噢聖誕節~♪

一早起身就不停諗今晚要整乜,諗到個頭都爆埋...手痕撳下個電視搖控,等個腦放鬆下再諗過.咁啱見到電視請咗啲料理猛人上去介紹幾款聖誕餐,即刻沖埋去貼住部電視.好喇...唔使再諗喇!就整佢喇...
見時候都唔早,雪起支紅酒香檳之後,又係時候驅車去入貨.去到超市見到好多人一袋二袋上倉咁...傻魚梗係去"掃"埋一份喇.買咗要用o既食材,買埋雞扒...噢...冇靚牛扒添...要過去"牛牛"睇下有冇,不過都係買多塊雞扒穩陣啲.唔覺唔覺咁就買咗四千幾円.驅車去牛牛,買咗四點四牛奶同紅黃燈籠椒...睇咗好耐都係冇靚牛扒...唔想飛車去西口,今晚傻馬食雞扒算喇.
返到傻家休息下,攤下...六點半開工,諗住八點鍾食飯.計算錯誤,加上傻馬返到o黎搞搞震冇幫襯,整完坐低食嗰陣已經係九點半.
傻馬仲唔捨得食,拎住個"單眼仔"不停咁影啲食物.傻魚已經餓到扁,冇力睬傻馬,拎起碗薯蓉係咁食.

呢個就係用咗三個鍾整o既聖誕大餐喇~

就係呢個薯蓉搞到傻魚頭頂出煙.傻魚諗緊買唔買攪果汁機,咁就唔使"壓"到成隻嘢咁...佢原本係薯仔湯,擺咗一陣變咗薯蓉.哈哈~

個意大利沙律醬酸酸地,好開胃~

呢個忌廉蝦意粉就係電視介紹o既...人哋係用蟹,但係傻魚唔食得蟹咪轉咗用蝦囉.個汁好鬼正!正到差啲連隻碟都想食埋呀~

呢個雞都係電視介紹o既...個汁原本係要落山葵,但係傻魚唔鍾意食,所以冇落.下次試下落啲柚子胡椒,可能都唔錯.

傻馬話唔多鍾意個白汁,要求傻魚轉黑椒汁.傻馬望住棵薯蓉聖誕樹,話得意唔捨得食...

呢支係上星期六去"企鵝仔"敗家嗰陣買o既甘口紅酒香檳,九百八十円.甘口啱晒傻馬飲.點知傻馬飲咗一杯半,跟住就係咁話個頭好重好辛苦.結果傻魚就飲咗四杯半...同傻馬飲酒真係好搵笨...原先諗住就傻馬個牛扒,所以揀咗紅酒香檳.點知買唔到靚牛扒...其實呢一餐應該配返支白酒香檳.可惜一時唔記得去買返支...有點美中不足...
食完好緊要飽...冇位擺個聖誕蛋糕入去,唯有塞返入雪櫃留待明天至食.唔知係咪飲咗酒o既關係,現在覺得好開心.
在此祝大家:

聖誕節快樂~