上一篇網誌用咗三日半至搞掂...忙乜?啱啱搞掂公司上年度核數啲嘢,今年度又o黎喇...要摷返啲單出o黎計埋盤數交畀會計師...忙執房...屋企部腦要搬返公司,加上要摷單做數,又要執嘢返東京,間房七國咁亂...忙食飯...好多人約傻魚食飯,搞到好似傻魚今次去東京之後唔會再返香港咁...忙列緊清單買嘢返東京...在日港太們,有冇嘢想搭買呀?忙埋呢兩個星期,跟住返到東京日日喺傻家"攤屍"...呵呵~
噢...傻馬駐澳單嘢,經過傻馬"深思熟慮"之後同老細講咗唔去喇.到呢一刻為止老細都仲未有乜動作話要傻馬出差或要傻馬重新考慮,所以傻魚如期返東京.等傻魚今晚搞埋啲嘢就會出會訊搞活動喇~好嘢!!!
續上一篇...
星期三(19日),傻爸見傻魚散散地,所以叫傻魚唔使咁早去酒店接佢哋.見朝早有時間,諗住去會計師樓簽埋啲文件,可惜搵唔到個會計師,導致之後嗰日趕到隻野咁...11點半去到酒店,個個已經執完嘢準備退房.之後行過去中港城會合奶奶.好在今次奶奶冇遲到...原本諗住搭十二點半架大飛過大海,點知班船冇開喎...仲有成個鍾,咪去"兜巴星"坐下囉.傻魚求其食咗件批,見有人排隊入閘就拉大隊排埋一份.全程大飛,傻魚都半昏迷...去到澳門,傻魚善用酒店隔離啲免費賭場巴士搭去酒店.攞房嗰陣,阿哥哥仔話普通雙人客房爆晒...(吓?!!咁都得?好在畀晒錢訂咗啫...)所以免費升級去行政套房.好嘢!!!住頂樓!!!但係開心得太早.因為行政套房净返一間兩床房,所以另外兩間係大床房...噢...上房一睇,兩床房同其中一間大床房係相連o既...(中間有度門可以互通)理所當然嗰兩間房梗係傻爸同傻細佬佢哋住喇...咁傻魚同奶奶就要住...大床房!!!救命呀!!!擺低啲行李,傻魚九秒九開返部腦飛咗個電郵畀毛毛大佬.(毛毛大佬打o黎叫救命)之後拉大隊去食下午茶.食完就"打的"去觀音像.
其實由酒店行去觀音像只需十幾分鍾.但係傻魚唔想傻爸咁操勞,所以就搭的士喇.傻魚叫埋奶奶一齊過大海就係因為五個人搭唔到一架的士,有奶奶喺另一架的士就唔怕畀人呃.點知...奶奶一啲都唔醒目,同傻魚上咗同一架的士...而其他人就搭另一架的士...結果傻爸懶型咁畀咗廿蚊個司機...程的士其實係唔跳標,承惠十一蚊...唔係畀多好多,冇乜大不了,可惜傻媽就哦哦哦...搞到傻爸好唔開心.睇完影完之後諗住"打的"去大三巴.唔知係咪因為之前單"的士事件",傻爸話可以行過去唔搭喎...噢...屎!傻爸企得好硬,傻魚唔想傻爸唔開心,咪行囉...途經新葡京,休息一陣去下廁所.之後去到議事亭前地,同啲賓賓搶位坐.
休息十五分鍾,又起程行去大三巴牌坊.
齋行唔停o既話廿幾分鍾就到,行下停下就用咗差唔多成個鍾.買完手信,又返到議事亭前地坐咗半個鍾,然後去搵食.
必叫o既炸馬介休球.唔會好咸,好味!
唔記得叫乜...有豬耳o既炒雜菜.傻媽同奶奶勁讚話好味~
當然唔少得葡國雞喇...
焗葡式菠蘿飯.傻爸同傻細佬好鍾意...好味!正~仲有另一道,燒沙甸魚...好味到一上枱就畀人"分屍",完全唔記得要"留影"...哈!
覺唔覺餐飯係冇湯o架?因為食完餐飯,傻魚拉大隊去食翅!呢日,唔使講又係個個飽到上心口喇...咁飽就梗係漫步返酒店喇.傻細佬喺回程途中又停新葡京...
影相...之後返到酒店傻魚就做功課交咗上一篇,諗住沖個涼仔跟住瞓...點知...奶奶"行雷"好響,傻魚係完全瞓唔到!!!成晚畀"雷"嚇醒呀...陰公...
星期四(20日)朝早八點鬧鍾響,之後突然覺得好眼瞓,跟住九秒九暈咗...原來係奶奶醒咗,冇再"行雷"所以傻魚就咁有一個鍾瞓下.之後執埋啲嘢退房,然後行去金沙搭免費巴士去威尼斯人.呢日好大風,叫傻爸着返件外套,傻爸懶有型話唔凍,啲風好正...吹漲...去到就梗係醫肚先喇...
傻媽叫o既燒鵝瀨粉.
傻爸嗌咗個雲吞蝦子撈麵.
傻魚同奶奶叫咗水餃麵.
另外再叫個炸雲吞.傻細佬叫咗個乜乜牛肉炒麵,傻細細佬就叫咗干炒牛河...食完傻細佬同傻細細佬去周圍行下,奶奶同傻媽坐坐下又話要去周圍睇下.得返傻魚同傻爸看行李,傾心事...之後十二點半又坐免費巴士去機場,一點鍾搞埋啲登機手續,點半就入閘.之後奶奶同傻魚就飛的去港澳碼頭,坐大飛返香港.今次送機冇喊,因為傻魚要趕返香港簽文件.送傻爸入閘個感覺就好似送傻爸搭車返屋企咁...當然嗰晚搞掂晒啲嘢返到屋企,個水制又鬆弛,長流不止喇.
今次行程仲發生咗個小插曲.話說傻細佬一心諗住喺香港買相機,所以就借咗傻細妹部相機頂住頭嗰兩日先.傻細佬有問傻細妹要火牛叉電,但係傻細妹話夠電唔使叉喎...之後o黎到香港傻細佬買唔到相機,因為部機仲未出...而傻細妹部機又冇電...咁就同傻魚借相機.去到澳門好鬼開心o架...係咁狂影...可惜,去完個觀音像傻細佬話部相機冇位...好衰唔衰傻魚又唔記得帶個讀卡器o黎過相喎...想喺澳門買張大啲容量o既卡,又搵唔到啲舖喎...激到傻細佬暈咁滯...結果呢個行程,傻細佬留低咗"金句"...「想買o既相機又未出,借三家姐部相機又冇電,借大家姐部相機又冇位...搞錯呀!」最後搞到要揀啲冇咁想要o既相洗咁幾張,然後用傻魚同傻細細佬部手機影啲"交差"相,留返幾個位影"靚景".慘~
註1: 葡菜- 新帆船餐廳 (議事亭前地噴水池對面)
註2: 麵- 海王老記 (威尼斯人大運河購物中心1032號舖)
傻魚今日又過大海...呢幾日舟車勞頓,好攰...同傻爸佢哋去過邊做過乜?
星期一一早傻魚驅車去酒店,先喺附近食個早餐...原先想介紹o既嗰間茶餐廳竟然執咗喎...冇計,唯有求其搵間...唔好食...失敗!!!之後驅車去大嶼山,睇大佛.點知搵唔到條路,走咗去搭三六零.好在嗰日冇乜風啫...上到去傻魚同傻爸去寶蓮寺,而傻媽,傻細佬同傻細細佬就上大佛參觀.之後見時間都唔早,個個都有啲肚餓,諗住去食齋.但係傻細細佬死都話要去銅鑼灣食煲仔飯...咁,咪食住山水豆腐花頂住肚先囉.搭巴士落到東涌市中心都成點喇...去到銅鑼灣都差唔多兩點...乍乍林去食煲仔飯.叫咗個北菇滑雞煲仔飯同梅菜肉餅煲仔飯,另加一個香脆炸豆腐,五個人分...見唔夠時間,決定唔去金紫荊廣場.食完搭叮叮去中環,諗住搭開頂巴士去山頂纜車站.結果太耐冇去,嗰巴士站搬咗都唔知.好在搬咗去隔離街,但係等咗半個鍾都唔見架巴士.嬲嬲地直接搭巴士上山,轉到好鬼頭暈...睇咗一陣白濛濛o既景,又搭返巴士暈住落山...因為撞啱放工時間比較塞車,所以喺金鍾轉地鐵去銅鑼灣拎返架車,然後飛車入元朗.由於好塞車,所以遲咗四十分鍾到酒樓.去到已經見到嫲嫲同老爺坐咗喺度,但係就唔見奶奶...哎...阿奶奶,呢啲咁o既場面都遲到,難怪嫲嫲有嘢講...餐飯就...好難捱...因為...冇乜話題...嫲嫲不停叫傻爸下次去佢度住,又不停叫傻魚帶傻爸返屋企坐下...傻魚坐正喺嫲嫲同傻爸中間,凈係服侍兩邊都好夠忙...終於食完餐飯,傻魚乍乍林陪嫲嫲落樓搭的士,跟住攞車載傻爸一行四人返酒店.老爺同奶奶就...架車冇位,真係唔好意思,自己搭輕鐵喇...全日最攰係個晚餐...
星期二又一早車埋老爺奶奶落旺角再轉地鐵去尖沙咀飲茶.奶奶慣常地吹極都出唔到門口.結果遲咗成個鍾去酒店接傻爸,去到茶樓都成十點半...飲完茶老爺同奶奶就去買嘢,而傻魚就帶傻爸一行人去旺角行街.先去旺電睇傻細佬想買o既相機同電話,但係部相機未出而電話價錢唔啱冇買到.跟住去波鞋街,傻魚送咗一人一對波鞋畀傻細佬同傻細細佬.之後行下女人街買下手信,然後傻魚諗住帶傻細佬去拮魚蛋...但係傻媽一句話想食車仔麵,全人類唯有轉軚...講咗話唔好食咁飽,冇人聽...個個飽到上心口...之後走咗去信和,傻細細佬買咗部機話上機唔使咁悶可以打下喎.就係咁傻爸陪行行咗半日,攰到散晒.見仲有時間就載傻爸返酒店休息下,傻細細佬就喺酒店打咗一陣機.傻爸休息咗個半鍾,大隊又出發去西貢喇.約咗老爺奶奶六點半喺西頁等.之後喺全記嗌咗椒鹽瀨尿蝦,鹽水蜆,上湯龍蝦伊麵,蒜茸粉絲元貝,象拔刺身同竹笙乜乜上素...埋單二千三百幾,貴!!!食咗老爺隻車添...食完都仲未落隔,又話去滿記食糖水...都係因為傻細妹有命,要傻細佬去食楊枝金露...食完個個飽到想嘔...傻魚例牌載傻爸一行人返酒店,而老爺奶奶就要搭小巴.傻魚都唔想o架...鬼叫架車細咩...原本係諗住送完傻爸同傻媽返酒店之後就帶傻細佬佢哋去尖咀海旁睇夜景.但係返到酒店附近傻細佬話攰想瞓覺喎...咁傻魚咪打畀奶奶睇下佢哋喺邊,諗住順便車埋佢哋返屋企.可惜傻魚遲咗一分鍾,奶奶佢哋已經上咗西鐵...冇計...傻魚自己一條魚飛車返屋企.呢日攰到飛起...又要睇住傻爸,又要顧住老爺...都唔知照顧得邊個...結果少有地一點唔夠就瞓鬼咗...
待續...
聽日開始會好忙...傻爸傻媽傻細佬同傻細細佬飛o黎香港玩四日.傻魚梗係要出錢出腦出車出力喇...諗到頭都爆至搞掂個行程.鬼叫要就傻細佬,o黎得嗰幾日趕到死...
傻細佬因為貪平飛澳門,所以傻魚聽日要過大海去接佢哋.夜晚八點至飛到,返到香港酒店都要成十二點...咁又冇咗一日...接住落o黎四日o既行程係...
星期一: 茶餐廳, 大佛, 煲仔飯, 金紫荊廣場, 山頂, 元朗同親家食飯
星期二: 飲茶, 尖沙咀, 掃街, 旺角, 西貢食海鮮
星期三: 雲吞麵, 購物, 小籠包, 坐大飛過大海, 觀音像, 大三巴, 葡菜, 碗仔翅
星期四: 蝦子撈麵, 威尼斯人, 西餐, 機場
星期一晚約埋嫲嫲一齊食飯,希望嫲嫲唔好玩嘢,唔好約埋其他阿叔o黎撐場.星期二老爺奶奶會一齊玩足全日.星期三,四奶奶會同傻魚一齊去澳門.來去沖沖,希望一切順利.傻魚唔擔心奶奶講錯嘢(已報定案),反而擔心嫲嫲踩地雷.講真,兩親家第一次見面(勁搞笑囉...講都冇人信...),仲要係女家山長水遠飛過o黎,再加上之前擺酒單嘢,傻爸已經唔多老黎...希望嫲嫲唔好擺款懶大支嘢,如果唔係傻魚都唔知點算...
今次傻馬包食包玩,傻魚包住,大出血呀!!!遲啲四月頭返到東京,傻馬又話想出遊喎...睇o黎都要搵下外快至得...
兩個星期前,傻馬個老細搵傻馬傾偈.話說之前傻馬出差澳門表現超好,個客激讚.o黎緊個客又會開多一個新壇,極力向傻馬個老細要求傻馬過澳門長駐.連出差期間識o既"同事"都紛紛來電郵叫傻馬返澳門.老細見咁o既情況,就梗係即刻問傻馬制唔制喇...咁傻馬被老細咁問,又即刻打畀傻魚喇.
站在傻魚o既立場,梗係唔想傻馬咁快回流.話晒搬去東京一年都冇,全屋電器都係新o既.但係站在傻馬前途o既立場o黎睇,澳門都係一個唔錯o既發展機會.問題係,老細要傻馬最遲四月頭走...四月頭傻魚都未返東京...況且,咁短時間點搬得切啫...玩嘢咩...若然真係要搬,咁咪要傻馬自己先去澳門,而傻魚就自己一個返東京執嘢搬屋...又係搵傻魚o黎搞...傻馬自己一個去到澳門,睇完屋都係決定唔到,又係要等傻魚去到至租...咁全屋啲嘢運去邊呀?一屋新電器又要二手賣出去,然後去到澳門又要買過新o既...錢多咩?!!另外,老細開乜條件先?有乜福利先?
傻魚點睇?澳門同東京,住邊比較好?咁梗係東京好喇...澳門咁細,又冇朋友,傻馬返咗工傻魚唔知做乜好...去邊買餸又唔知...放假只可以返香港...想去日本玩又要買機票...
上個星期同傻馬傾咗好耐,結論係先同老細傾條件.升職加薪就梗o架喇...房屋津貼,搬運費用,其他津貼東京間屋早一年退租o既費用,等最好就有喇...結果老細話房屋津貼有(不過唔係全包,都好過冇),東京去澳門搬運費用同退租費用公司全包...咁...點?傻馬其實想留喺東京耐啲...諗住推老細,話長駐就下次先(個客遲啲又會開第三個壇),若有需要可以好似上次咁出住差直到老細請到人為止...
今日傻馬收到老細封電郵,畀咗三個選擇傻馬...咁點呀?出差?搬?留?早少少話畀傻魚知好喎...若然係出差o既話,傻魚就唔賣架車住,兼唔返東京住...(玩咩...又一條魚吽幾個月...會死人o架嘛....)搬,唔使賣車,但係傻魚要一條魚喺東京執兩個月...留,就簡單好多喇...賣車然後如期返東京...
依家傻魚o既前途一片黑暗...賞花會...都唔知搞唔搞好...
由於記錯咗開工o既日子,成日以為今日至開工,前日瞓咗兩個晏覺,搞到前晚完全瞓唔到...死得喇...尋日咪成隻嘢咁開工,遊魂遊到上太空...
今次呢間公司係第一次做,以前都有接觸過,感覺一般唔算太好.尋日開工,感覺依然唔係太好.呢間公司仲要壓傻魚價,又冇講明每日工作幾小時.尋日仲無啦啦問傻魚邊度有布賣,如果近o既話想傻魚去買布...頂!!!聽聞傻魚唔係做打雜,凈係做翻譯咋喎...見冇客,即刻話要去搵朋友問下邊度有布賣,走咗去搵網友新婚魚吹下水.講起傻魚今次畀人壓價好慘,但係又應承咗費時推人...網友新婚魚即刻話傻魚成日都係咁o架喇...又係喎...上次太子女單嘢都係咁...仲有以前無數次o既畀人搵笨事件...又真係幾多下喎...哈...老毛病,難醫也!好辛苦捱到六點半收工,諗住走得...點知有人叫傻魚將某啲貨入袋喎...入完之後,即刻乍乍林話走先,然後去搵關生.等埋關生存埋啲貨,離開會展都成八點二...關生星期日打波扭親右腳,星期一睇完鉄打,星期二就開展企成日...真係慘~見關生咁,就下關生,返元朗食飯.食食下關生話要打畀傻馬,引誘下傻馬...點知傻馬咁啱辦大事,然後沖涼,結果打咗三次都冇人接...關生即刻話:「咦?!!唔通傻馬攬緊女唔得閒聽電話?」傻魚即刻答:「係就好喇...不過至緊要攬個識煮飯會執屋o既...咁就唔使愁喇~」哈!食完搭緊輕鐵嗰陣收到傻馬個電話喎...又驚又喜呀!仲諗住快啲返屋企同傻馬"屎皆畀"o架嘛...傾咗兩句就收咗線,返到屋企即刻"屎"一"屎"...尋晚勁攰,又暈車喎...十二點幾就暈鬼咗...
今朝七點起身,九點二到灣仔,走咗去整護照.諗住十五分鍾搞得掂o架嘛...點知啲人係咁磨爛席,結果用咗半個鍾...返到會場遲到兩分鍾,衰咗...今日都好難捱...發現呢間公司啲人有啲人事問題,好複雜...諗住捱到六點半可以走人,點知條友又話要傻魚幫手執埋貨喎...搞錯呀!!!即刻問另一個較熟o既,究竟傻魚係返幾個鍾o架?阿茂利竟敢答唔知喎...#$%^$X 執完七點鍾,即閃!聽日問清楚至得...又走咗去等關生存埋貨,一齊去尖咀...行完"思思縮縮",關生買咗好多糖畀未來關太食,又介紹兩隻柚子酒畀傻魚...之後食咗個拉麵,跟住一齊搭西鐵走人...返到屋企都十點半喇...當然係第一時間同傻馬"屎"下喇...好攰呀!!!九月都應該唔會再同呢間做...唉...
閉關三日,終於練成神功,可以出關喇~去到車房,整車師父阿財哥一見到傻魚第一句就話:「傻魚小姐,你今次好無辜,真係無妄之災呀!」細問之下,原來架車搞成咁係因為上次整車嗰陣,有人凈係用咗啲薄o既伸縮膠帶包住啲電線o既接駁位,但係就冇再額外包多一層厚啲o既防熱膠帶,就咁又用啲伸縮膠帶札埋一堆...當啲伸縮膠帶遇熱嗰陣會溶溶地,導致啲電線黐埋一堆,啲電亂咁通,撞到七彩...結果搞到塊電腦板同電箱裏面其中一嚿嘢都燒埋...阿財哥用咗一整日時間至搵到個問題所在,差啲畀架車玩死...呢個整車師父好好心機,又好人,順手幫傻魚搞埋啲老化咗o既喉,費用全免...啲喉...之後仲好細心咁教傻魚要注意啲乜同埋有乜係遲啲需要換...呢千八蚊,傻魚畀得心甘命低.上次換一件嘢都千六,加埋拖車都差唔多千九...今次換三件嘢,包拖車,仲送幾條喉喎...完全可以理解點解佢唔做街客都唔怕冇客.
返屋企途中諗起已經係三月,唔記得交停車場費添...今晚奶奶又有飯局,老爺又去咗旅行...去市中心行轉先...先去銀行,再去超市睇下今晚食乜好...買咗盒豆卜釀日式年糕同雞扒,跟住就返屋企...太多人喇~頂唔順呀!
返到屋企無聊諗住睇電視,點知就出事喇...電視咁啱直播緊肥肥追思會...見到好多人喊...即刻o黎料,完全收唔到水制...睇完三色台直播,轉過去隔離台,重播緊...結果一直黐住個電視,喊咗四個幾鍾...唔知點解...喊到口又乾,鼻又塞,好辛苦...喊完好鬼肚餓...
尋日試咗個濃縮雞湯,今日試個濃縮魚湯...魚湯好鮮甜,唔怪得知四周圍都斷貨喇...下次見到要即刻買返幾盒至得...原本諗住落埋啲米粉,後來覺得好似好多咁,咪放咗三個豆卜年糕囉...其實兩個都夠晒,三個多得滯,好飽...
懶整薄嚿雞扒,一時間唔記得蒜鹽易燶喎...好在發現得早,冇燶到...塊皮煎到好鬼脆,好好味~仲有一塊雞扒同五個豆卜年糕,留返畀奶奶整...咔咔咔咔~
後記:喊完個人舒服咗啲,但係好似唔多夠候...橫掂冇人喺屋企,整多個小型演唱會~唱完好好多喇...搵日整個大型演唱會至得!
返咗香港成個月,一餐飯都冇煮過...做少奶奶,想食乜開句聲就有"專人"煮埋畀傻魚食,再唔係就有"專人"買畀傻魚食...幾鬼幸福呀!!!
今日奶奶有飯局,老爺又出咗街,傻魚仍然閉關中...晚餐食乜好?外賣?加咗價,唔多想叫外賣...諗起之前喺成田空港買o既...
奶奶唔喺度,自己煮囉.唔多識用奶奶個新飯煲仔,幾驚落唔夠水呀...好在都冇事,唔係生飯...
超級好味~
喺雪櫃見到包豆苗,擺咗兩三日...又見到有啲菇菇喎...諗起奶奶之前極力推介"加落"新出o既超濃縮雞湯...
傻魚食得清淡,唔使落鹽都好夠味,食完又唔會口乾...唔錯唔錯~好似仲有豬骨湯同魚湯,下次試下先.下個月返東京前入定貨都好喎...呵呵~
またいつか楽しい食事しましょう～
