開工大吉

今日係開工o既吉日,神婆傻魚梗係乍乍林一早返公司搞下嘢喇...朝早起身同傻馬傾咗一陣,跟住出門口前喂埋五隻化骨龍貓...結果遲咗出門口搞到過咗鍾去接狗奴才,以致錯過咗吉時開工...不過唔緊要,都係嗰句:今日係吉日喇嘛!返到公司象徵式做下公司嘢,計下數,去下郵局咁...一陣去下"以加"睇下嘢,買下花樽,擺下陣...

今年希望公司可以順順利利有生意,有錢賺.之前做咗好多"畀人搵笨"嘢(朋友話傻魚成日畀人搵笨),希望今年可以發圍...再唔做啲嘢出o黎,傻馬會踼傻魚出街...

開工大吉,傻魚祝所有老闆生意興隆,事事如意,賺到盤滿缽滿;而上班一族就升職加薪,唔使做都有糧出.