再o黎瘋狂購物

雪櫃裡面冇肉,要去入貨喇.出去之前,吸個塵先...哎呀!吸咗隻襪入去添...一開個吸塵器,發現個紙袋已經爆到拎唔返出o黎.夾硬一拉...真係爆開咗...幾經辛苦終於扯到出o黎.之前執嘢嗰陣有執到啲新o既吸塵器紙袋,但係要用起上o黎就搵極都搵唔到.算!去一百円店買過!
去完一百円店,順路去"企鵝仔"睇煲.因為早排傻馬洗碗嗰陣鍾意插把刀落個細煲度...當然個煲係花晒喇...呢啲大理石塗層煲,一花就會致癌,要報銷.可惜喺"企鵝仔"搵唔到啱心水o既煲...睇睇下就當然會睇埋呢二啲嘢.個車仔就越堆越多嘢...見形勢不對,即刻叫傻馬o黎救架!好在傻馬正在回家途中啫...結果買咗五千幾円嘢,上倉咁...恐怖!!!
叫傻馬拎兩大袋嘢先返傻家,傻魚就去超市買肉.差唔多兩個月冇去過超市,去到又點會只買肉咁簡單?!!呢樣又想買.嗰樣又想食,結果又一大袋,洗咗三千五百円.兩日加埋,用咗萬七円...冇搞錯!傻魚o既瘋狂購物絕對唔係去買衫買鞋買手飾,而係去買廚房用具同食物.
兩個月而來第一次自己抬嚿"石頭"返傻家,所以散到謝晒.咁攰梗係唔想搞咁多嘢...好!今晚就炒粉絲!

材料有粉絲,冬菇絲,雲耳絲,肉絲,紅蘿蔔絲,生菜絲,炸豆腐皮絲.

落啲椒鹽,送入個爐度燒,方便又快捷.傻馬超愛食~

落啲肉絲同花旗參,煲埋剩返嗰半個冬瓜.半個鍾搞掂!開飯喇~
出咗兩日街,聽日要抖下喇...
同場加映: 今日的一小部份戰利品

關生,見唔見右下角嗰盒係乜呀?

傻魚啲懶惰午餐.

竟然喺"企鵝仔"見到有越南河粉喎...梗係整返幾包旁下身喇~

煩擾

由十八號開始又流啡.心諗可能上星期返工攰,所以又流啡.結果流到廿號都仲流緊.廿號去睇西醫,順便做埋個抺片.第二日開始流血.仲諗住只係因為個抹片,所以都冇諗咁多.到咗廿二號,生日兼中秋,冇再流血,只係流啡.心諗都好啲...點知廿三號又再開始流血.上次月經只係過咗十九日,應該冇咁早o黎...星期六去西醫度攞報告,得知個結果係細胞初步變異,今次出血可能係因為咁.即刻好擔心!!!上天點解要咁對我.我己經冇咗個仔,點解仲要我有病.好在醫生話上次小產係唔關事,再試都冇問題.只係要返日本做個詳細o既細胞檢驗,睇下究竟係乜嘢事.仲流緊血,唔想搞住.到咗尋日,啲血又變咗係啡.今日就完全停咗.唔通係月經?唔通係因為小產完之後啲荷爾蒙亂晒,所以咁快又o黎?希望係咁喇...希望下一次月經會唔早唔遲,準時到喇...觀音大史,你要睇住我呀!!!

瘋狂購物

傻馬兩點幾打o黎話收工,傻魚即刻換衫出門口.第一站去東急手,一邊睇廚房嘢一邊等傻馬.買咗套矽鍋鏟加掃,長透明膠箱同抹茶掃.跟住轉戰三一五円場,買咗兩個碗一個碟.
然後返傻家附近間藥房買日用品,再行過去超市買餸.入完貨途經一百円店,入去買咗包除塵紙.返傻家途中經過零食店,傻馬話買零食.
買到大包細包咁...雖然唔使傻魚拎,但係傻魚都好攰同有啲暈...所以...今晚唔搞咁多嘢...又求其炒個河粉就算...冇錯!傻魚就係一個非常求其同非常懶o既人...

材料有沙河粉,碎蛋,雲耳,紅椒,生菜,肉碎,金菇.五顏六色,幾靚...

再加多碗罐頭酸辣湯...
尋晚又開始落雨,落到正話停咗...即刻開機洗埋塊床單同被套,之後再開多一機洗淺色.晾咗出去一陣又要收返入屋,因為聽日會落雨...三機衫,都唔知晾邊好...好頭痛...雨...幾時會落完?咁濕,會唔會冇得睇紅葉o架?
同場加映: 今日一小部份戰績

血光之災

今日諗住出去買餸,但係軟皮蛇上身,死唔願郁...點知...傻馬三點幾打o黎話收工喎...咁就叫傻馬順便去超市入貨,咁傻魚咪唔使出去囉...呵呵呵~
下晝見停咗雨,乍乍林開機洗咗塊大毛被同啲枕頭套...原本諗住再開多機洗埋塊床單同被套,可惜冇晒洗衣液.冇計...聽日囉...
傻馬竟然抬咗個冬瓜仔返o黎...今個夏天一次都冇食過,今晚就整冬瓜湯飯喇!

材料有冬瓜,雞扒切粒,冬菇粒,雲耳同乾瑤柱.快靚正呀~中醫叫傻魚唔好食冬瓜,好耐食一次好喇咁...食完今次呢個冬瓜,今年應該唔會再食...

見有包即食麻婆粉絲,整埋佢!五分鍾搞掂,開得飯!
傻馬正話洗碗嗰陣唔小心跣咗把刀落地,差啲斬斷隻右腳指公.好在只係界親小小,皮外傷啫...嚇到傻魚心都離埋!!!
傻馬話聽日應該都係早收,咁啱傻魚話想去行東急手,咁就約埋一齊去.有個咕哩旁下身,唔錯喎...嘻嘻~

長命雨

場雨由尋日下午五點幾開始落到宜家都仲落緊.氣溫只係得廿度...兩個幾星期前日日三十幾度,熱死人嗰隻.聽聞前幾日開始忽然行雷閃電,跟住個氣溫就係咁跳降傘.今年個夏天太長,太熱喇!到咗九月中都仲未有入秋o既感覺.宜家就更加唔似...秋天本應比較乾燥,宜家就日日係咁落雨...好似會落到後日...傻馬係咁鬧...
今日留喺傻家休息兼執屋,執到攰就坐喺露台邊望雨.突然心血來潮,摷咗包"奶奶靚湯"o黎煲!順便煮埋餐飯...等傻馬收工返o黎就即刻開飯.

求其整咗個魚香茄子,再炒咗個白飯魚生菜.好耐冇咁煮過喇...兩餸一湯,算係咁喇...
聽日,要出去買餸喇...洗衫籃裡面嗰座垃圾山幾時至可以清?

鑊鑊新鮮鑊鑊金

一波未平，一波又起。真係禍不單行！一心諗住順手做埋個抹片求安心，點知報告結果話發現有啲細胞開始變異，要再做詳細檢查。林醫師話唔係癌細胞，好多人都有同樣情況，可以好快根治。返到日本又要去醫院做個詳細檢查。觀音大史要保佑我逢凶化吉！多謝菩薩！

攰到散

今朝神咁早就要起程去機場.尋晚又瞓得唔好,好攰呀!好耐都冇試過同傻馬一齊飛返東京,今次總算唔使孤伶伶一個人搭飛機.當然啲行李係由傻馬拎晒,幾鬼輕鬆呀!
返咗香港兩個星期,日日做大少奶唔使做.係咁食食食,想減肥都幾難...返到o黎東京,應該可以減返啲啩...
返香港前清晒個雪櫃,空冇一物.落機之後就梗係要拖埋啲行李去買餸.喺駅附近間超市竟然有油菜心喎...雖然貴咗啲,但係都二話不說買咗札.丁屎咁多要一百四十八円,喺香港應該買到四,五倍o既份量.見咁攰唔想搞咁多嘢,就"順手"買少少外賣加餸算喇...

求其整咗個清湯粉絲,加埋啲油菜心一齊煮.

外賣咗王将o既炸雞塊同招牌餃子.由於掛住執行李搞晏咗,啲餃子凍晒冇咁子味.遲啲懶煮飯o既時候應該會再返兜.
換埋啲床單,沖埋個涼,今日早啲瞓!傻馬聽日仲要返工呀,陰公...
今次帶咗啲乜返o黎?

咪就係兩喼食物囉...總共四十八公斤!勁!!!

月經

終於喺前晚見到等待已久嘅＂紅＂。初頭仲諗緊做乜又流啡。之後諗諗下，會唔會係月經？今朝終於都證實係月經。希望下次都準時嚟，排卵正常，咁就可以喺十一月頭之後受精，下年九月中生對金兔龍鳳胎！觀音大史一定要保佑我夢想成眞呀！多謝觀音大史！