架車仲未整好...好似話仲有其他嘢壞...今日原本要去買龍貓糧同出銅鑼灣買嘢,冇車用唯有打消出街呢個念頭...事關一去親銅鑼灣,通常都會好夜至走.冇揸車o既話就要搭通宵小巴,尾站喺屋企樓下,好鬼方便.之但係,試過幾次等咗個幾兩個鍾都唔見架通宵小巴,幾次都搞到返到屋企天光咁滯...上次等到個人好攰,走咗去搭另一架去元朗o既亡命小巴.中途落車行咗廿分鍾,返到屋企散晒之餘仲暈車作嘔偏頭痛搞到瞓唔到...好鬼攞命...所以今日閉關一天,聽日攞返架車至出動囉...
傻馬知傻魚好擔心傻馬餐晚飯,所以近排一條友去咗四次回転寿司,尋日仲去上野買咗兩隻超大毛蟹同兩大嚿吞拿魚刺身,今晚食咗一半,飽到上心口喎...前幾日仲買咗啲大餃返去自己煎,不過煎得唔好落咗好多油...傻魚即刻教傻馬點煎,希望傻馬下次可以煎得好味啲.知道傻馬唔係餐餐食垃圾,傻魚都放心啲.遲啲傻魚返到傻家,話唔定可以偷下懶,等傻馬煮...嘻~
傻馬聽日又一條友去滑雪...傻魚都想去呀!!!唉...算喇...傻魚都係繼續閉關吧喇...
唔知做乜,尋晚冇乜點瞓...今朝個頭勁痛...今日又唔知做乜,好多嘢都堆埋喺呢日.前幾日終於約到一個好鬼難約o既大忙人喺今日下午大概三點見...等咗成朝電話都冇,咁啫係幾點,見唔見呀?奶奶尋日通知傻魚今日四點要出席姨婆個老公o既喪禮,咁搞法都唔知去唔去到...等到兩點都仲未有電話之餘又搵唔到人,咁傻魚唯有先出門口...點知佢係咪講嘢好曖昧,但其實約實咗嗰啲人呀...都係唔摶喇...驅車啱啱行出個路口,電話就到,話要改時間,六點見...唉...即刻轉路線去市中心醫飽個肚仔先.見會過海,咪打畀狗奴才睇下狗奴才會唔會過海,約埋買嘢.之後打畀奶奶問奶奶喺邊,諗住一齊去.點知奶奶己經出咗門口,咁傻魚咪話食完嘢至去會合佢哋.所有嘢都好似安排得好好咁,但係硬係有啲唔對路...
食咗個好豐富o既下午茶,跟住收到奶奶個電話話屯門公路好塞車叫傻魚快啲起程.乍乍林埋單,驅車起程之際...問題就發生喇...撻車嗰陣冇事,行行下喺停車場收費亭前死咗火,跟住就撻唔返架車喇...救命呀!!!搞乜呀?架車喺過年前啱啱至整完,咁快又壞?幾個好心人幫傻魚將架車推出停車場之後,傻魚即刻打畀黃氏大少求救.咁啱黃氏大少有啲嘢做緊行唔開,傻魚唯有膽粗粗走過對面街搵人救車.原來之前傻魚去幫襯換嘢嗰間唔係整車o架...點算?好在出門遇貴人,咁啱有個整車師父喺嗰度換緊嘢,見傻魚咁愁就同傻魚過去睇下架車乜事.唔睇由自可,一睇就把幾火!又係壞上次換嗰嚿嘢...師父仲話好在傻魚唔係喺屯門公路度死火,如果唔係實出事...都算不幸之中o既大幸...見阿師父咁好心幫傻魚睇架車,而傻魚喺附近又冇相熟o既車房,咪膽粗粗問阿師父間車房喺邊,有冇拖車咁...其實係傻魚費時煩...等到拖車到,交低條車匙畀拖車佬,就上咗整車師父架車返車房.架車最快聽晚至攞到.咁又唔見一嚿錢喇...架車都係揸多一個月就放,橫掂之後有成五個月唔喺香港...
離開車房都四點半喇...打咗個電話畀大忙人再約過第二日,然後打畀狗奴才呻下慘話今晚都係出唔到...搭咗廿分鍾輕鐵好似要咗傻魚條命咁,落車頭暈眼花...走咗去西鐵站買嘢飲,見到有人真係暈咗喺個站度.好多人八掛走埋去睇.傻魚買咗兩支雪梨茶,邊度都冇心情去就梗係返屋企喇...行到一半奶奶打o黎問架車搞成點,又問傻魚今晚想食乜.咁o既情況,食乜都冇味喇.叫奶奶求其買啲嘢返o黎食,唔使煮咁麻煩.返到屋企打咗個電話畀黃氏大少,話返畀黃氏大少知又係壞上次嗰嚿嘢.黃氏大少即刻問傻魚係咪拖咗去另一間車房,傻魚話人哋咁好心幫傻魚睇架車,咪是旦囉.黃氏大少話會通知返上次嗰間車房喎.真係好彩唔係喺高速公路死火突然停低.,如果唔係尾隨啲車收唔切制撞埋o黎,到時跳唔切車就弊喇~所以今日都係唔好出街,留喺屋企安全啲...
今日約咗黃氏二少,三少,同二少女友一齊驅車去旺角會合關生.關生呢排都唔知發生咗乜嘢事,又話要去"痰易吐"...唔通收咗"痰易吐"啲宣傳費?又係叫咗個番茄湯底...
不過個湯底都係叫羅宋湯比較貼切啲...兩個活寶今日又有乜新火花?冇喎...因為兩個活寶分開坐隔得遠,再加上關生唔夠瞓死緊狗,擦唔出新火花.但係都食得好開心.食食下關生話如果傻馬知道佢哋賴低傻馬打邊爐,傻馬一定會唔開心.傻魚咪話出門口嗰陣留咗言通知咗傻馬喇...跟手諗住打電話畀傻馬,點知傻馬個手機擺喺廚房叉緊電聽唔到,所以冇接...
食完傻魚又去"去晾衫"買杯西瓜汁下火,然後先送關生返去,再送黃氏兩兄弟...返到屋企己經十點幾,即刻搵傻馬報告下今晚餐飯o既爆笑嘢.連打兩晚邊爐,隻牙仲痛痛地,都係整杯花旗參飲下先.
上一篇網誌用咗三日半至搞掂...忙乜?啱啱搞掂公司上年度核數啲嘢,今年度又o黎喇...要摷返啲單出o黎計埋盤數交畀會計師...忙執房...屋企部腦要搬返公司,加上要摷單做數,又要執嘢返東京,間房七國咁亂...忙食飯...好多人約傻魚食飯,搞到好似傻魚今次去東京之後唔會再返香港咁...忙列緊清單買嘢返東京...在日港太們,有冇嘢想搭買呀?忙埋呢兩個星期,跟住返到東京日日喺傻家"攤屍"...呵呵~
噢...傻馬駐澳單嘢,經過傻馬"深思熟慮"之後同老細講咗唔去喇.到呢一刻為止老細都仲未有乜動作話要傻馬出差或要傻馬重新考慮,所以傻魚如期返東京.等傻魚今晚搞埋啲嘢就會出會訊搞活動喇~好嘢!!!
牙痛咗幾日,阿智慧牙三號終於爆咗少少出o黎,今日冇咁痛喇...食咗兩日麵包,食到口旱旱...尋日關生喺西班牙出差返o黎,原本講好咗會搵傻魚食飯.點知阿關生"又"睡魔急上身,返到屋企就一睡不起...結果尋晚傻魚唯有一條魚吔包囉...今日關生覺得過意唔去,話要請傻魚食好嘢喎...
傻魚五點幾驅車去旺角,行咗幾間都搵唔到龍貓仔啲糧...斷咗幾個月貨喇...幾時至會返貨呀?就o黎食完冇得食喇...點算?!!之後行下波鞋街,終於買到對鞋喇...買完鞋一行出間鞋舖就收到關生電話,話到咗旺電門口.會合完關生之後就上咗旺電幫傻馬睇電腦價錢,然後四周圍行下睇下嘢.睇完關生想睇o既嘢,關生就帶傻魚去關生激讚o既"痰易吐"食番茄火鍋...打邊爐都幾熱氣下,一於以毒攻毒同阿智慧牙三號拼個你死我活!!!
食食下諗住打畀傻馬,但係傻魚部手機神咗打唔到...結果用關生部手機打畀傻馬報告下啲電腦o既價錢,費時返到屋企唔記得嘛...食完驚啲"毒"勁得滯,去咗"去晾衫"買西瓜汁下火.又要食又要驚...不過呢餐都食得好開心,因為關生實在太搞笑喇...聽晚會搵埋黃家二少一齊食飯.聽晚應該仲開心,因為關生加埋黃家二少呢兩個活寶,一定會笑爆場!!!好期待...呵呵~
唔知係咪近排瞓得少,肝火上升...尋日一瞓醒就牙肉痛...後來發現係第三隻智慧牙爆緊出o黎.痛得好緊要,乜都唔想食,連嘢都唔想講...傻馬唔喺度,冇人呵返,好慘...尋晚仲痛到要食"迫你痛",仲要係特效嗰隻...食完藥冇咁痛至瞓得到...但係瞓到今朝四點就痛醒咗...咁啱傻馬準備緊出門去滑雪,就同傻馬"士皆比"傾下偈,然後就"耳送"傻馬出門口.一路聽住傻馬出門口,直至完全冇聲為止...嗰一刻,唔知點解,好想喊...斷咗"士皆比"之後喊到收唔到聲,直至瞓著為止...
今日十一點幾瞓醒,隻牙仲好痛...乜都唔想做...諗起要出去買嘢,加上奶奶話今晚屋企冇飯食,咁咪諗住出去行下,跟住去下沙灘吹下海風...點知落到樓至發現落緊雨喎...落雨天,傻魚好鍾意~不過落雨天,去唔到沙灘...算喇...去買嘢囉...好多人話唔開心最啱去購物,買完會開心返...但係購物係完全唔會令傻魚覺得開心...蕩咗兩個鍾就返歸喇...買咗啲包當晚餐,食食下又喊...好痛呀!!!幾時至會唔痛呀!!!唉...又夠鍾啪特效"迫你痛"喇...定係食特快好啲呢???是旦喇...食完冇咁痛啫,咪都仲係會痛...阿智慧牙三號,快手啲爆出o黎喇...好很痛,好辛苦呀!!!
今朝一早起身,第一件事就係拆利是!呵呵~拆完計下數先...今年派多咗利是,加埋買禮盒o既費用...嘩~好金下喎...再計計傻馬同傻魚收到o既利是錢...噢...唔夠填返啲支出添...上年有賺o架嘛...不過算喇...傻馬唔喺度,收少咗好多封利是...再加上今年傻魚啲個人"支出"多咗,係咁上下喇...過年利利是是,至緊要大家開心啫...
好耐都冇出巡,今日一口氣去晒所有網友度望一望...返咗o黎香港,冇喺東京時咁一日一網誌.一來懶,二來冇乜嘢寫...其實咁都好,唔會過於沉迷上網.親愛的網友們,其實傻魚間唔中都有去拜會大家,只係懶回應咋...
近排傻馬多咗出街食嘢.知道傻馬肯使錢出街食下嘢,唔會為咗慳錢食垃圾,傻魚都放心啲...聽日傻馬一條友去參加日歸滑雪,神早五點幾就要出發去新宿搭旅遊巴.八千一百円全包,都算平...不過車程單程就要四個鍾...雖然傻魚唔識滑雪,但係都想同傻馬一齊去...點都好,起碼傻馬今個冬天都有去滑雪.
今日出街行咗好耐都搵唔到一對啱心水o既鞋,搞搞下仲唔記得買龍貓仔啲糧添...聽日又要再去行多轉,費時啲龍貓仔冇嘢食...
今日係十五,去咗車公廟祈福.前日心血來潮決定o既...奶奶一聽到傻魚話要去車公廟,就梗係跟到實一實喇.原本諗住今日食齋o架...點知奶奶今朝走咗去買咗個雞扒餐肉米畀傻魚做早餐,結果今日食唔成齋.不過唔緊要,齋幾時都可以食,最緊要有心啫.
驅車去到兩點幾,都幾多人去拜神祈福.入廟前奶奶千叮萬囑,叫傻魚唔好求神,費時要還神喎...搞錯呀?!!唉...上完香走咗去求簽.幫傻馬求咗支簽問事業,跟住傻魚自己求咗一支簽問事業同自身...點知畀奶奶話求簽第一支一定要求家宅先...叫奶奶自己求,奶奶又唔肯...唉...真係好想同奶奶講,人哋拜神,唔好咁多嘢講喇...一係就去之前講,一係就走咗之後至講.唔好喺人哋拜緊嗰陣話呢樣講嗰樣.拜神祈福都係求個心安啫...不知者不罪,做錯少少,菩薩唔會怪傻魚o既...結果最後梗係應奶奶要求,求咗支簽問家宅喇...
臨走前買咗...
兩隻牛!今年啲生肖玉佩都好靚.
屋企有三個人犯太歲,買o黎帶下求個心安.問奶奶使唔使買個畀老爺,奶奶即刻話唔使.仲話費時買返去畀人鬧喎...
之後返到市中心行下,奶奶依然做"跟得".食咗個下午茶之後就走咗去超市買餸.買完行咗幾間大藥行搵洗衣液.諗起奶奶今朝話想去洗頭,即刻搵個藉口話要去整車,叫奶奶自己搭輕鐵去洗頭.然後慢條斯理逛咗一陣買下嘢至去整車.整完打咗個電話畀奶奶,睇下奶奶洗完頭未,諗住順便載埋奶奶返屋企.點知奶奶唔接電話,慳返!聽日拆完利是去買龍貓仔o既糧食同買對鞋先...呵呵~
人與人之間的相處之道是一門很高深的學問.朋友之間的感情,家人之間的親情,情人之間的愛情,全部都需要用心去經營.其中,經營愛情需更用心,更用力.
很多人在婚前都會很用心對待那一段愛情,尤其在熱戀初期.為了吸引異性,往往會將自己醜陋的一面隱藏起來,甚至為了迎合對方而表現得虛假.為了討對方的歡心,會做很多平時不會做的事情...到對方家做家務,每天接送上下班,送花,買禮物...久而久之,"做戲"變得疲累.很多事情變得理所當然,就會習以為常,開始出現惰性.慢慢,真面目"表面化",發覺原來對方都不是那麼合適,婚後更發覺原來對方有太多短處.
其實每個人在不同環境下成長,價值觀和生活習慣都會不同.很難找到價值觀和生活習慣完全相同的兩個人...就算是家人也會不同,更何況是陌生人.初時會互相遷就.時間久了就會開始覺得為何對方不能配合自己而改變,為何總是要自己遷就對方.到了某一個時候就會各自為政,各不相讓.有多少人肯為對方改變,又有多少人會去尋找解決的方法?往往都會出現"我比你付出更多".在一段感情裏,是否能夠計算自己付出了多少而要得到多少回報?付出之後,是否一定要有回報?不冀望回報,很傻很怪麼?有幾多人可以無私地為對方多付出一些?與其要求對方走多一步,何不由自己先走出這一步呢?
溝通是經營一段感情最重要的元素.很多時,兩個人在一起久了就會缺乏話題,少了溝通.當初為了認識對方,拼命找話題.久而久之,會因為自己認為已很了解對方而不找話題.有些老夫老妻會望著對方,不知說甚麼好...其實在日常生活當中會有很多話題.當天做了甚麼,見到甚麼,吃過甚麼,天南地北,甚麼都可以拿出來講.當然,在怎樣的場合,講甚麼話題都很重要.聆聽在溝通過程中扮演了很重要的角色.奈何很多人並不喜歡做聆聽者.通常女人想知道男人的一切,而男人却覺得女人煩.有多少人明白到,是因為不安所以才想清楚知道一切?不安是因為對方完全不向自己透露心事,很多時候都要作無謂的猜測.所以算對方未必會明白,也應該跟對方分享工作或生活上的一些事情.可惜有些人總是喜歡單方面"有我講沒你講",亦有些人連五分鍾也不肯"借出"耳朵聆聽.
要經營一段感情並非一朝一夕可以做到,也不可以用一小段時間去經營整段感情.感情是要長久經營,直到最後一刻.感情也不能單方面經營.雖然很多時候看似只是自己一個在努力,其實對方亦有用自己的方法在努力經營.兩個人在一起,不應該計較誰比較"勤勞".為何不能"天天都是情人節",不能"天天都是新婚"?有人說,很難做到...每次去超市買些對方愛吃的,經過商店望一下有沒有對方喜愛的東西,每天多謝對方為家辛勞地工作,每天用幾分鍾跟對方分享一天的點滴,用幾分鍾聆聽對方的心事,見對方開心便一起笑,見對方難過便給對方一個擁抱...很難麼?當然,不會如此簡單.不過重點是給予對方無限的關懷,支持和愛護.怕對方不知道自己有多用心良苦?放心!不需時常掛在口邊,告訴對方自己付出了多少.就算對方多蠢,多鈍,終有一天會明白.不值得為對方付出那麼多?那為何當初要選擇對方?為何現在還和對方一起?
近來很多人對傻魚與傻馬一起多年仍然那麼甜蜜,覺得匪夷所思.時間的長短能正確反映愛的濃淡嗎?傻魚覺得不能.沒有人,甚至連傻馬都未必知道傻魚付出了多少.傻魚並不是想炫耀,只是想告訴大家世上是沒有不勞而穫的,包括感情.還有,請不要為了維持一段感情而去製造一個無辜的生命.很多時候,小生命不但不能令有問題的感情得以收復,反而會製造另一個困局.世上沒有不能解決的事,只有無心去解決的人.兩個人一起,多點溝通,坦誠相對,做多一點,退多一步,大事可化小,小事可化無.願天下有情人,永遠甜蜜恩愛!
2008年2月17日(日)陰
回到香港已有17天...每天都記掛著東京,心情難以放鬆,很不開心.並不是因為喜歡東京或憧憬在東京的生活,只是很記掛著仍然在東京生活的那個人.相識至今,第一次分開過新年,第一次分開過情人節.雖說天天都是情人節,但是在這樣的節日見到周圍的人成雙成對,難免會更倍思念,更傷感.所以在情人節就將自己收在房裏,眼不看視為淨...除了少了個人在身邊那種失落感,還有擔心.擔心那個人吃不飽,穿不暖,睡不好...擔心那個人沒有將家打理好,住得不舒服...擔心那個人沒有人陪會寂寞...擔心得哭了好多場,擔心得失眠了好幾晚.離開前那個人說兩個月很快會過...工作,吃飯,睡覺,一天就過去了.但是周末呢?還有回到家裏自言自語的時候,時間總是難過的.最難過的是孤獨的晚餐,真的會邊吃邊流淚.習慣了一起分享生活上的一切,現在吃到美食或聽到笑話,或看到趣事,通通都不能第一時間告知那個人...4月8日可否明天就到?若然明早醒來見到那個人在身邊,那該多好!很傻麼?
神公傻馬提咗幾次話今年犯太歲,要神婆傻魚去攝太歲.傻魚成日都冇咗回事.今朝起身突然醒起,即刻上網查下邊日係吉日.唔查都唔知,原來今日係吉日喎...雖然之後仲有兩日吉日,但係嗰兩日都唔係咁啱傻馬...冇計,唯有今日去囉...吉時係九點到十一點喎...望下個鍾...十點幾...哎呀~趕唔切添...不過都唔緊要,今日都仲係吉日.唔想自己一個去,又唔知搵邊個一齊去好...即刻行出房門搵奶奶.奶奶即刻換衫同傻魚走去荃灣...點解奶奶咁爽快?梗係喇...奶奶個寶貝傻馬話要攝太歲喎...再加上老爺今年都係犯太歲,順便攝埋.去到十二點幾,好在唔係好多人...
呢個奶奶真係...買香同衣紙嗰陣,人哋話一家有三個攝太歲o既話就要買多份燒畀當年太歲.奶奶就好似專家咁話唔使o架...仲好似講到人哋有心想呃佢買多份咁...都算喇...拜完當年太歲同自己嗰個太歲就要順時鍾逐一拜其他太歲上支香.傻魚見有條龍咪排隊跟住人龍囉...而奶奶就唔理傻魚,一支箭走上前面,傻魚嗌都嗌唔住...結果畀人話.之後跟住條人龍一個一個太歲咁上香,奶奶嫌前面啲人行得慢,走去打尖喎...咁梗係又畀人哋話喇...奶奶即時就反駁喇...結果差啲搞到駡戰...好在對方唔同奶奶嘈啫...奶奶呀...依家係o黎拜神呀...唔係街市買餸呀...畀少少耐性同忍讓下好唔好?下次都係唔好搵奶奶一齊去拜神...搞完都成一點幾...傻魚因為約咗朋友喺中環食晏,所以就同奶奶一齊去到西鐵站各自搭車喇...
食完個晏,順便行去馬會買咗兩張六合彩...見仲早,打咗畀黃小箎...咁啱黃小箎話去銅鑼灣,咁就約埋傾啲嘢.傾完就去咗個即興雀局...諗住今日攝完太歲,應該會好啲啩...點知...輸咗八十六蚊...唉~都係早啲返屋企瞓吧喇...上年打咗七次牌,七次都係輸...好在傻魚唔多好賭錢,如果唔係實輸到破產都似...不過一年打個幾次,當玩下冇所謂喇...至緊要大家高興啫~
尋日去咗滾搞黃小箎.十二點幾先驅車去接狗奴才,然後去會合黃小箎同姑婆一齊食晏.食飽個肚就返黃小箎度,先陪黃大爺去散步...
黃大爺:「嘩~阿媽,今日乜事呀?咁多人陪大爺出巡o既...」
黃大爺興奮出完巡,大家就開始圍埋喺張枱度撚雀喇...今日分上下場...上半場傻魚好鬼旺,一家嬴三家...並不是因為傻魚啲技術非凡,純粹係手風好有運到.打到咁上下就驅車去會合二師兄食晚飯,然後再同黃大爺出多一次巡...之後繼續大殺四方!
黃大爺:「你哋慢慢喇...大爺眼瞓呀...」
黃大爺:「咦?!!膠袋聲!姑婆,係咪有嘢食呀...」正一為食精...有嘢食,連阿媽係邊個都唔會記得...
黃大爺:「唉...好嘈喎...」
黃大爺:「影完未呀?好眼瞓呀...」
黃大爺:「阿媽,你取完暖未呀?好熱呀...」
下半場傻魚氣數已盡...打到今朝六點幾,傻魚倒輸幾十蚊...不過以傻魚咁不知所謂o既打法,算輸得少o架喇...好耐都冇試過咁玩法,個個都攰到散晒...先載姑婆去搭的士,然後送埋狗奴才,返到屋企己經八點幾...搞埋啲嘢,九點幾就暈咗...
瞓到十二點幾好夢正甜,奶奶敲門喎...傻魚扮聽唔到,諗住繼續瞓.點知...奶奶竟然打電話畀傻魚!!!嘩~真係火都o黎埋!!!聽完個電話即刻行出房門發奶奶脾氣...奶奶笑騎騎話唔知傻魚今朝至返,叫傻魚再返瞓喎...奶奶,又話自己好醒瞓o既...成日話傻魚夜瞓喺隔離房有少少聲搞到奶奶瞓唔到...今朝傻魚返到屋企又踼到嘢又有膠袋聲,咁醒瞓點會唔知呀...畀奶奶咁搞一搞,醒晒~完全瞓唔返,個頭痛到依家...慘!!!
今日去咗嫲嫲度拜年同食開年飯...當然,一定係扯埋奶奶去喇...準時十二點鍾去到,凈係見到一個阿叔同姑姐,其他阿叔仲未見人...同嫲嫲拜完年之後即刻攬住隻狗仔喺花園玩,唔敢行埋去嫲嫲度...差唔多一點鍾,都仲未見最細個阿叔一家...年年都係等佢哋...嫲嫲就叫其中一個阿叔打去問下喇...仲未出門口!!!嫲嫲話咗幾句就叫部份人先食唔好等.原本傻魚同奶奶諗住等埋至食,但係老爺走咗去同嫲嫲一齊食,咁唯有硬住頭皮坐埋去囉...好彩嫲嫲好忙要招呼個乖孫o既男朋友,所以傻魚得以安然食完餐開年飯.
食完即同奶奶走咗去放狗,途中見到有隻狗仔喺個街度蕩...可能係個主人開門嗰陣冇留意,畀隻狗仔走咗出街.傻魚見隻狗仔四周圍咁蕩,驚隻狗仔亂走會畀啲車撞親,所以就抱咗狗仔返嫲嫲度,跟住叫其中一個阿叔打去管理處問下有冇人唔見咗隻狗.嫲嫲好開心,話自來狗招財喎...不過好快,個主人就o黎到認返隻狗仔.
見個個食飽坐晒喺度,嫲嫲開始有啲嘢講咁...傻魚就梗係九秒九閃人喇...閃咗去邊?咪過隔o黎街阿關生度避難囉...臨走嫲嫲問傻魚會唔會返去食晚飯,傻魚就話要去機場接朋友然後一齊食,所以唔返喇...奶奶見傻魚閃人,又跟住閃...返屋企先,然後去聽歌喎...喺車站放低奶奶,跟住就驅車去關生度.上咗一陣網,同傻馬傾咗一陣就起程去機場接人喇~真係去機場,冇呃嫲嫲o架...不過係接關生個朋友啫...關生勁搞笑,記錯咗個朋友落機時間,搞到朋友第一次o黎香港就要喺機場乾等半個鍾...接完朋友就一齊返關生屋企.佢哋打咗一陣機,然後就一行四人去打冷.食飽飲漲,又一行四人去附近機舖打機...一行入間機舖,嘩~烏煙瘴氣...乜機舖仲未全面禁煙o既咩?搞錯呀...逗留咗半個鍾倒,就走人喇...關生話帶朋友去買啲嘢,叫傻魚載埋關小姐返屋企.(因為關小姐係住喺傻魚屋企附近.)返到屋企一開部腦就見到傻馬搵過傻魚,即刻搵傻馬傾偈先...
今日好彩冇畀人"盤問"同"圍攻",真係走得快好世界~跟住o黎緊呢兩個月應該都唔會再去嫲嫲度...清明唔知幾號呢?不過已經同傻馬講咗,今年清明就算傻魚仲喺香港都唔會去拜山...傻馬都叫傻魚唔好去.唔係不孝,而係每次都係傻馬上山,傻魚就留喺間祖屋度對住嫲嫲...前幾日搞單咁o既嘢,短期內傻魚都唔想單獨或者近距離接觸嫲嫲囉...四月八號快啲到喇~
今朝九點鍾自動彈咗起身...可能係因為約咗網友媽咪同小朋友啩...十二點會合網友媽咪同小朋友,跟住就去食上海嘢.兩個星期冇見小朋友,小朋友已經唔記得傻魚姐姐喇...可能小朋友覺得呢條傻魚唔係日本嗰條傻魚啩...食飽飽就一齊去行街街,跟住網友媽咪請傻魚食雪糕~例牌,傻魚姐姐都會畀啲雪糕小朋友食.食食下,小朋友見傻魚姐姐唔畀雪糕自己食,竟然嗌:「姐姐~!!!」嘩~小朋友,你咁嗌法,想唔畀你食都唔得喇!!!開心死傻魚姐姐喇~食完坐咗一陣又去行下,跟住小朋友就喺架車度瞓咗.見小朋友瞓咗,即刻搵個地方坐低傾下偈先.小朋友瞓咗九個字,醒返見到傻魚姐姐,好似記返起自己係識呢條傻魚咁,網友媽咪行開一陣都冇喊,仲同傻魚姐姐玩.三點幾網友媽咪要帶小朋友去佢奶奶度,所以就一齊搭電車走喇...小朋友落車嗰陣唔捨得傻魚姐姐,死拉住傻魚姐姐隻手...小朋友,低傻魚姐姐咁鬼鍚你~
返到屋企,因為暈車,所以瞓咗一陣叉下電.七點鍾就同老爺奶奶一齊去尖咀同嫲嫲食團年飯.原本都冇乜嘢.傾偈講起傻魚啲龍貓仔,嫲嫲突然開始出招,o黎料喇.出乜招?咪老人家至叻o既 "快啲生仔"絕招囉...嫲嫲,你想抱曾孫啫,但都唔使話傻魚養啲龍貓係多餘o架...啲龍貓又冇得罪你老人家...之後又問傻魚做乜自己一條魚返香港,留低傻馬一個喺日本咁慘...仲話傻魚唔應該自己一條魚返香港喎...嘩~嫲嫲,你係咪想整喊傻魚呀?你估傻魚好想一條魚返香港o架?!!跟住又話乜有仔乘嫩生,乜老咗你就知,乜年紀大有心無力湊仔等等...之前擺酒單嘢傻魚已經畀佢老人家擺咗上枱,今次呢單傻魚死都唔會就範.乜嘢叫做"你好快啲生喇"呀?傻魚尊重你老人家,唔黑面唔返駁唔發火...畀著係奶奶,塊面早都唔知黑成點囉...呢餐飯,背脊骨落...傻馬又唔喺度頂住,搞到傻魚一條魚受晒...結果點收科?咪傻魚最叻嗰招,扮聽唔到,同奶奶講第二啲嘢...年初二,去拜年,有排受...救命呀!!!
尋晚傻馬話東京落雨好凍,傻魚話香港都係落雨好凍...凍成點?凍到唔怕凍o既傻魚要開缸暖水浸熱個身...可能間房個窗向北,所以比較凍.再加上冇電毯同暖廁板,咪更加覺得凍囉...
今朝傻馬起身開窗一睇...
嘩~搞錯呀!!!等傻魚走咗至落場咁o既雪...唔制呀!!!
個感覺好正呀~
諗返起以前讀書嗰陣,每次一落雪就會同傻馬拎住啲桶去附近停車場運雪返屋企門口堆雪人...嗰陣時幾鬼開心呀!!!傻魚好想砌雪人呀!!!
今日雖然落雪,但係傻馬都照樣出街去咗鎌倉...
見到咁o既景,諗起今個冬天冇去滑雪添...
入黑之後得零度...傻馬話好凍...部相機仲凍到神神地...希望冇壞喇...
傻魚今日做咗乜?咪乜都冇做過囉...架車又拎咗去整,冇車唔出街喇...兩點幾同奶奶一齊落樓下茶餐廳食咗個雞扒餐肉米跟熱華田,之後去白圭買啲嘢就返屋企喇...聽日約咗網友媽咪同小朋友,好期待呀!!!
尋日好早起身,依依不捨送咗傻馬出門口,忍唔住喊咗一陣.見有太陽,洗埋機衫先...跟住就執埋啲行李,然後就開始磨呀磨,切呀切...磨乜?
咪就係磨薑茸同切蔥粒囉...之前買咗幾嚿薑用唔晒,前日咪走去買咗啲蔥,要o黎整薑茸畀傻馬送飯.諗住好快可以搞掂,點知估計錯誤...啲薑多得滯,加上驚磨損啲手指,搞耐咗...跟手準備定晚餐畀傻馬,飲咗碗湯同食埋嚿煲湯瘦肉,再清埋盒超甜草莓...結果遲咗出門口...好在預多咗時間啫...臨出門口嗰陣傻馬打o黎,又搞到傻魚想喊...出門口嗰陣望返入間屋,又忍唔住喊...之後落咗樓唔敢再望返轉頭,狂推住嚿行李去車站.抬件行李上月台嗰陣,唔小心拉親條頸筋...好痛呀...去到日暮里轉車嗰陣,好鬼想喊...忍得好辛苦...好在眼瞓,瞓咗陣...
去到機場排咗一陣,好快就到傻魚.今次件行李重廿五點四公斤,順利入倉...搞掂晒啲登機手續,就去買手信...買咗一大袋,拎拎下又整親隻手指...內出血,好痛...忍唔住喊咗出o黎...去洗手間洗個臉,跟住就入閘喇...出咗境之後又繼續購物,去買下雜誌漫畫...行行下望下個電視仔,諗住確認下登機閘口.點知...班機延遲起飛喎!!!乍乍林打畀傻馬,叫傻馬通知關生,但係搵唔到傻馬...唯有整個短訊畀關生喇...遲咗差唔多兩個鍾,成個機場都畀傻魚行晒咁滯...肚仔餓,走咗去食嘢...臨上機嗰陣至見到,原來可以出示個登機証唔使錢食嘢...蝕咗添...算喇...架機唔爆,傻魚隔離個位係吉o既...飛機餐,都幾好味...嗌咗支白酒飲...食飽瞓唔到,睇下電影又睇下漫畫.空姐派咗幾次飲品,最後嗰輪傻魚要咗杯茶.點知想飲嗰陣拎唔穩,倒瀉咗...好在唔係熱茶,如果唔係隻左肥腿實熟咗食得...個空姐好專業,見到即刻拎咗兩條一濕一乾o既毛巾畀傻魚.之後仲換個杯茶畀傻魚,然後問傻魚仲有冇乜其他需要,服務一流...
返到香港落機都已經成十二點九.打咗個電話返屋企,奶奶話等埋傻魚門至瞓.行李等咗好耐至拎到,推到機場酒店個上客位唔見關生同黃二少...原來仲喺途中...等咗一陣,黃二少打o黎話四號停車場唔畀貨車入,叫傻魚去一號停車場...又行返轉頭...終於見到黃二少,黃三少同關生.上車派完手信,傾下偈,好快就返到屋企.奶奶一見到傻魚就係咁捉住傻魚講啲龍貓仔o既趣事...成兩點幾,奶奶都仲唔捨得去瞓...最後傻魚頂唔順,截住奶奶,叫奶奶早啲去瞓...入房關門嗰陣,隻手指唔小心一滑...左手食指o既指甲崩咗三份二,仲流血添...奶奶見到即刻叫傻魚剪咗啲指甲去,但係傻魚驚會整親隻手指,所以凈係用膠布包住,等好返啲至剪...單手換埋張床單,沖埋個涼,成個人已經散晒...執埋啲衫,關衣櫃嗰陣又撞親右手食指,瘀咗...尋日都唔知做乜,搞到成身傷痕累累...慣咗喺傻家開住張電毯瞓,暖笠笠...屋企張床冇電毯,凍冰冰...結果一條魚喊住瞓...
今日瞓醒都已經係一點半.執埋啲行李同床上面啲熊仔,搞下呢樣整下嗰樣,四點幾落樓睇下架車...老爺話架車冇電撻唔著...傻魚試咗好耐,真係唔得...打畀黃大少求救,黃大少話要夜啲至得...七點幾黃大少打o黎話到咗,傻魚即刻落樓.兩條友一齊推咗架車出停車場,搞咗成個鍾都仲係撻唔到...仲見到架車流紅油添...搵唔到漏油原因,結果要叫拖車拖去附近一間黃大少相熟o既車房...今日冇車用,原本諗住去市中心買啲嘢o架嘛...搞成咁,去到冇晒心機...行咗一陣見咁鬼多人,走咗去茶餐廳食咸魚雞粒炒飯.食完搭輕鐵返屋企,暈車想嘔好辛苦...希望可以快啲拎返架車喇...
