擔心

前晚收到個消息,傻爸聽日要入院,後日做手術...突然間個心離一離...雖然,通波仔唔係啲乜大手術,但係都有某程度o既危險性...尋晚打咗個電話畀傻爸,傻爸表現得好輕鬆.可能唔想傻魚擔心啩...點都好,已經叫咗傻細佬喺星期二晚上網報告返傻爸o既情況畀傻魚知.

今日原本約咗好友今晚食飯同傻魚預祝生日.見好友成朝都冇電話,正話五點幾打咗個電話諗住問好友幾點喺邊食.點知...好友細妹接電話,講咗個超壞消息畀傻魚知...好友家父啱過身...聽完之後傻魚都唔知應該點反應.好友依家一定好傷心...依家都唔知好友點樣...仲有伯母...又唔敢打去打擾好友...或者夜啲再搵好友,睇下有乜可以幫忙.好擔心好友唔知可唔可以應付得o黎...

哎...人,真係好脆弱.所以希望大家喺依家呢一刻好好珍惜同身邊至親一齊o既寶貴時間,唔好等失去咗之後至後悔當初.十月頭,傻魚會返傻家兩個星期陪下傻爸.一年至見嗰兩星期,希望可以喺咁短時間裏面盡點孝心.