首度交鋒

喺儍馬家住咗幾個月,除咗陪"伯母"周圍去,其餘時間都用o黎搵工.見咗好多公司都請儍魚,但就冇一間可以幫儍魚做工作簽證...真係愁晒!!而"伯母"就不停帶儍魚出街之餘,仲不停帶儍魚去食嘢,終於搞到儍魚喺短短三個月裡面肥咗廿幾磅!!

.....................................................................................................

"伯母":「今晚想食乜餸呀?」

儍魚:「雞扒,雑菜粉絲煲!」(儍魚至愛!!)

結果...每次都係成枱餸...明知得嗰四個人食飯都仲要整夠六人份喎...結果...每次都要摶命掃晒啲餸...(儍魚唔鍾意浪費食物...)

儍魚:「好飽呀...好辛苦呀...」

"伯母":「冇人叫你食晒成枱餸喎...飽咪唔好食倒咗佢囉...」

儍魚:「...」

.....................................................................................................

"伯母":「鍾意食乜,自己叫喇!」

儍魚:「o黎飲茶梗係要食鳯爪,蝦餃,炸雲吞...」

"伯母":「唔準食鳯爪,肥呀...炸嘢好熱氣喎...」

儍魚:「...」好傪咁望一望儍馬同"世伯"...

"世伯":「你痴線o架!唔俾人叫...又唔係日日食...一個星期食一次都唔得咩?唔使理佢,叫喇!」

.....................................................................................................

儍魚:「要個雞扒餐肉米早餐!」

"伯母":「咁早食啲咁o既嘢...好肥架!唔準呀!」

"世伯":「你做乜唔俾人食呀?唔使理佢!!!」

講緊係一個月都唔知會唔會食一次o既茶餐廳早餐...

.....................................................................................................

好多時候出街食飯都係咁."伯母"一定會問儍魚同儍馬想食乜.但凡儍魚同儍馬講o既餸,"伯母"總係話肥呀,熱氣呀,唔準食呀咁...後來每次出街食飯,"伯母"一問儍魚想食乜,儍魚都只會答:「是旦喇...你話事喇!」跟住"伯母"就會好開心咁又叫到成枱都係,食到儍魚差啲翻埋肚咁滯...

*************************************************************

奶奶今日做咗"厠所皇后",喺裡面成兩個鍾都未出o黎...搞到儍魚急到死,差啲忍唔住!!終於等到奶奶出o黎,一支箭咁飛入厠所一睇...暈呀!!唔知奶奶搞咗啲乜,周圍都濕漉漉...都唔理得咁多,抺乾個厠所板解決完之後,求其抺乾個地就算...跟住奶奶走入儍魚房話今晚佢有街去唔煮飯.所以今晚又冇飯食...儍馬又要加班未返...唯有忍多陣肚餓等埋儍馬出街食囉...咿?係喎...老爺喺屋企喎...都係問下老爺食乜好先...打俾儍馬,儍馬話佢買緊嘢,叫我自己食.所以就同老爺落樓下茶餐廳食...