二度交手

搵工搵咗將近一年都未搵到間可以幫儍魚做工作簽證o既公司...再搵唔到就要返老家喇.但係儍馬唔想同儍魚分開,却苦無辦法.

....................................................................................................

"伯母":「要點至攞到簽證o架?一定要公司至得咩?」

儍魚:「工作簽證要雇用公司申請至得.結咗婚o既可以叫老公申請居留簽證.再唔係咪開間公司咪可以申請投資簽證囉.」

....................................................................................................

兩日後...

"伯母":「一陣得唔得閒呀?」

儍魚:「得閒呀...咩事呀?」

"伯母":「同我一齊出去喇.」

儍魚:「哦...去邊呀?」

"伯母":「去申請排期註冊結婚囉.」

儍魚:「吓?!!!!!!」

等陣!!!邊個結婚呀?儍魚同儍馬?!!冇聽講過喎...儍馬都冇求婚!儍魚都冇話想結婚...就算係,點解唔係儍馬去而要儍魚去申請喎?!!點解???

儍魚:「儍馬!!!點算?」

儍馬:「都冇其他辦法喇...」

吓?儍馬咁就叫求咗婚喇?!!咪住!!!儍魚被"伯母"迫婚?!!就係咁,儍魚儍下儍下同儍馬註咗冊...

.....................................................................................................

註冊前...

"伯母":「註冊o既事唔好話俾嫲嫲同啲阿叔知喎.」

儍魚同儍馬:「點解呀?」

"伯母":「費時麻煩喇...一陣又話冇叫埋佢哋去觀禮,多多嘢講...俾嫲嫲知,嫲嫲又話要做呢樣做嗰樣o架喇...」

儍魚同儍馬:「...」

就係因為咁,結果就連朋友都決定唔講...都好o既...冇人知,過年可以收利是,又唔使派喎...跟住儍馬幫儍魚申請個居留簽證之後,儍魚好快就搵到工喇!搵到工當然開心喇...但係最煩o既至啱開始...

********************************************************************

訓醒已經唔見奶奶...今晚唔知有冇飯食添o架...尋晚奶奶買咗什果涼粉西米露俾儍魚食.好味~!!!今晚唔想再出街食飯...諗住打俾奶奶問下,點知儍馬話今晚奶奶又唔返o黎煮飯!!!奶奶唔煮飯就唔會去買餸.冇買餸屋企就唔會有餸擺定喺雪櫃度...咁就算儍魚想煮飯都冇餸煮...算喇...白菜仔東菇粉絲煲都應該整到o既...咿?!!冇粉絲?!!算喇...儍馬話買餸煩,都係出去食唔使煩.兩個人食乜好?打唔到冷喎...又食茶餐廳?!!唔好喇啩?!!奶奶一唔煮飯儍魚就愁晒...