攰到散

今朝神咁早就要起程去機場.尋晚又瞓得唔好,好攰呀!好耐都冇試過同傻馬一齊飛返東京,今次總算唔使孤伶伶一個人搭飛機.當然啲行李係由傻馬拎晒,幾鬼輕鬆呀!
返咗香港兩個星期,日日做大少奶唔使做.係咁食食食,想減肥都幾難...返到o黎東京,應該可以減返啲啩...
返香港前清晒個雪櫃,空冇一物.落機之後就梗係要拖埋啲行李去買餸.喺駅附近間超市竟然有油菜心喎...雖然貴咗啲,但係都二話不說買咗札.丁屎咁多要一百四十八円,喺香港應該買到四,五倍o既份量.見咁攰唔想搞咁多嘢,就"順手"買少少外賣加餸算喇...

求其整咗個清湯粉絲,加埋啲油菜心一齊煮.

外賣咗王将o既炸雞塊同招牌餃子.由於掛住執行李搞晏咗,啲餃子凍晒冇咁子味.遲啲懶煮飯o既時候應該會再返兜.
換埋啲床單,沖埋個涼,今日早啲瞓!傻馬聽日仲要返工呀,陰公...
今次帶咗啲乜返o黎?

咪就係兩喼食物囉...總共四十八公斤!勁!!!