心意之爭

搵到工做,有收入,就梗係要俾家用喇!就算奶奶唔出聲,儍魚都諗住俾.點知...

奶奶:「你哋呀...返工喇...要俾家用o架!」

儍魚:「知喇!」

儍馬:「得喇!」

奶奶:「你哋每個人每個月俾二千蚊家用我呀!」

儍魚儍馬:「...」

奶奶唔出聲,儍魚都諗住俾多啲o架...既然奶奶開到聲話收二千蚊,而儍馬又話唔使俾咁多,咁儍魚就可以慳返幾千蚊用o黎同儍馬去旅行.原本都冇乜嘢,一切都相安無事.有一次因為工作太忙,一時唔記得去銀行拎錢俾奶奶,奶奶就追咗儍魚兩次.

奶奶:「喂!你欠我錢喎...你仲未俾家用,又唔記得呀?」

儍魚:「呀!!!係喎...又唔記得添...聽日去銀行,聽晚一定俾你...」

奶奶:「唔好唔記得呀!你遲咗五日o架喇!下次唔準遲呀!」

儍馬:「你做乜呀?你發錢寒呀?好等錢使咩?等錢使咪我俾你囉!」

奶奶:「唔係...佢遲咗俾家用,我提下佢啫...」

儍馬:「提咩提呀...人哋係你邊個呀?你個女呀?問人攞錢...欠咗你咩?儍魚,你下個月唔使俾家用喇!我俾!你唔夠錢使問我要!!」

就係咁,儍魚連二千蚊都慳返...奶奶亦唔敢再問儍魚要家用,連惾魚俾都唔敢收...奶奶係全職家庭主婦.除咗儍魚儍馬俾家用之外,老爺個個月都有俾家用奶奶,而且數目不少.奶奶又唔係日日都煮飯,所以每個月都儲到唔少私己錢.間唔中都見奶奶多咗隻鑽戒之類.奶奶依然成日話冇錢,唔夠錢使...咁又係...錢,邊個會嫌夠o架...

*********************************************************************

今日奶奶一早就出咗街.奶奶日日都好多節目o架!儍魚中午出咗去見個客,跟住返咗公司.原本都諗住搵埋儍馬一齊返屋企食飯,所以打咗個電話俾奶奶.奶奶話今晚冇節目,會返屋企煮飯.可惜之後因為太耐冇返公司,堆咗好多嘢喺枱面要清.所以打咗個電話俾儍馬,叫儍馬話俾奶奶知儍魚唔返去食,同埋叫奶奶將啲飯留返俾儍魚聽日炒飯食.奶奶好似又整咗成枱餸,知道儍魚唔返去食,即刻愁晒...留返聽日食?!!儍魚好富貴o架!!!儍魚唔食隔夜餸o架!!!其實係因為儍魚由細到大腸胃都好差,好多嘢唔食得之餘,有好多隔夜餸食完會肚痛,甚至肚疴...所以,無計!!!儍魚都唔想o架...