冇喇冇喇！今次真係冇喇！正話食完飯去廁所，見紅！之後都仲有少少。打咗去醫院問，護士話如果仲繼續見紅就入一入院。如果停咗，就如期4號去覆診。冇希望喇！仲諗住如果只係流少少啡，應該仲有希望。點解會咁？我做錯乜嘢，點解要咁對我？唔制呀！卑返個仔我！
好唔開心，好難過！點解呀？點解會咁？邊度出咗錯？我做錯咗啲乜？點解要咁對我？卑我順利一次得唔得？點解喎？觀音大史，點解？婆婆，你喺邊呀？我已經冇乜朋友，點解連個仔都要攞走埋？點解？我唔制呀！卑返個仔我！！！
之前仲好地地，只係大得慢。前晚流咗少少啡，諗住只係太操勞。尋日見冇再流，諗住冇事。點知尋晚出去車站接老公，去買啲嘢順便食埋晚飯，返到屋企熨埋啲衫。之後去小便又見到流啡，仲多過前晚。心知不妙，今朝走咗去睇醫生。照咗好耐，照唔到心跳，個胎仲要細過上次。真係想喊！之後轉介到大醫院照多次，個醫生又話好似見到有心跳，但個胎太細。宜家應該有十四週，但個胎得八週幾大。今次可能唔得。好灰呀！因為唔可以好肯定係冇咗心跳，所以下個星期要再去照多次。如果真係冇咗心跳，就要做人工流產。亦有可能喺下星期前會大出血，好似月經咁，咁就要即刻入院。醫生叫我準備隨時入院，嚇死我喇！BB，你好曳呀！要媽媽受苦，又嚇死媽媽！你唔乖，唔肯大！你唔要媽媽，媽媽唔鍚你喇！觀音大史，可唔可以唔好帶走BB呀？契麻麻，保佑BB健康出世，可以嗎？婆婆，你要睇住你個乖孫同曾孫呀！
話咁快就八年，今年個記念日真係好特別。過埋今年就唔再係二人世界，而係三人行。上星期六去產檢，醫生話個胎唔夠大。個胎以家應該係十二週，但就比正常細咗兩週。少少擔心！唔想諗太多，順其自然！諗諗今晚點慶祝先。最衰唔飲得酒！整乜大餐好呢？呵呵！
正話去銀行幫伸伸入錢，好感動！差啲喊咗出嚟！個嬸嬸見我排得好辛苦，主動話讓位畀我。不過見仲有幾個人就到我，所以我拒絕咗。世界上仲有好人架！
BB,媽媽好希望你是個男孩;亦希望你龍鳳胎。不過如果你是個女孩，媽媽一樣那麼愛你。媽媽會對你好嚴格。但是除了飲食和禮儀之外，媽媽不會逼你做任何事。只要你健康快樂地成長，不學壞，媽媽就心滿意足。BB,你是媽媽的心肝寶貝。你一定要健康的成長，平安的來到世上。你的傻媽媽上！
知道有咗之後，並冇如期的興奮同憂慮。到目前為止，心情都係同平時一樣。有時甚至忘記咗自己係粗身大細。依家已經好少想反胃，只係成日覺得心跳好急促。另外就係好易疲累，同行路慢咗好多。仲未同任何親戚朋友講，遲下再穩定啲至宣佈。應該會返屋企生，因為香港啲醫院太爆冇位。都好，有多啲人照顧。呵呵！
