閉關中

架車仲未整好...好似話仲有其他嘢壞...今日原本要去買龍貓糧同出銅鑼灣買嘢,冇車用唯有打消出街呢個念頭...事關一去親銅鑼灣,通常都會好夜至走.冇揸車o既話就要搭通宵小巴,尾站喺屋企樓下,好鬼方便.之但係,試過幾次等咗個幾兩個鍾都唔見架通宵小巴,幾次都搞到返到屋企天光咁滯...上次等到個人好攰,走咗去搭另一架去元朗o既亡命小巴.中途落車行咗廿分鍾,返到屋企散晒之餘仲暈車作嘔偏頭痛搞到瞓唔到...好鬼攞命...所以今日閉關一天,聽日攞返架車至出動囉...

傻馬知傻魚好擔心傻馬餐晚飯,所以近排一條友去咗四次回転寿司,尋日仲去上野買咗兩隻超大毛蟹同兩大嚿吞拿魚刺身,今晚食咗一半,飽到上心口喎...前幾日仲買咗啲大餃返去自己煎,不過煎得唔好落咗好多油...傻魚即刻教傻馬點煎,希望傻馬下次可以煎得好味啲.知道傻馬唔係餐餐食垃圾,傻魚都放心啲.遲啲傻魚返到傻家,話唔定可以偷下懶,等傻馬煮...嘻~

傻馬聽日又一條友去滑雪...傻魚都想去呀!!!唉...算喇...傻魚都係繼續閉關吧喇...