從頭細說相遇時

儍魚係外國華人.幾年前喺日本留學期間結識到儍馬.兩人畢業後,儍魚便跟咗儍馬返香港進駐儍馬家.儍馬係獨仔,同父母同住,從此便開始咗風起雲湧o既智力戰.

儍魚係一個極易相處,同任何人都可以和平共處o既"百搭人",亦是出咗名適應力超強o既"蟑螂人".初到異地,人生路不熟,阿"伯母"(當時仲未結婚...)常帶儍魚四周圍去.之後仲不停帶儍魚去見佢啲"老"友...結果喺短短兩個星期裡面,"伯母"身邊o既所有人都識儍魚.

師奶甲說:「哎呀!你就好命喇!未來心抱仔咁乖,成日陪出陪入...」

"伯母"答:「邊係呀...佢日日喺屋企得閒冇嘢做啫,出o黎行下咪幾好...」

師奶乙說:「阿仔女朋友,又陪未來奶奶唱粵曲呀?」

"伯母"答:「叫埋佢一陣一齊去買餸,睇下佢想食乜,今晚煮俾佢食囉!」

師奶丙說:「咁乖女,係低鍚o既!」

"伯母"答:「我夠開通囉...屋企啲嘢唔使佢幫手,仲煮埋俾佢食.你話去邊度搵呀?!!」

儍魚:「...」

次次見到阿"伯母"啲"老"友同歌友,都會聽到類似既對話...有朋友話"伯母"係專登帶埋儍魚出街喺佢啲朋友面前晒命.當時儍魚反而冇乜所謂,反正得閒...而且,儍魚並唔討厭同長輩一齊傾下偈.所以儍魚到咗今時今日都仍然好得奶奶(宜家結咗婚...)o既師奶朋友們歡心.

************************************************************

奶奶今日好忙.唔知去咗邊,成日都唔見人.同儍馬食完晚飯十點幾返到屋企,見奶奶返咗o黎坐喺廳度睇電視.點知儍魚一入房換衫,就聽到奶奶打電話.奶奶又搵人講是非喇...奶奶一喺屋企冇嘢做就會周圍打電話煲粥講人是非.奶奶,近排成日話喉嚨痛,講咁多嘢小心失聲唱唔到粵曲喎!!!