澳門美食之燒腊

話說尋日去買豆腐花,經過一間好多人排隊o既燒腊舖.呢間燒腊舖,次次經過都見到好多人排晒長龍等買外賣.有幾次兩點幾經過見到凈係得返叉燒,傻魚想試好耐.見尋日十一點幾咁早,得閒無聊又唔使陪傻馬食晏,買完豆腐花咪去排埋一份囉.點知一排就排咗差唔多半個鍾.

就係呢間嘢.芬記只做外賣,係冇堂食o架.諗住打電話去叫外賣?得!不過要自取.間舖唔係冇地方做堂食,相信以前都有幾張餐枱畀人坐住食.可能係人手不足同埋做唔切,所以就索性唔做堂食凈做外賣.每日除咗好多街坊幫襯之外,都有好多專程由較遠o既地方o黎買外賣.兩公婆不停手係咁做...老板係咁摩打手咁切切切,斬斬斬,秤秤秤...老皮娘仲勁,摩打手係咁不停裝飯,裝湯,入袋,聽電話,落單,收錢...唔知啲人幾點開始排,凈係知道尋日十二點前冇晒燒雞同乳豬...

冇得揀咪叫咗叉燒燻蹄飯囉.本住唔浪費o既精神,傻魚梗係同老皮娘講要少飯喇.唔好諗住咁忙阿老板就會好求其咁切啲叉燒畀人.就算幾忙都好老板都會揀啲半肥瘦o既,除非個客特別話凈係要瘦或肥.叉燒,有一層叉燒汁包住啲肉,唔會太甜,好味.啲燻蹄食落唔會覺好肥膩,啲肉都好入味,正!

今朝十一點又去買豆腐花,經過芬記見唔係咁多人排隊,諗住可能仲早實有雞髀同乳豬,所以就排隊喇.傻魚前面有三個客,另外有兩個企喺另一邊等緊攞外賣.都唔使十分鍾,傻魚後面多咗五個人.越等越唔對路,另一邊打咗電話o黎買外賣o既人越來越多...奶嘢!原來今日打電話o黎嗌外賣o既人好鬼多,仲要係數量多!真係暈呀~啲阿婆o黎到又唔排隊,企喺另一邊係咁同老板娘講要乜.老板娘一路聽電話一路叫啲阿婆等下.啲阿婆咁大年紀,其他客都唔出聲讓佢哋先.今日仲勁,十一點幾己經冇燒雞同乳豬...唔制呀!!!到咗十二點,老板話唔可以再接外賣電話喇.仲有乜人喺度等緊?有差人哥哥,救護人員,醫生,幾個西裝友,幾個師奶,幾個阿叔...仲畀傻魚聽到有個電話係機場打o黎叫十幾個飯盒.又有個師奶五分鍾前打o黎嗌飯,o黎到見要等咁耐發脾氣走咗.見咁多人等咁耐都冇乍型,證明呢間嘢真係好食.所以,想試o既朋友,若果冇時間或冇耐性就唔好去喇.另外,畀港紙會找返澳紙,因為芬記係冇港紙找續o架.今日排咗差唔多四十分鍾...又係買咗同尋日一樣o既飯...聽日好唔好再早啲去呢?死心不熄,一定要買到燒雞髀同乳豬為止?!!聽日係今年喺澳門o既最後一日,聽日食唔到就要等到明年三月喇...

芬記燒腊 澳門新埗頭橫街二號C (二八九二一五三九)

澳門美食之豆腐花

喺澳門另一樣好味o既食物就係滑滑豆腐花喇.今日見天氣陰陰地,好啱傻魚呢啲唔見得光o既人喺條街度行下,所以就走咗去買豆腐花.同香港唔同o既地方就係除咗會落糖水之外,澳門啲豆腐花通常都會落埋花奶.本身都好滑o既豆腐花,落埋花奶就更加滑...心理問題?!!鍾意食豆腐花同花奶o既朋友,記住叫老板落多啲花奶呀~

呢個係之前傻魚報導過o既豆腐花.係當地一位好心叔叔介紹o架.呢間嘢唔係專門賣豆腐花,仲有其他例如車仔麵之類o既食物.不過佢o既豆腐花又真係好滑.聽聞呢間嘢係一間老字號,所以啲豆腐花都有返咁上下質素.喺大三巴附近啲巷仔度,又係啲唔識路搵唔到o既舖頭.

新榮記o架啡室 天神巷

今日去買外賣呢間,某旅遊雜誌都有介紹過.呢間係一間專做豆腐類o既舖仔,都係喺大三巴附近.佢啲豆腐每日下午兩點前就會賣晒.一間專做豆腐o既舖啲豆腐花就梗係正喇!真係滑到跣匙,一擺入口就滑走咗...又好有大豆味...勁正呀~呢間係喺十月初五街附近啲唔識路一定去唔到o既巷仔度.之前傻魚第一次去嗰陣,唔係講笑,真係搵咗成個鍾至搵到...仲要嗰日係定休...(淚~)不過食到啲咁正o既豆腐花,再搵多幾個鍾都低喇.呢間嘢每月有兩日定休,記住就唔會白行冇得食.仲有就係,想食記住下午五點前去食.佢每日收六點,好多時五點幾就賣晒.原本諗住影畀大家睇,可惜影出o黎得一團白色嘢...唯有等傻馬今晚放工返o黎影,睇下影唔影到囉...

頤德行 澳門新埗頭街十九號D地下 (八五三)二八九二零五九八 每月一號同十五號定休

澳門美食之翅

o黎到澳門又點可以唔食翅呀?傻馬唔知喺邊度問邊個得知一間專食翅o既舖仔.兩個月前去過一次,傻馬係咁猛話好味.

上次傻馬就係叫咗呢個翅.好好味~不過經過傻馬狂加浙醋胡椒粉麻油之後...就只得傻馬一個覺好味...唉~

傻魚之前食呢個.真係好好味~

今晚傻馬同傻魚都叫咗同一款.好足料o架!落少少胡椒粉同麻油,好正~依家諗起都流晒口水...

呢間舖仔就係得呢幾樣嘢食.係由兩公婆携手經營,老板主外,老板娘主內.間舖仔係喺啲唔顯眼o既巷仔度,得嗰四五張枱仔.間舖雖然不至於成日滿座,但係就冇見過冇客o既情況.落單唔會聽到老板嗌個食物名,只係會用價錢做代號.所以今次傻魚懶醒咁同老板講要兩個三十八堂食,幾鬼型呀!咔咔咔~間嘢喺大山巴附近,唔識路都幾難搵o架...鍾意食翅o既朋友,去試下喇...

添發碗仔翅美食 澳門福隆新街十八號地下 (六六五零八二一一)

等

o黎澳門咁多次,食咗咁多嘢...諗住學下人寫食評,點知...懶...結果...啲相越來越多,唔知邊間打邊間...畀多少少時間傻魚執執間屋,排返正啲相先喇...有幾間真係值得推介,等下喇...

大閘蟹

又到咗食大閘蟹o既季節.傻馬等到頸都長晒...尋晚終於食到喇~由於傻魚對蟹敏感,所以傻馬就約埋老友林生一齊去"尾森王公"食.咁傻魚食啲乜?林生叫咗幾味小菜畀傻魚食,都幾好味不過就貴咗啲...至於啲大閘蟹就...公o黎o既...少糕冇乜癮...

林生食完仲砌返隻蟹出o黎...

今日,傻馬又食神到.奶奶知傻馬鍾意食大閘蟹,所以買咗五隻返屋企自己蒸.傻馬同老爺食到津津有味呀!奶奶冇偏心,傻魚都有煲南乳茄子粉絲煲.呵呵~

束縛

近排身邊有啲唔係咁開心o既事發生咗.好友陸生家變鬧離婚,原因係陸太過份束縛.記得幾年前初識陸太嗰陣,畀陸太"訓話"話傻魚太過放縱傻馬.仲話男人唔到八十歲都唔好畀錢佢揸手...傻魚到依家都唔明陸太啲歪理.陸太有幾霸道?

1.做手腳搞大個肚迫陸生結婚(其實陸生一早打算同陸太結婚,結果畀陸太搞亂檔)

2.喺陸生公司附近買樓,迫陸生每日都要返屋企食晏,收工十五分鍾之內一定要返到屋企.

3.想同朋友出街食個飯飲杯嘢傾下偈?陸太冇份去,陸生就唔可以去.就算陸太心情靚畀陸生去都好,每十分鍾就會有個追魂電話問幾點返.

4.打電話畀陸生啲朋友叫啲朋友唔好約陸生去街,結果冇人夠膽搵陸生去玩.

5.陸生所有銀行戶口都轉做聯名戶口,仲要係冇陸太簽名拎唔到錢嗰隻.提款卡?信用卡?沒收!

6.迫陸生買保險,受益人係陸太,而陸太份保險受益人係...自己阿媽...

7.堂堂一個老細,每日陸生個銀包都係得一張廿蚊紙.幾肉酸呀~

8.一家三口出親街,銀包鎖匙陸太收,陸生身上就得一個手提電話...想買嘢?問過陸太先喇~

9.拍緊拖嗰陣陸太話好鍾意細路,以後會生幾個.依家?陸生見個仔都三歲,諗住生多個.點知陸太唔肯生之餘,驚陸生做手腳迫生仔,上個月開始仲分埋房瞓.

仔都生埋喇,仲唔知自己個老細姓乜名乜?陸生一直默默承受,因為陸生覺得陸太湊陸仔好辛苦.但係分房瞓,就真係好離譜.陸老先生仲好嘢,一早睇穿陸太啲衰嘢.喺陸生陸太註冊之前私低下搵陸太簽咗份協議書,話若果離婚陸仔跟陸生,陸太得到間屋,二百萬同一間花店...可能當初陸太覺得陸生走唔甩,所以諗都唔諗就簽咗.

使唔使做到咁呀?咁樣真係可以綁住人心?事實證明係唔得囉~邊個話結咗婚唔可以有自己o既生活空間?邊個話結咗婚就冇晒自由?吊頸都要透下氣喇!男人需要一個明白事理,善解人意o既伴侶,而唔係一個管家婆阿媽二號.傻魚始終覺得,一個男人有心去滾,就算點綁點管都冇用.如果個男人覺得自己個老婆係全世界至正嗰個,呢個男人仲會唔會去滾?好多人都好羡慕傻馬,好自由鍾意做乜同乜人去邊使幾錢都得.讚緊自己?唔係!將心比己,己所不欲勿施於人.傻魚仲喺度學緊點樣做一個稱職o既老婆.有冇人可以過幾招畀傻魚呀?始終做好自己本份係好重要.

後樓梯

今日,傻馬話留喺屋企家庭日...係傻馬同龍貓仔o既家庭樂,冇傻魚份o架...咁啱奶奶唔喺屋企冇煮飯,晚餐唯有出街食.去食飯之前,傻馬走咗去打薄,跟住順便去買日用品.買完諗住順路去停車場攞車,食完返o黎至抬啲嘢返上樓,咁咪唔使行o黎行去囉.正當行到停車場其中一個入口時,傻馬同傻魚講後樓梯上面有嘢睇.仲諗住有乜嘢咁好睇,抬頭一望...嘩~熱辣辣,香艷非常...一對小情侣情不自禁攬埋一嚿喺度打車輪.正當傻魚諗住睇下小男友有冇上下其手之際,傻馬就拉住傻魚行入停車場.跟住傻馬行經後樓梯個入口,出其不意咁好大力踼咗下度門...早知傻馬會咁做,傻魚就留喺外面睇下對小情侣個驚嚇樣喇...上咗車之後就同傻馬喺度議論紛紛...對小情侣應該唔係咁熟地頭,如果係就唔會揀嗰個位.住開嗰頭o既人一定知嗰個位外面係見得到,仲要係個咁光o既位...見唔到就奇...仲要就係,一定係冇車o既...因為停開嗰個停車場o既人都知道,入口更亭個阿姐會成日巡邏...畀阿姐見到一定趕...講講下得到個結論係個女仔係住喺度,但係個男仔唔係...因為傻馬話若果個男仔係住嗰度,應該知有邊啲位係冇人到冇人見到...咁又係喎...除非佢哋想畀人見到...

講起後樓梯,傻魚已經唔係第一次喺後樓梯見到啲咁o既場面,更香艷o既都見過...仲試過唔覺意撞破人家o既"好事"...後樓梯,有否勾起大家一啲甜蜜或恐怖回憶呢?

道別

上一次走嗰陣,因為一啲事搞到傻魚喊住離開傻家,仲連人帶行李碌咗落樓梯...上咗黃太架車一路喊到去機場,停咗半個鍾,打咗個電話畀老友,跟住講講下又開始喊.臨上機之前仲喊住打畀傻妹傻細妹同傻細佬,叫佢哋睇住傻爸,得閒多啲陪下傻爸.上到機,忍住唔喊,費時嚇親其他人嘛...返到屋企,梗係又狂喊喇...

今次...今朝,唔敢同傻爸講咁多嘢.只係叫傻爸唔好再亂食嘢同唔好食咁多.傻爸陪傻魚等咗半個鍾,幾經辛苦至等到傻細妹夫o黎載傻魚.臨走凈係講咗句:"走喇~返到屋企會打電話返o黎."跟住就頭都唔敢回咁離開傻家.不嬲都唔鍾意道別,次次都會喊到豬頭咁...今晚返到屋企,傻馬又唔喺度,實喊到好攰瞓著都似...依家...忍住忍住...唔講喇...就o黎收唔到制...

食神去咗邊?

返到傻家日日係咁食食食.平時一日兩餐o既傻魚,依家日日三四餐,肥唔死就真係祖先保佑囉...傻爸又開心到跟住係咁食食食...次次畀人鬧就搬傻魚出o黎做擋箭牌,話係傻魚鍾意食.激死~尋晚本來同傻妹兩母子跟傻細妹兩公婆去食好好味肉骨茶.點知落狗屎,傻妹臨時放飛炮話落大雨唔去喎...結果因為得三丁友加上落大雨唔想去咁遠,就退而求其次去咗附近食另一間好味肉骨茶.去到坐低叫肚冇肚,叫腸冇腸,傻細妹夫冇癮話不如去食好好味雞飯.點知去到人哋收咗舖,結果係去食田雞粥...遊咗成個鍾車河,終於有嘢落肚...傻細妹夫心有不甘,所以今晚再帶傻魚去食好好味肉骨茶.可惜正話又開始落大雨...落大雨,咁傻妹又唔會去喇...尋晚食神唔知去咗邊避雨,希望今晚會浦頭喇~

生活規律

返o黎傻家咁耐,日日都係朝早八點就畀傻爸叫醒.想話瞓晏啲都唔得...前日原本諗住陪傻爸喺傻家"攤屍",點知黃生打o黎叫傻魚一齊出街逛商場.見又可以同契仔契女去玩,咁就等黃生o黎載,去咗個新開o既大商場.不過可能仲有好多店舖未裝修完,所以冇乜嘢睇.咁啱係食晏時間,就去咗間泰國餐廳食.間泰國餐廳...一個字-差!冇小朋友o既高椅都算喇...叫咗九年o既食物等極都唔到,餓到啲小朋友呱呱叫...如果好好食都算嘞,仲要係唔好食...所以即刻寫入黑名單,唔會再去第二次.食飽行一陣就去超市買嘢畀傻馬.買完行出去一睇...落大雨~跟住見冇嘢睇就起程去第二個新商場.呢個新商場比之前嗰個大好多,仲好行好多.行咗一陣黃太話唔舒服,加上傻魚要返傻家食飯,所以就打道回府嘞.等傻妹同傻細妹返傻家食完飯,傻爸興致勃勃話開枱.幾圈之後,好在傻魚冇輸贏...

尋日一早七點幾起身,跟住叫醒傻細佬同傻細細佬,約齊傻妹一家三口同傻細妹兩公婆一齊陪傻爸傻媽去飲早茶.傻爸開心到又亂食嘢,結果畀傻細妹鬧.食完傻媽同傻妹傻細妹去逛街,傻魚就載傻爸傻細佬傻細細佬返傻家瞓覺...瞓咗個幾鍾又要起程去時代廣場會友喇~約咗老友同幾個好友去食自助餐,十大三細.三個細路梗係又通山跑喇...一路吹一路食,細聲講大聲笑,幾開心呀~話咁快又過咗幾個鍾,又要散隊下年再見...原本約咗老友直落去唱歌,點知老友病咗喉嚨痛唱唔到,結果個"演唱會"又要延期一年!唔制呀~!冇歌唱咪唯有返傻家囉...傻細妹打o黎話想返傻家,但係要搵人載.傻魚之前跟傻爸去過兩次,但係今次係入黑驚認唔到路,所以叫埋傻細佬跟車一齊去載傻細妹.食完晚餐,傻爸見夠腳又話要開枱.今次傻魚輸咗六毫子...

今朝八點幾畀傻爸叫醒,食完個早餐就跟傻爸傻媽返公司做"童工".之後又陪傻爸去送貨同交錢,然後買埋午餐返公司同傻媽一齊食.食完做埋啲手尾,點幾就全世界收工返傻家.傻爸趕住返o黎睇電視,畀傻媽話似啲師奶追電視劇.依家傻爸攤喺度睇電視,準備瞓個晏覺...今晚傻魚唔喺傻家食飯.傻細妹話帶傻魚去食好好味肉骨茶,傻魚仲約埋傻妹一齊去食.難得幾姐妹約埋一齊出去食飯~呵呵~呢幾日生活好有規律,但係返到香港應該又會打回原形...

唱歌仔

尋晚約咗黃生黃太契仔契女同一位朋友一齊去時代廣場"新路"唱歌仔.有歌仔唱最開心興奮o既就係啲細路.有自助餐,又可以食雪糕...因為傻馬今次冇跟傻魚返傻家,傻魚梗係捉住契女影張靚靚相畀傻馬睇.

睇下契女,一話影相即刻擺個靚"舖士".

又點會凈係影契女一個喎...見三姐弟坐埋一齊,即刻影返張先~大孖好慘,畀個芒果整傷咗塊面.不過就係因為咁,傻魚至認到邊個係邊個...

十點幾,傻爸打o黎問傻魚喺邊,驚傻魚唔識路返傻家...哈~唱咗三個幾鍾,四大三細清場走人...一家大細陪傻魚去攞車,話驚傻魚畀人拐咗喎...塞咗一陣車,返到傻家都成十一點幾,傻爸已經瞓咗.後日又有歌仔唱,仲有大食聚會.一次過叫晒啲朋友出o黎食飯,唔使分咁多次食~呵呵~

給最親愛的傻妹

生日快樂~

同傻妹o既關係由細到大都唔係咁好.細個傻魚係傻家女皇,有人撐腰高高在上,有乜事都冇人敢動手打...應該係話想打都打唔到...順理成章,傻妹就變咗挨打目標.所以傻妹同傻細妹都唔多同傻魚玩.離開傻家去日本讀書嗰陣,傻妹同傻爸嘈咗一輪.原因係傻妹覺得傻爸偏心,鍚傻魚多啲.所以走嗰陣傻妹冇同傻魚講過乜嘢.嫁咗之後返傻家,關係至好返.變得有講有笑,感覺幾好.加上傻爸病咗,幾姐妹突然好親密.打死不離親兄弟,血濃於水.傻家有事,幾姐弟就變得好齊心,好事~

祝傻妹青春常註,身心健康,做人成功~

另,祝網友十百年女后生日快樂~身心健康,青春常註,凡事得心應手.云云人海中識到一個同傻妹同年同月同日生o既朋友,真係一種緣份.希望新生活愉快,一家開心,甜蜜...

給最親愛的傻爸

祝傻爸: 福如東海,壽比南山

今日係傻爸o既壽辰.所以一家人去咗酒樓食晚飯.今朝一早九點鍾就載咗傻爸去接埋傻細妹去醫院覆診.傻爸做完通波仔,身體都冇乜事.只係個心臟機能低,冇機會完全復原.以後只可以繼續食藥,戒肥戒糖...傻爸,食埋今餐,以後要清清地,唔好食咁多肥膩,海鮮嘢喇.

傻細妹買咗呢個香桃蛋糕,好甜~傻爸今日好似放監咁,係咁食...今日...由傻爸喇...

回家

返咗五日兼職,雖然好攰,但係就超開心~真係平啲接咗都冇後悔,明年三月再返兜.星期六係最後一日,所以早收.執埋啲嘢,跟住啲日本人返酒店擺低行李就去咗銅鑼灣打邊爐.好在早到唔使等位,一路食一路笑,笑到嘴都歪...結果食咗兩個幾鍾頭至解散.返到屋企喉嚨痛之餘,仲成身散晒.

由於成個星期都冇乜點瞓,星期日就瞓到唔多願起身.一家人飲完茶之後就同傻馬驅車去搵黃氏二少剪頭髮.原本關生都話去,但係關生過勞病咗所以又放飛炮.剪完兩個頭都成四點鍾,乍乍林行去重慶換錢,跟住又驅車去旺角買嘢.臨返屋企之前仲一人整咗一件格仔餅,結果飽到唔想食飯.但係奶奶煮咗又點可以唔食...嗰晚係睇睇下電視瞓鬼咗,第二日起身個電視係未熄o架...都係第一次...

尋日就近近地去屋企附加商場買埋啲必需品,跟住食咗個下午茶就返屋企執行李.今次奶奶買咗好多海味送畀傻爸,加埋啲手信都佔咗四份三個行李箱.勁~執完自己嗰個又要執埋傻馬出差澳門o既行李.仲諗住早啲瞓,點知又搞到點幾兩點...

今朝遲咗,五點至起身...極速梳洗過,執埋啲日用品就飛出門口.好在趕得切...今朝又落雨...次次出門都要淋一淋...依家喺機場等緊登機.五個鍾之後就見到傻爸喇~仲有,契仔契女會o黎接機...唔知又高咗幾多,重咗幾多,抱唔抱到呢?好開心呀!娘家,傻魚返o黎喇~