢喇!!!

儍馬:「吓?!!儍魚要成七點幾至返喎...」

儍魚心諗:救命呀!!!儍馬可唔可以自己揸一次主意,唔好下下都問儍魚喇!!!

儍魚:「咁點呀?依家就要諗掂佢?」開始有啲唔耐煩...

儍馬:「係呀...咁要覆返人o架...」

儍魚:「仲可以點啫?!!喺儍馬姨度住幾日,一搵到屋就即刻交俾公司搞租約,跟住咪搬去短期公寓度住囉...」

儍馬:「得唔得呀?」

儍魚:「咩唔得啫?!!一去到即刻四周圍去睇樓,盡量喺一個星期內搵到.跟住公司搞租約嗰陣就知道幾時可以搬入去間屋.計返搬之前十二日喺附近租短期公寓住咪得囉...就咁喇!!!有咩今晚再傾...」

儍馬:「哦...好喇...」

之後嗰半日,儍魚個頭痛變成偏頭痛...真係攞命呀!!!捱到三點幾收工,跟住急急腳去埋個銀行,然後返公司搞埋啲手尾.坐喺公司等電話嗰陣,真係唔係講笑,唔使十秒坐住都訓得著...突然諗起啲嘢,咪打俾儍馬囉...

儍魚:「唔記得叫儍馬搵儍馬姨喎...」

儍馬:「搵咗喇...儍馬姨話冇問題...提返儍魚要去買乾菜俾龍貓仔食喎...」

儍魚:「係喎...好喇...買完返屋企喇.」有少少後悔打俾儍馬...返屋企之前同朋友提起,仲俾朋友勁串!!!

朋友:「儍魚又唔係今日至識儍馬...一早就知儍馬係咁o架喇...呻都冇用...」激氣!!!

返到屋企食完晚飯上咗一陣網,個腦已經擺工.跟住見到儍馬覆貓仔喎...

儍魚: 「咦?!!仲未覆人咩?」

儍馬:「未呀...等埋儍魚返o黎先覆...」

儍魚:「嘩!!!乜儍魚咁重要o架?!!要儍魚喺度至覆得o架?!!」

儍馬:「係o架...幾重要o架...」哈!儍魚條氣即刻順晒...

死撐到十一點幾,諗住叫儍馬喂啲龍貓仔...但係一諗到儍馬會掛住同佢哋玩,又擔心儍馬會驚啲龍貓仔會餓死而將啲糧堆到成座山咁高,咪唯有死死氣爬落床喂完至爬返上床.結果搞到成十二點,終於頂唔順暈鬼咗...後來聽返儍馬講,儍馬打機打到三點,跟住三更半夜走咗去放啲龍貓仔出o黎跑.結果吵得滯俾奶奶鬧...奶奶嬲到捉晒啲龍貓仔返籠,跟住赶咗儍馬返房...

昏迷到今朝十點幾起身,急急腳出門去郵局交公司個商業登記費,跟住去茶樓攞位飲茶.等咗成個鍾至有位...即刻打俾儍馬請隻儍馬出門口...叫埋點心都仲未見儍馬現身...激死!!!食完又去幫龍貓仔入貨.返到屋企又狂拾一輪...依家又要出去同朋友食飯...真係救命呀!!!

拆屋

一早起身,仲要係難得早起身,就係咁拾係咁摷.搞完一輪,儍馬肚餓就叫儍魚煮麵食.煮完個麵行返入房一睇...嘩!!!儍魚差啲暈低呀!!!儍馬拆房呀!!!儍馬將嗰八吋厚o既大床褥棟起,跟住喺床尾拉咗個舖满幾尺厚塵o既行李箱出o黎,搞到間房灰塵迷漫.而其他原本乖乖哋留喺床尾o既雜物亦都散落一地,連落腳o既地方都冇.一食完,嘴都未抺,儍馬急急腳走入房抱起張包住儍魚嗰幾十隻大大小小陪訓啤啤熊o既被,擺出廳之後又急急腳返房吸塵,跟住用九秒九換衫出去日本領事館度拎返本護照.儍馬就係咁一陣風飄走咗,留返間亂到冇得再亂o既垃圾屋俾儍魚.好在奶奶一早出咗街咋!!!如果唔係就有排煩喇.老爺見到咁o既情境,喺儍馬出咗去之後唔夠十分鍾就無聲無息咁出埋街...儍魚一條友同啲灰塵雜物搏鬥咗個幾鍾,終於殺出條通路,唔使再用嗰半成功力都冇o既輕功出入房間喇.依家要等儍馬返o黎擺返低張床褥至可以繼續砌返間屋同間房...

後記: 諗住儍馬返到o黎就會擺返好張床.點知儍馬揭開塊床板開始拾床底啲嘢...幾經辛苦拾空o既嗰條通道,唔使一分鍾又消失咗喇!!!咁搞法,幾時至可以有返張床俾儍魚可以舒舒服服咁攤喺度上網呀?!!

餞行

今日陪儍馬同啲舊同事食飯唱K.啱啱開完個迷你演唱會,喉嚨有啲痛.鬼咩...儍馬啲舊同事都唔係去唱歌o既...佢哋係咁不停同個K場自助餐摶命,食咗個幾鍾.而儍魚就求其食啲嘢,跟住死揸住支咪,乜嘢衛籣呀,泳兒呀,祖兒呀啲新舊歌一首接一首唱足兩個鍾.都不知幾過癮呀...冇人搶咪又冇人插歌.

呢幾日都不停有呢類飯局...打邊爐,放題,唱K,燒嘢食,飲茶,等等...搞到個胃就o黎頂唔順.跟住o黎緊十日仲有日本領事館,銀行,保險公司,大小飯局,購物,剪頭髮,拾行李,入箱等等...仲未計同奶奶食飯飲茶喎...都幾頭痛...仲要不時上網睇下有冇新靚盤,要記低交俾儍馬個新同事去幫我哋約時間,到時一到東京即刻可以去睇樓.除咗呢啲,當然仲要巡下部落格,回應下,留個言...好忙呀!!!

清明拜山

儍魚見今日天氣清涼又冇太陽,所以跟儍馬上山祭祖.原本叫埋奶奶一齊去,但係奶奶話啲龍貓仔嘈到佢成晚冇得訓,所以唔去喎...咁儍魚咪由佢囉.拜完山之後成棚人去食飯,順便通知大家儍馬要去日本做嘢.嫲嫲見今日都幾齊人,就話請食飯同儍馬餞行,仲話叫埋奶奶喎.嫲嫲好少開口話叫奶奶一齊食飯,儍魚聽到嫲嫲咁講梗係第一時間打俾奶奶喇!但係奶奶佢今日竟然熄咗電話喎...結果當然係搵唔到人喇.到正話食飯嗰陣,咁啱嫲嫲坐喺儍魚隔離,唔見奶奶,嫲嫲梗係捉實儍魚o黎問喇...儍魚唔敢出聲等儍馬答.嫲嫲一聽儍馬話奶奶一早出咗街,塊面即刻黑晒...儍魚唯有繼續唔出聲...

奶奶可能係嬲咗儍魚.話說幾日前,當儍魚拎啲衫去洗嗰陣見到奶奶洗完機衫冇拎出o黎,咁儍魚就嗌儍馬幫手拎啲衫去掛起.跟住儍馬就走o黎問儍魚啲衫係咪未洗過.儍魚話啲衫係濕o既,應該係洗完o架喇...儍馬冇出聲走咗返房.跟住嗰晚奶奶如常咁隔幾分鍾就入o黎講幾句.儍馬突然間同奶奶講啲衫洗完仲有汗味.咁奶奶又例牌話儍魚買o既柔順劑唔夠香唔夠柔順.儍馬跟住就話奶奶要俾多啲皂粉去洗.奶奶話佢已經俾多咗皂粉,之後仲好負氣咁話要買返佢買開嗰隻柔順劑.儍馬又話唔關隻柔順劑事,因為儍魚洗啲衫冇汗味之餘仲好香.全程儍魚係冇答過嘴,但係奶奶越講塊面就越黑,仲係咁蔑住儍魚.跟住幾日奶奶就不停同儍魚作對.儍魚話唔俾啲龍貓仔出o黎玩,奶奶就捉佢哋出o黎玩...結果啲龍貓仔玩到癲晒,成晚係咁嘈,搞到奶奶訓唔到...呢啲咪叫自食其果囉.最搞笑係,奶奶唔敢鬧儍魚,但係喺出面就同啲朋友講話儍魚洗咗儍馬腦喎.奶奶真係好驚儍魚會搶走儍馬.奶奶仲驚儍馬會唔理佢.對於奶奶呢啲咁怪旦o既諗法,儍魚真係咁多年o黎都無所適從...今次唔知係咪奶奶有心為難儍魚,專登唔去拜山...但其實奶奶都有十幾年冇去過喇...哎...

家用

每次同朋友講起儍馬從來都唔俾家用儍魚,啲朋友就會起哄...

朋友甲:「有冇搞錯呀?!!你唔問佢要?!!」

朋友乙:「你冇做嘢都唔俾呀?點得o架?!!佢應份俾o架喎...」

朋友丙:「佢唔俾家用你,你唔嘈佢?」

朋友丁:「咁你鍾意佢啲乜呀?佢連家用都唔肯俾你喎...」(絕呀!!!)

其實有乜問題啫?唔俾咪唔俾囉...唔得o架咩?有邊條法例話老公一定要俾家用個老婆,唔俾就係犯法o架?唔明點解啲人乜都用錢去衡量?!!咁樣做人會開心啲咩?唔通因為儍馬唔肯俾家用而同儍馬離婚?!!儍魚會覺得當兩個人之間多咗個錢銀利益,段關係就會出現好多不必要o既麻煩.經濟獨立幾好呀!!!起碼嘈起上o黎儍魚都可以聲大夾惡,有起乜事都有發言權同話事權.最起碼可以唔使好似奶奶咁日日要睇人面色做人.錢啫...要使咪自己搵囉...搵唔到...到時至算囉...儍馬雖然視錢如命,但係儍馬一定唔會見死不救...冇人見到儍馬有幾鍚幾緊張儍魚.唔通儍魚又四周圍講曬命咩?!!家用啫...小事喇...