懶有型

續上一篇...

星期三(19日),傻爸見傻魚散散地,所以叫傻魚唔使咁早去酒店接佢哋.見朝早有時間,諗住去會計師樓簽埋啲文件,可惜搵唔到個會計師,導致之後嗰日趕到隻野咁...11點半去到酒店,個個已經執完嘢準備退房.之後行過去中港城會合奶奶.好在今次奶奶冇遲到...原本諗住搭十二點半架大飛過大海,點知班船冇開喎...仲有成個鍾,咪去"兜巴星"坐下囉.傻魚求其食咗件批,見有人排隊入閘就拉大隊排埋一份.全程大飛,傻魚都半昏迷...去到澳門,傻魚善用酒店隔離啲免費賭場巴士搭去酒店.攞房嗰陣,阿哥哥仔話普通雙人客房爆晒...(吓?!!咁都得?好在畀晒錢訂咗啫...)所以免費升級去行政套房.好嘢!!!住頂樓!!!但係開心得太早.因為行政套房净返一間兩床房,所以另外兩間係大床房...噢...上房一睇,兩床房同其中一間大床房係相連o既...(中間有度門可以互通)理所當然嗰兩間房梗係傻爸同傻細佬佢哋住喇...咁傻魚同奶奶就要住...大床房!!!救命呀!!!擺低啲行李,傻魚九秒九開返部腦飛咗個電郵畀毛毛大佬.(毛毛大佬打o黎叫救命)之後拉大隊去食下午茶.食完就"打的"去觀音像.

其實由酒店行去觀音像只需十幾分鍾.但係傻魚唔想傻爸咁操勞,所以就搭的士喇.傻魚叫埋奶奶一齊過大海就係因為五個人搭唔到一架的士,有奶奶喺另一架的士就唔怕畀人呃.點知...奶奶一啲都唔醒目,同傻魚上咗同一架的士...而其他人就搭另一架的士...結果傻爸懶型咁畀咗廿蚊個司機...程的士其實係唔跳標,承惠十一蚊...唔係畀多好多,冇乜大不了,可惜傻媽就哦哦哦...搞到傻爸好唔開心.睇完影完之後諗住"打的"去大三巴.唔知係咪因為之前單"的士事件",傻爸話可以行過去唔搭喎...噢...屎!傻爸企得好硬,傻魚唔想傻爸唔開心,咪行囉...途經新葡京,休息一陣去下廁所.之後去到議事亭前地,同啲賓賓搶位坐.

休息十五分鍾,又起程行去大三巴牌坊.

齋行唔停o既話廿幾分鍾就到,行下停下就用咗差唔多成個鍾.買完手信,又返到議事亭前地坐咗半個鍾,然後去搵食.

必叫o既炸馬介休球.唔會好咸,好味!

唔記得叫乜...有豬耳o既炒雜菜.傻媽同奶奶勁讚話好味~

當然唔少得葡國雞喇...

焗葡式菠蘿飯.傻爸同傻細佬好鍾意...好味!正~仲有另一道,燒沙甸魚...好味到一上枱就畀人"分屍",完全唔記得要"留影"...哈!

覺唔覺餐飯係冇湯o架?因為食完餐飯,傻魚拉大隊去食翅!呢日,唔使講又係個個飽到上心口喇...咁飽就梗係漫步返酒店喇.傻細佬喺回程途中又停新葡京...

影相...之後返到酒店傻魚就做功課交咗上一篇,諗住沖個涼仔跟住瞓...點知...奶奶"行雷"好響,傻魚係完全瞓唔到!!!成晚畀"雷"嚇醒呀...陰公...

星期四(20日)朝早八點鬧鍾響,之後突然覺得好眼瞓,跟住九秒九暈咗...原來係奶奶醒咗,冇再"行雷"所以傻魚就咁有一個鍾瞓下.之後執埋啲嘢退房,然後行去金沙搭免費巴士去威尼斯人.呢日好大風,叫傻爸着返件外套,傻爸懶有型話唔凍,啲風好正...吹漲...去到就梗係醫肚先喇...

傻媽叫o既燒鵝瀨粉.

傻爸嗌咗個雲吞蝦子撈麵.

傻魚同奶奶叫咗水餃麵.

另外再叫個炸雲吞.傻細佬叫咗個乜乜牛肉炒麵,傻細細佬就叫咗干炒牛河...食完傻細佬同傻細細佬去周圍行下,奶奶同傻媽坐坐下又話要去周圍睇下.得返傻魚同傻爸看行李,傾心事...之後十二點半又坐免費巴士去機場,一點鍾搞埋啲登機手續,點半就入閘.之後奶奶同傻魚就飛的去港澳碼頭,坐大飛返香港.今次送機冇喊,因為傻魚要趕返香港簽文件.送傻爸入閘個感覺就好似送傻爸搭車返屋企咁...當然嗰晚搞掂晒啲嘢返到屋企,個水制又鬆弛,長流不止喇.

今次行程仲發生咗個小插曲.話說傻細佬一心諗住喺香港買相機,所以就借咗傻細妹部相機頂住頭嗰兩日先.傻細佬有問傻細妹要火牛叉電,但係傻細妹話夠電唔使叉喎...之後o黎到香港傻細佬買唔到相機,因為部機仲未出...而傻細妹部機又冇電...咁就同傻魚借相機.去到澳門好鬼開心o架...係咁狂影...可惜,去完個觀音像傻細佬話部相機冇位...好衰唔衰傻魚又唔記得帶個讀卡器o黎過相喎...想喺澳門買張大啲容量o既卡,又搵唔到啲舖喎...激到傻細佬暈咁滯...結果呢個行程,傻細佬留低咗"金句"...「想買o既相機又未出,借三家姐部相機又冇電,借大家姐部相機又冇位...搞錯呀!」最後搞到要揀啲冇咁想要o既相洗咁幾張,然後用傻魚同傻細細佬部手機影啲"交差"相,留返幾個位影"靚景".慘~

註1: 葡菜- 新帆船餐廳 (議事亭前地噴水池對面)

註2: 麵- 海王老記 (威尼斯人大運河購物中心1032號舖)