食到九點半返房執埋啲嘢,十點前退房.
擺咗啲行李喺酒店就行出去...嘩~落"大"雪呀...
係好大粒o既雪...嘻嘻~傻魚超級興奮呀!
傻馬話想去影下架輕鐵,但係就搵唔到.
後來發現喺駅o既另一邊,又搵唔到點穿過去喎.
傻魚就拎張飛出o黎話入閘行過對面囉,橫掂張飛係任搭唔使畀錢o既...就咁嘥咗半個鍾.
傻馬心思思想搭架輕鐡,但係經o既地方又冇嘢睇,結果都係打消咗個念頭.
又入閘穿返過去,見冇乜地方去,就一路玩雪一路影雪一路行返酒店拎返嚿行李.
啲雪越落越勁,傻魚對波鞋開始入水添...點算?
拎完行李返到駅,傻魚想早啲入閘等車;但係傻馬話個月台度凍,想再玩下雪,然後留喺大堂暖多陣.就係因為咁,趕唔切搭十一點十六分o既普通去高岡.下一班普通要等到十一點五十六分至有,傻馬勁唔開心.傻魚梗係唔出聲,費時火上加油喇.望下個時刻表...咦?!!廿三分有班特急喎...點解唔見o既?唔通又取消咗?傻馬勁唔"老黎"...企咗一陣聽到廣播話班特急遲廿四分鍾到...
原來係因為落雪遲咗.
再等多陣就見到架特急,仲要自由席係有位坐.好嘢!!!
一個站好快到.
十二點去到酒店擺低嚿行李,去埋個廁所又起行喇.
影下路面電車,影下雪景,然後搭十二點四十八分架電車去氷見.
氷見有乜睇?
睇架電車就知喇!氷見係忍者小靈精作者成長o既地方.
去到啲雪越落越凶,越落越密.對波鞋濕晒,對腳好凍呀!!!
行行下見到有間賣雪鞋o既舖,即刻入去平平地買返對先.叫傻馬買,傻馬話唔使喎...哼!講咗兩次唔聽,傻魚咪費時再嘥口水囉.
再行行下,傻馬問傻魚坐唔坐低食嘢,傻魚話有飯團唔食喇.再行下傻馬又再問...其實係傻馬自己想坐低暖下...咁講咪得囉,問乜鬼啫?!!然後傻馬話自己對鞋都濕晒喎...係咪呢?!!都叫咗傻馬買對雪鞋o架喇...又唔聽...聽日啲雪仲大呀!咁點搞呀?!!
行行下見到有間拉麵店,入去食碗麵暖下先.傻馬一坐低就除咗對鞋出o黎暖下對腳,傻魚就話一陣行返轉頭嗰陣去返同一間鞋舖買返對雪鞋.傻馬今次冇出聲話唔使喇...食食下傻馬話有少少唔舒服喎...弊喇!唔通係凍親?!!再問清楚邊度唔舒服,傻馬話周身骨痛.可能係個背囊太重...希望喇...
抖咗大半個鍾,又係時候繼續行喇.
好在已經行到尾段...
可以返轉頭.終於見到間鞋舖,好在仲未收工.平平地買咗對畀傻馬,即刻行到好似曉飛咁呀!起碼唔使狂望住個地下o黎行路,又唔使見水就"丁"起隻腳.
返到駅五點鍾,個天已經黑晒.再影下合照,玩下雪之後就入去待合室暖下.
五點五十九分準時開車,返到高岡六點七倒...
喺駅附近影下相...
咦?!!七點?要去酒店攞房喎...落咗七點攞房,費時遲咗畀人拎咗間禁煙房喇.好在間酒店夠近啫.
攞完房擺啲行李入房,再拎啲濕波鞋出o黎吹下.
因為仲未肚餓,夜啲又唔想落街凍冰冰咁去搵嘢食,所以又落樓去搵便利店.
買咗便当同聽朝o既早餐,一路玩雪一路行返酒店.
返到入房,傻馬話個頭興興地...咁大獲?!!又好似真係喎...乍乍林整條凍毛巾畀傻馬敷下個頭,跟住摷盒特效"逼你痛"出o黎望下...退燒得喎,即畀兩粒傻馬食.然後叫傻馬食埋個便当去浸個熱水浴出下汗.傻馬沖完涼出o黎話好熱,傻魚突然諗起有帶體溫計(唔好問點解),摷返出o黎幫傻馬量下體溫先.三十七點五度...希望聽朝瞓醒冇時喇...
傻魚同傻馬就過緊個"白色"新年.喺度同大家講聲:
二零一零年 新年快樂~
