大年初一的蘿蔔糕&節分

恭喜發財~

身體健康

心想事成

萬事如意

笑口常開

財源滾滾

"兔"氣揚眉

尋晚食完晚餐,諗住搵埋傻馬幫手做"阿茂"...點知,都係傻魚一條友整晒.整乜?蘿蔔糕囉...材料有:兩斤半蘿蔔...咦?傻馬竟然唔記得為主角留倩影呀!!!傻魚切到人都癲o架嘛...搞錯!!!

半斤粘米粉加鷹粟粉...第一次整懶醒,以為啲粉太多,所以冇落晒...傻馬亦要負一半責任,因為係傻馬話網上嗰啲都比傻魚嗰兜稀...

八粒細冬菇切粒...

蝦米切粒...份量?唔知...傻魚好求其~哈!

八粒乾瑤柱搣絲...

一孖臘腸切粒,了晒啲肥肉...
調味料: 鹽,雞粉,蠔油,胡椒粉

冇兜,攞咗整蛋糕啲模o黎用.結果都係唔夠,要出動埋碗.

蒸之前打咗個電話返香港同老爺奶奶拜個早年,順便請教下師父攞秘訣.整蘿蔔糕真係好大陣象,蒸完都成點鍾...賣相同味道都唔錯,係粉落少咗唔夠實.下次一定會成功!有人又話想食年糕...聽日去買糯米粉,過幾日清埋啲蘿蔔糕至整囉...冇計喇~身在異地,想食啲家鄉嘢咪唯有自己整囉.整得唔好食都好過冇得食...

今日除咗係農曆大年初一之外,亦係日本o既節分.乜嘢係節分?節分係一個由江戶時代流傳到現在o既一個傳統節日,係喺每年o既立春前一日.日本古時啲人認為喺轉天氣o既時候都會產生邪氣(鬼),所以要驅邪.以前係由一家之主或本命年o既男丁撒豆驅邪.不過宜家通常都會由一家之主帶上鬼面具扮鬼,然後其他家庭成員就會向隻鬼掟炒過o既大豆.掟豆o既時候會不停講"鬼出去,福入o黎".相傳用啲豆去掟啲鬼可以驅除邪氣,寓意著全年冇病冇痛冇災冇難.掟完豆之後就一定要食返同自己年齡一樣數量o既豆.如果再食多一粒o既話相傳就會身壯力健唔會傷風感冒咁話喎.而喺呢一日,相撲手有名力士,名歌舞妓演員同名藝人會喺某幾個指定o既大寺廟神社舉行一個大型o既撒豆驅邪.其中比較出名o既係千葉o既成田山新勝寺.想睇明星或想親身去感受下o既朋友,明年可以去千葉湊下熱鬧喇~