第四飛

首先,要同各位上過o黎同留過言o既網友朋友講聲對唔住!傻魚早排有啲事,所以冇上同冇更新個部落格.真係非常抱歉,冇即時回覆各位o既回應.希望各位大人有大量,唔好怪傻魚.至於係乜事,遲啲傻魚會開篇網誌交代.
今朝傻魚搭零晨點幾機飛返東京喇~今次已經係今年第四次飛,飛到個人好攰呀!班機仲要因為遲到,所以遲咗大半個鍾至起飛.好在都準時到羽田空港...係!冇錯!傻魚今次都係飛羽田...羽田實在太方便喇~
講返張機票先...呢期啲機票真係好平.一個星期機票,飛成田同羽田都係二千一百蚊.加埋啲機場稅之類都係二千六百蚊都唔使.既然飛成田同羽田都係同價,咁就梗係揀羽田喇.今次唔要"有胸",搭"揸佬"...今次都係黃氏三少揸車載傻魚去機場,唔同o既係今次多咗黃氏二少同女友同行.阿拖友們諗住去機場食嘢,點知因為太夜乜都冇得食,唯有山長水遠去到"雞場"食夜粥...搞到傻魚非常唔好意思添...
今朝六點半到,七點鍾離開空港,八點鍾返到傻家...打畀傻馬諗住叫傻馬出去駅接傻魚,點知傻馬話:「吓?!!咁咪好攰囉...」算!!!自己慢慢抬囉!啍!返到樓下叫傻魚馬落o黎抬啲行李上樓,跟位傻馬返工之後傻魚洗咗一機衫,然後瞓咗四個鍾...瞓醒執下嘢,洗下廁所,然後驅車去入貨...好耐冇驅車,迎面吹o黎o既冷風真係舒服.好耐冇入貨,去到超市都唔知買乜好...求其買啲嘢,買嚿瘦肉就算...完全諗唔到要煮乜好...

傻馬咁耐冇啖好食,梗係要煲返煲湯喇...然後就係清舊貨...傻馬食咗好耐都仲有o既泡菜,諗咗一陣,切咗啲瘦肉同炸豆腐一齊炒.水菜...求其切啲鮮冬菇,蒟蒻,加大豆芽炒埋一堆...個蜆...真係好"清湯"...好在夠鮮啫...嘆咗咁耐,又係時候要做返"阿四"喇...
後記:今次返到傻家,見到間屋都算整齊同乾淨.真係好過上次好多...不過啲嘢就多咗好多,要諗下擺邊好...個頭好痛呀!!!