之前篇「以為」出街之後,好多謝大家o既安慰同關心.傻魚o既心情已經平復返.係時候客觀交代一下件事讓大家評一評理.
與朋友甲係喺某朋友個聚會度相識.之後都有見過幾次面同食過幾次飯.對傻魚o黎講,朋友甲係一個朋友.朋友甲平時好玩得,成日講笑"潤"人.朋友甲識少少日文,工作上亦需要用日文.所以朋友甲經常搵傻魚問日文.試過有幾次朋友甲因為日文溝通上出咗問題而做錯嘢得罪咗個客,搵傻魚幫手補鑊.每次傻魚都有幫.
上星期咁啱喺街度撞到傾咗幾句.朋友甲又呻做錯嘢畀個日本客鬧,所以好嬲.傻魚開玩笑講咗句: 「惱羞成怒呀?」朋友即黑面話有事走先.之後一個鍾都冇,傻魚收到個電話.一接就畀人鬧...
乙: 「你係咪白痴o黎o架?」
傻魚: 「吓?你搵邊位呀?」
乙:「我搵傻魚呀!你搞到甲喊晒呀~乜你阿媽冇教你講嘢要經大腦o既咩?」
傻魚:「(興興地)請問你係邊位呀?傻魚同朋友甲講乜關你乜事...」
乙:「你理得我係邊個呀...甲話同你唔熟,你唔係佢朋友,唔該你唔好再黐住甲喺度認親認戚...」
傻魚:「小姐,你講完未呀?傻魚唔識你,冇嘢同你講...係咁喇~」
氣沖沖收咗線之後即打畀朋友甲,但係朋友甲冇接飛留言.傻魚冷靜諗一諗,可能又衰直腸直肚,講錯嘢激嬲朋友甲.諗住小事化無,所以留咗個短訊畀朋友甲: 「正話對唔住呀!講笑咋.冇心o架~p/s正話有位好似係你朋友打o黎,佢係咪打錯電話呀?」畀埋梯級朋友甲落台...
十五分鍾之後收到朋友甲個短訊: 「你好幼稚好無聊」
傻魚做錯乜呀?講錯嘢都唔使咁大反應o架...搵朋友甲講清楚?仲有乜好講?!!尋晚仲收到某朋友打o黎問傻魚做乜無端端鬧朋友甲...聽完好唔開心...傻魚同某朋友講: 「如果傻魚話冇,你信唔信呀?先入為主覺得傻魚會咁做o既話,傻魚再講乜都冇用.你唔好插手,唔好幫傻魚講好說話,傻魚唔想你難做.」傻魚唔想解釋,免得愈描愈黑.好在同某朋友都識咗幾年,仲係有偈傾啱咀型嗰隻.講埋今次唔會再講呢件事.如果朋友甲有事再搵傻魚幫手,咪當冇事發生過囉...傻魚唔會主動搵朋友甲,免得又畀人話認親認戚喇...
今朝好早起身返兼職,做到(應該係話企到)七點收工,成個人散晒.原本約咗關生同黃氏三少打邊爐,可惜關生要返屋企做節,而黃氏三少要開工,凈低傻馬同傻魚兩個烚下烚下...諗住打風冇月賞,點知烚完返到屋企樓下見到個大月亮,開心到即刻返上樓寫完篇網誌,換上夜行衣驅車去行沙灘.
擺低架車之後,喺麥記一人買咗一個新地筒,一路食一路行去沙灘.諗住咁夜可能會少啲人,點知去到一睇...嘩~大朋友帶咗小朋友,一雙一對,同學會...總之好多人喇~成個沙灘好多用螢光捧圍住o既"地盤",大人細路一齊點蠟燭玩燈籠.有好多人甚至喺自己個"地盤"挖幾個洞,插滿蠟燭,好靚...更有人挖咗個大洞,用o黎燒嘢起咗個大火...當然唔少得月餅鐡盒煲蠟...好危險~
同傻馬喺沙灘度漫步,見到有好多人攤咗喺度賞月,亦有情侣趁"月白風低",情到濃時,旁若無人摟作一團打...車輪...更有幾班同學仔游夜水...小朋友難得唔使早訓,拎住個燈籠四周圍跑,好開心...
抬頭一望,見個月亮畀個彩虹圈圍住,好靚~傻馬為咗影低呢個靚景畀傻魚交功課,走咗幾次位...奈何部相機唔夠勁,影極都影唔到個彩虹圈...呢張算最清o架喇...早知問老爺借部超級相機喇...
由於傻魚聽朝要早起返工,行咗個幾鍾就打道回府喇.交完功課,係時候訓喇...聽日唔知醒就弊喇~
尋日朝早返到中港城食咗個海南雞飯之後就返屋企諗住訓晏覺.醒起關生喺西班牙返o黎,咪打電話畀關生睇下使唔使去機場接關生.打咗兩次都搵唔到關生,仲諗住關生未返到.到咗四點幾,再打多次畀關生,關生話傻魚好勁,關生一開電話傻魚就打去.原來關生好黑仔,喺西班牙唔見咗個銀包.雖然個銀包冇乜錢,但係就唔見晒所有信用卡,銀行提款卡,航空公司金卡,身分證,車牌等等...所以一落機就走咗去整身分證,電話卡仔,銀行提款卡,信用卡等...之後傻魚去關生屋企,送咗個喺日本買o既銀包畀關生,跟住等埋傻馬喺澳門返o黎一齊去食飯.關生不停咁講自己好黑仔,又話自己畀人埋單好慘...關生,結婚生仔好慘咩?牛唔飲水又點撳得牛頭低?!!結婚,關生想o既...生仔就...如果關生真係唔想生,未來關太點迫都冇用...所以,唔好諗咁多喇關生!
今日...應該好開心至啱...可惜食下午茶"大餐"嗰陣聽完好友個電話,心情變得極之惡劣.一陣同傻馬約埋幾個朋友去某沙灘食"中秋燭光晚餐".希望心情會好返啲喇...
[溫馨提示: 此乃私人網誌.不需用私人回應,但請大家不要用"你奶奶"三字.多謝~]
今日起身原本好鬼開心o架.雖然訓晏咗飲唔到茶,但係傻馬話同傻魚出街食"大餐"...幾開心呀...直到同好友通完電話之後...
有聽書o既朋友應該都知,傻魚呢位好友啱喪父.而傻魚係唯一一個知道o既外人.由於傻魚要過大海,所以就話咗畀奶奶知.奶奶同伯母以前係好朋友,成日一齊唱粵曲.發生啲咁o既事,傻魚見自己唔喺香港,諗住叫奶奶去睇下有乜可以幫手同埋陪下伯母.傻魚以為奶奶應該都識分輕重,唔會周圍講.傻魚真係高估咗奶奶o既人格.奶奶唔知講咗畀邊個師奶知,搞到屋企附近啲人都知.伯母一出街就畀人捉住o黎問,搞到好唔開心.好友仲講咗句「你奶奶把口真係勁,一陣就全港九新界都知...」搞到伯母咁樣,傻魚個心非常內疚,非常難過仲好嬲添.真係乜心情都冇晒.
又唔係啲乜開心事,做乜同人講呀?真係好後悔講咗畀奶奶知.傻魚同傻馬講,以後有乜事都唔會再話畀奶奶知.傻馬話係.突然諗起奶奶今日去飲,唔知會唔會又爆響口.問傻馬好唔好打畀奶奶叫奶奶收口,傻馬話要,仲叫傻魚即刻打.
傻魚:「奶奶,喺酒樓打緊牌呀?」
奶奶:「係呀!有乜事講喇...」
傻魚:「想提下你唔好講伯母件事畀人知.」
奶奶:「你估你奶奶我傻o架咩.今日囍事o黎,點會講呢啲嘢呀?!!你奶奶我咁醒,知分寸o架喇~」
傻魚:「總之唔好提喇!今晚你返o黎至同你講~」
收咗線之後越諗越嬲!邊忽醒,邊忽知分寸呀?真係你奶奶呀!@$%#$ 傻馬仲問傻魚點解唔話奶奶周圍講搞到伯母好難堪...傻魚其實係唔想喺個電話度同奶奶講啲咁o既嘢.今次唔會再畀面奶奶,一陣奶奶返o黎會捉住奶奶o黎話.同傻馬商量過之後決定唔話畀奶奶知世伯幾時出殯,費時到時奶奶拉大隊去,咁傻魚真係死幾次都唔夠.
好在出去食飯之前好開心咁切咗個蛋糕.真係好一個生日"快樂"...依家...食龍肉都冇味...
生日快樂~
今個月身邊真係好多人生日,包括埋傻魚.今日係朋友蝸牛小姐同網友傻豬媽個乖仔齋老味o既生日.梗係要做返啲嘢喇~
同蝸牛小姐係因工作上認識,都差唔多五年喇.當年傻魚係供應商,而蝸牛小姐係客,一個月見一次唔係咁熟.
齋老味,你知唔知你有幾幸福呀?你有個好愛鍚你o既傻豬媽...當然仲有個傻豬爸喇~(?唔會畀人打啩...
生日快樂~
話咁快又一年喇!原本諗住今年返去一齊慶祝生日,點知因為要搵食,結果要過晒生日至見到.嗰個"天下無雙壽辰演唱會"睇怕都要延期一年...
今日生日有乜願望呀?傻魚祝老友身心健康,青春常駐,幸福快樂,心想事成~係就係行咗啲,不過係好衷心o架!希望明年o既今日會多個人仔同老友一齊慶祝生日~
啱啱收到傻細佬通知,話傻爸個手術好成功,今日出得院添!真係成個人鬆晒.兩晚冇訓,一收到個咁好o既消息,成個人即刻好攰好眼訓.
其實都知係個小手術,唔需要咁擔心...係擔心有啲乜其他嘢傻爸同傻細佬瞞住傻魚啫...有前科o架...傻爸第一次心臟病發入院嗰陣,驚傻魚擔心,又唔想傻魚嘥錢返去,所以落咗道聖旨唔畀任何人通知傻魚.結果過咗兩個幾月傻細佬至話畀傻魚知...之後第二,三次入院,都係傻媽唔覺意爆響口傻魚至知...仲有啲乜檢查結果呀之類都好輕描淡寫咁轉告畀傻魚知.次次問親都係"冇事喇~","小事喇"咁...搞到傻魚仲擔心...
好囉,做咗個手術...傻魚可以安心啲...依家傻魚要訓返覺先...傻馬今日午餐要食自己...呀...唔係...係自己一個食...唔得喇...好暈呀~
呢幾日心情都麻麻...今日仲搞到遲咗出門口,趕到命仔差啲冇...好在都趕到六點鍾船,去到酒店差多七點半.擺完啲行李上房,就同傻馬去咗新葡京食自助餐.去到八點鍾,帶位姐姐話要八點半至可以入座.仲有半個鍾,做乜好?
傻魚同傻馬唯有"又"走去睇人賭錢.睇睇下傻馬話不如去玩下老虎機,跟住行過見到部電腦大細機,傻魚行埋去睇咗一陣,傻馬就話入錢玩玩.入咗一百蚊,開頭輸咗四十蚊.跟住買咗一舖五仔,點知開圍五賠十二,一舖過返晒o黎.跟住買多舖,送咗廿蚊畀何生就即刻拎錢走人.嬴錢唔走會輸返晒o架...
見差唔多時間就上返去餐廳等位.之後兩條友食到好飽.傻馬仲話飽到想嘔...食飽就趕返酒店上網喇...
過大海之前搵過好友,睇下有乜可以幫手...好友表現得好堅強.其實呢兩年好友家都好多事發生.上年係公公,今年先有舅父,跟住到婆婆,依家到父親.好難想像好友依家o既心情.仲有伯母.伯母尋日激動到暈咗.上船之前打畀奶奶,叫奶奶得閒去睇下伯母.伯母依家一定好難過,希望伯母節哀順變.傻魚今個星期生日,唔係咁方便出席喪禮.奶奶話會做代表...都好o既...其實傻魚好怕見到啲咁o既場面,實會喊得同家屬一樣咁慘...嗚~
前晚收到個消息,傻爸聽日要入院,後日做手術...突然間個心離一離...雖然,通波仔唔係啲乜大手術,但係都有某程度o既危險性...尋晚打咗個電話畀傻爸,傻爸表現得好輕鬆.可能唔想傻魚擔心啩...點都好,已經叫咗傻細佬喺星期二晚上網報告返傻爸o既情況畀傻魚知.
今日原本約咗好友今晚食飯同傻魚預祝生日.見好友成朝都冇電話,正話五點幾打咗個電話諗住問好友幾點喺邊食.點知...好友細妹接電話,講咗個超壞消息畀傻魚知...好友家父啱過身...聽完之後傻魚都唔知應該點反應.好友依家一定好傷心...依家都唔知好友點樣...仲有伯母...又唔敢打去打擾好友...或者夜啲再搵好友,睇下有乜可以幫忙.好擔心好友唔知可唔可以應付得o黎...
哎...人,真係好脆弱.所以希望大家喺依家呢一刻好好珍惜同身邊至親一齊o既寶貴時間,唔好等失去咗之後至後悔當初.十月頭,傻魚會返傻家兩個星期陪下傻爸.一年至見嗰兩星期,希望可以喺咁短時間裏面盡點孝心.
星期四零晨一點返到屋企,成條魚散晒.諗住抖返日回氣,點知一早就收到電話搵傻魚第二日幫手翻譯.見份工唔係難,報酬都幾好,又係識得o既人叫到,咪應承囉.聽完個電話諗住訓返都唔得...但係實在係太攰,唯有攤屍床上.好在星期五都可以訓到幾晏至起身.
星期五,兩點半去到尖沙咀太平洋酒店會合朋友.原本由三點鍾開始返兩三個鍾,搞搞下結果做咗五個鍾...做完個頭勁痛,個人又攰...接埋傻馬一齊返到屋企食咗餐飯就乜都冇氣力做.連拎杯水都叫傻馬拎.
星期六一訓醒就趕出去四季酒店參加某日本公司喺香港成立o既開張典禮.大會仲請咗三色台某女主持做司儀,仲有"阿蛇"做嘉賓.呢日又係企咗四個鍾,不停咁同啲日本人吹水打招呼交換卡片.好在個雞尾酒會啲食物都唔錯.見到好多中港台同胞係咁圍住碟刺身,仲要擺成座山咁高至走.見到咁,傻魚唯有同其他日本人一齊等啲同胞食飽至食.睇完醒獅,聽完理事長致詞,幾個餓到暈o既日本人同傻魚就走咗出去搵嘢食.呢個時候人少少食得好輕鬆.散會之後見咗幾個日本人,為星期日o既兼職做準備.結果因為冇揸車,返到屋企又係散晒.食完晚飯之後拉咗奶奶出街一齊買咗對鞋,行咗兩個鍾,攰上加攰...
星期日一早起身準備齊啲嘢,十點鍾去到金鍾某酒店大堂會合啲日本人.跟住就係做事前準備.今次係一個介紹會,差啲畀啲日本人玩死.冇事前準備致詞稿,上到台玩即興,打天才波,傻魚差啲因為咁"死空氣".因為傻魚除咗要做翻譯,仲要做埋司儀個助手.成個介紹會o既流程係喺當日至決定,中間仲改咗幾次.好在都冇乜事,係間中播錯片咁啫.企咗五個鍾,水都冇滴入口,好慘~尋晚返到屋企,真係攰到唔想講嘢.就係咁傻馬做咗兩日工人畀傻魚使.
今日...又要做咕喱過大海會傻馬.星期四朝早會返香港,因為嗰日下午六點有兼職.o黎緊呢兩日終於可以休息下喇...希望...所以...日本個迎新會大家快啲畀啲提議,如果唔係到咗星期四傻魚就會自把自為決定晒所有嘢o架喇.迎新會詳情將會喺星期五另行通知已報到o既朋友.仲未報到o既,快手啲喇.哎呀~夠鍾游過大海喇...
後記: 現在時間係晚上八時二十三分.點解上到網?冇游過大海?非也...依家傻魚身處傻馬工作o既地方,傻馬要加班,咁傻魚咪唯有上住網等傻馬收工囉...冇計,傻馬未去酒店攞房,想喺酒店房攤住睇電視等都唔得...
今日一心諗住早啲去機場拎返個靚窗口位,跟住寄完行李去食個鰻魚飯,然後去行街街.點知去到櫃位放咗件行李上去,個嬸嬸話件行李廿四公斤超磅四公斤喎...傻魚咪話以前都冇事,o黎嗰陣都得o架.點知個嬸嬸好寸咁講冇可能,"嘥筆"不嬲都好嚴,超一公斤都收錢,仲話一係傻魚拎四公斤出o黎,如果唔係就畀錢.傻魚梗係唔畀錢喇.跟住條友好冇禮貌咁叫傻魚行埋一邊執四公斤出o黎.嬲到傻魚呀...好在有帶多個袋咋.乜唔係航空公司話廿公斤,其實可以帶廿五o既咩?四公斤都唔係好離譜啫.傻魚又唔係o黎旅行,畀多少少都得啩...之後越諗越嬲,搞到食鰻魚飯嗰陣唔記得影相之餘仲食得好唔開心.食完搵個位坐低用信用卡畀錢用機場無線上網.日本乜都錢錢錢!得喇~冇下次!"嘥筆"入咗黑名單,冇錢都唔會再搭佢.好巴閉咩?!!哼!
題外話...阿主婦呀...成田空港係冇免費上網o架...可能你上次喺第二ビル.成田空港啲電腦係要一百円用十分鍾o架.依家傻魚畀五百円可以用廿四個鍾...用唔到咁耐,用返個半鍾都平過用機場啲電腦呀.
之前關生o黎傻家小住嗰陣,傻魚知關生鍾意食咖哩,諗住整返餐即食咖哩畀關生食...點知關生驚傻魚落毒,寧願請傻魚出街食.
今日午餐唔知食乜好,見到盒咖哩咪煲飯食埋佢囉.幾好味o架...哼!關生走寶~執下呢樣搞下嗰樣,七點鍾出門約咗舊上司七點半喺新宿食晚餐...原本諗住食鰻魚,點知有個哥哥仔係咁介紹某間居酒屋,咁兩條友咪走咗去食囉...普通一間居酒屋,食物少少,煙霧迷漫...最重要係冇鰻魚.冇下次...食完返到傻家,見時間尚高,即九秒九沖咗個涼諗住洗埋啲衫...點知沖完出o黎落大雨喎...吹漲~落雨都照洗,因為唔想聽朝神咁早起身洗,驚唔乾...聽朝洗埋個灶,執埋啲嘢返香港...冇人接機,返到屋企都半夜一點鍾...諗起都攰...
今日原本約咗傻馬姨喺千葉食晏,點知一早接到傻馬姨電話話個頭好痛,叫傻魚直接上傻馬姨屋企食.去傻馬姨屋企路程需時兩個幾鍾,去完返o黎都唔知幾點,所以乍乍林洗咗機衫,然後去銀行幫傻馬問嘢,跟住去埋区役所至暈車去傻馬姨屋企.去到都成點鍾...擺低奶奶要傻魚帶畀傻馬姨o既海味,等咗一陣就有嘢食喇.原本諗住請傻馬姨出街食飯,結果變咗喺傻馬姨屋企食即食麵...食完傾咗一陣,傻馬姨又叫傻魚抬啲嘢返傻家...次次搵親傻馬姨都又食又拎...今次拎咗三把傘,一個瓦煲仔,同兩條蒸粟米.
轉咗三次車,返到傻家附近買咗包沙律菜.今晚又烤雞,諗住搵啲菜仔食下.突然諗起冰箱仲有包帶子,傻馬唔會整o黎食,等到下次傻魚返o黎包帶子可能已經變咗化石...諗起前幾日喺電視見到啲人擺啲帶子同啲米一齊煲...
又學下人整咗個帶子飯.好好味呀~下次整畀傻馬食先...啲雞皮烤得好脆,超正!但係啲菜超苦...傻魚係條唔嘥嘢o既魚,唯有落多啲沙律醬狂吞囉...唔怪之得咁平喇...聽晚有人請食飯,希望唔會又放炮喇...有人請,梗係食鰻魚喇~呵呵呵~
返o黎東京一個星期,冇日得閒過...返咗四日兼職,加埋執屋,成個人散晒,尋日抖咗成日至回到魂...今日有時間就梗係要做下功課喇~
講返星期一,一早搭巴士暈住去機場.因為搭"嘥筆"o既關係,"又"畀"電腦"選中要做行李檢查.梗係"又"超黑面咁去畀人摷喇...由於冇訓過o既關係,上到機就係咁訓,差啲連"雞內早餐"都唔想食...肚餓加上唔夠訓,勉強食埋個"雞餐"之後就訓到落"雞".過關嗰陣,個哥哥仔係咁搵個再入國,咁傻魚咪話冇做囉.跟住個哥哥仔好寸咁問傻魚點解唔做再入國,傻魚咪好寸咁答係因為個簽證係多次.拎完行李後過海關嗰陣,周圍啲人都畀人摷.到傻魚嗰陣,開完行李之後仲畀個姐仔"非禮"...原因係所有由中國o黎o既人都會查得嚴啲...傻魚從來都冇遇過啲咁o既事,真係想爆粗!可能嗰日傻魚超樣衰啩...總之就超唔愉快喇.順路買埋啲牛奶杯麵,返到傻家一入屋就見到廚房嗰堆碗碟...暈...傻馬洗完冇收返埋所以封晒塵...開腦諗住上網至發現失魂唔記得帶電線...結果上到六點幾就冇電收得工.執完行李,洗埋個廚房同廁所,對手攰到係咁震...成個人散晒...等人打o黎通知第二日返幾點等咗幾個鍾,終於喺十一點幾收到電話之後就暈咗.
星期二朝早七點幾起身,八點幾想出門口嗰陣接到電話叫傻魚唔使咁早出門口住.因為酒店個夾萬出咗問題,要等酒店派人去開喎.傻魚咪慢動作執下嘢,跟住走咗去便利店交電煤費.差唔多行到車站就收到電話話搞掂,叫傻魚可以出門口.會合完佢哋之後就一齊去會場.去到因為太早,會場仲未開冷氣,三條友"焗"住執嘢.執到差唔多完至有冷氣,跟住寄存完啲"貨"就收工喇.佢哋就去海浜幕張購物,傻魚就去咗秋葉原搵電線.好在好快就畀傻魚搵到,超開心咁飛奔返傻家上網.咁重要o既日子上唔到網點得o架~出咗一篇網誌之後就準備第二日返工啲嘢,跟住就訓喇...
星期三...訓遲咗...因為又失魂用咗香港個電話較鬧鍾...結果咪遲咗一個鍾起身囉...乍乍林梳洗完出門口,一拎起個電話想打就收到人哋打o黎...好唔好意思咁話訓遲咗,叫佢哋去會場先...到傻魚去到會場係遲咗半個鍾,不過好在仲未開場.終於等到收工...返到傻家食完嘢之後睇下電視跟住就暈咗喇...
星期四朝早行去車站途中收到電話,佢哋話想去食早餐,所以各自去會場.見有時間,傻魚咪慢步去會場.去到等咗半個鍾至見到佢哋.呢日仲難過...睇極個鍾都只係過咗十分鍾...收咗工又係九秒九飛返傻家...食完個杯麵睇陣電視,連網都唔想上就訓喇.
星期五,最後一日!隔離位仁兄喺十二點已經收晒啲嘢,一點唔到已經人影都唔見走埋...真係搞衰晒香港個形象.到三點鍾,寄咗件貨畀個客之後開始執嘢.諗住好快可以執完,點知執到個場熄冷氣都仲未執完...結果係最後走嗰個...之後約咗個時間會合食晚餐...其實唔係好想一齊食,不過見係最後,是旦喇...佢哋想食"恰恰和牛",可惜搵咗好耐都唔見之前同關生去食過嗰間.結果走咗入一間韓式燒肉店...因為大小姐發晒脾氣話唔食燒肉,男朋友嬲到飲咗半杯啤酒就走咗...傻魚都唔知點好...後來大小姐打電話叫返男朋友返o黎一齊食咗個唔愉快o既晚餐...全程大小姐係冇出過聲...返到傻家同"拍檔"開咗個"會仔",訓嗰陣已經係兩點喇...
尋日星期六,一早醒咗,但係就好攰...洗咗兩機衫,執咗一陣屋就坐咗喺度...無所事事上網巡咗一陣,但係就冇心情留返幾粒字畀各位...個人攰之餘,個頭都好痛...終於頂唔順食咗兩次特效"迫你痛",跟住睇睇下電視訓鬼埋...
今朝又係一早醒咗,洗埋機衫同床單被,吸埋塵就開始上網喇...一陣會去原宿幫關生買嘢,順便去買傻魚至愛o既漫畫~食咗咁多日即食嘢,今晚整返餐飯仔食至得...聽日約咗傻馬姨食晏,後日約咗前上司食晚飯...大後日又返香港喇...迎新會...傻魚會吹雞但係唔會出席...其實...傻魚都係去陪笑o既啫...最緊要有主婦同女王!大家話係咪?!
