暈車...

傻魚又飛喇...香港,一陣見~依家暈緊車,反胃偏頭痛...加上唔夠瞓,好辛苦呀!!!傻馬今日都飛,不過唔同雞場...呵呵~好在傻魚唔係去成田,如果唔係嘔到七彩都似...仲有成個鍾至上機,都唔知做乜好...
題外話...終於發現唔係部腦神咗,係傻家條線有問題!因為依家上網快到曉飛呀!真係激氣~一陣見到傻馬一定要投訴下先...希望下次返到傻家唔再係龜速喇...

出遊氣氛的延續

今日自然醒,兩條友都瞓到好晏至起身.仲諗住去睇祭,但係出門口嗰陣都成三點幾囉...最後改行程去南口行書局...行咗一陣,買咗一本雜誌...跟住順路去埋"東急手",傻魚帶傻馬去睇傻魚想買o既鞋...試咗一輪,心大心細咁...捉個人問下有冇灰色,點知又冇...傻魚想買橙色,傻馬又話太搶眼唔好...結果放棄唔買...見到有人介紹緊啲生姜湯,傻馬走去試飲...跟住買咗兩包畀老爺奶奶.諗住穿高島屋行返去東口,一出個門口見到有個位落地下食品街...好似冇行過呢度喎...傻馬就話未行過去行下...一行落去...出事喇!!!
見到有間賣蛋糕o既,好似幾好味咁喎...傻馬話買...喺同一間嘢又見到另一款好以幾正咁喎...又買!幾日前o既出遊感覺完全返晒o黎...傻魚仲以為自己仲喺旅途中...買完諗住求其行一轉就走...點知經過...

呢間嘢...

畀呢款包吸咗入去...

五彩繽紛,好靚呀!

好多好好味o既包呀!

用真包整o既擺設...

多到唔知買邊樣好...

結果掃咗呢幾款...除咗中間嗰個炸魚包,其他都係聽日o既早餐同午餐...

買完喺隔離見到呢個超大蘋果...仲大個世界一...勁!再行又見到包店,傻馬即刻拉住傻魚走...再行又見到包店,傻馬話唔行走喇!即刻九秒九扯住傻魚走人...途中又見到包店...傻魚對眼好唔得閒,係咁望住啲包...如果唔係畀傻馬拉住,傻魚已經行咗埋啲包度...所以...呢個地方已經畀傻魚列入危險區,而傻馬就列咗呢度為禁區...鬼咩...凈係買包都買咗千幾円...哈!
行返上地面嗰陣,個天都黑齊喇...傻馬即刻拎個相機出o黎,再上多一層去影燈飾.影完就行返傻家...途經字母鞋店,走咗出去睇下有冇傻魚想買o既鞋...搵咗一陣,反而係傻馬搵到心頭好.傻馬睇咗一陣,決定唔買住.唔買咪走人囉...傻馬話想去啲"飛店"睇下有冇平入場券買,所以就兜返去生果舖條街...問過幾間都冇...咁啱又有間字母鞋店,又走入去望下...又見到傻馬對心頭好,仲係做緊特價添...即刻叫人拎o黎試,點知冇碼...傻馬多口問下幾時會再返貨,個店員問傻馬係唔係喺度住喎..傻馬話係,跟住個店員就叫傻馬等下...原來個店員走咗去之前去過嗰間拎對鞋過o黎畀傻馬試.試過就梗係有交易喇...哈~傻魚去睇鞋,變咗傻馬去買鞋...傻馬係咁笑住話傻魚靠害...
返到傻家,求其整咗...

月見山菜烏冬食...終於食完第一袋大山菜...仲有一袋大一袋細,唔知幾時至食得完...唉~

呢個あじ刺身係尋日買o既...食埋佢先...飯後有今日買o既...

好味蛋糕...兩條友食咗一半,留返一半聽日食...下面嗰層好脆,外面甜咗啲...但係因為中間啲酥皮冇乜味,所以一齊食係啱啱好...啲酥皮裡面有蘋果塊,好正!!!上面嗰啲黃色o既唔係好甜,啲生果唔係好酸...一啖咬落去,好好味呀!!!呢嚿嘢一千四百六十円,唔算貴喎...另一個就...過幾日先喇...好飽呀!!!

捕平嘢

今日傻馬要加班,九點幾至返...咁傻魚做乜好?諗起要幫傻馬買嘢,另外自己又有嘢想買,所以就決定出街喇...點解今日唔見傻魚話開機洗衫?因為由尋晚開始落雨,落咗成日都仲未停...喺傻家睇咗半日雨,終於捨得換衫出街喇...落雨唔可以驅車,唯有搭電車囉...先去南口"東急手"幫傻馬買嘢,然後去東口三樓間三百円店買嘢...因為唔記得帶電話,所以完全唔知幾點鍾...好似差唔多夠鍾去執平嘢喎...快步穿地底行過去西口...咦?!!點解冇乜人o既?!!實係未夠鍾喇...搵o黎搵去都搵唔到個鍾...是旦喇...蕩下囉...於是,傻魚就開始喺個超市裡面係咁蕩,不停咁望實啲著藍色衫o既叔叔...一見佢哋是旦一個行埋去啲凍櫃度,就即刻行埋去睇下有冇貼半價貼紙...
就係咁,傻魚喺間超時度蕩咗個幾鍾捕平嘢...得返o黎o既成果就係...

呢盤刺身...四人份,半價一千四百九十円!另外買咗舊枝豆豆腐,好味...返到傻家即刻煲豆豆湯,然後煲飯...傻馬九點幾返到o黎即刻可以開飯...開埋個擺咗好耐o既蟹肉罐頭畀傻馬食...落雨凍冰冰,晚餐都係食啲凍冰冰o既嘢...好在有碗熱飯同熱湯啫...

足不出戶

連續三日,足不出戶,係咁洗洗洗...衫...今日洗一機厚外套,加一機毛巾...吸下塵...整咗個山菜螺絲粉食...講起山菜就真係...傻馬知傻魚好鍾意食山菜,所以之前傻馬自己一隻馬北上影紅葉嗰陣見到有山菜賣,諗都唔諗就買咗兩大包...跟住返到東京竟然畀傻馬喺"牛牛"搵到山菜喎...阿傻馬哥,"牛牛"不嬲都有山菜賣o架喇...有乜咁出奇啫...隻傻馬竟然喺"牛牛"又買多包細山菜...真係唔得佢死過...結果傻馬梗係冇食到,等傻魚返到東京"清倉"喇...傻魚已經食咗兩日山菜烏冬做晏,都仲係講緊食咗三份一大山菜咋...真係多得傻馬唔少呀...
之前睇"辣口電台人"教煮超綿粥,傻魚又發姣學人整...不過傻家冇高煲喎...是旦喇...用個大煲煲少少,都一樣得o既啫...可能係日本米o既關係,好索水...跟住啲米"爆"得好勁...大火煲,真係唔黐底,唔會煲燶粥...

落咗蠔豉,乾瑤柱去煲...跟住見差唔多得落埋啲皮蛋同瘦肉...唔知係咪咁煲o既呢?啲皮蛋係咪要煲耐啲呢?傻魚煮飯真係亂咁o黎o架...由於啲材料好正,所以好好味!呵~
晚餐凈係食粥好似齋咗啲...之前同傻馬去業務超市嗰陣,傻馬見到啲雞皮串話想食.買咗咁耐都仲喺沉喺個冰箱底...睇o黎都係時候摷返啲"皮"出o黎...

冇炭爐燒咪用鑊煎囉...最緊要係煎走啲油...落埋啲椒鹽,脆脆哋,好味...不過呢啲咁o既嘢,食完唔會再買...間唔中出街食下咪算囉...好油膩呀!!!

繼續忙繼續攰

今日繼續開機洗淺色衫.等緊機衫o既時候收起曬咗兩日o既細床褥,然後抽起張細毛被,換返張大毛被落去蓋住張發熱電毯...晾完衫又繼續開機洗埋兩張細毛被...然後拎啲枕頭出去曬...真係攰到趴街...條腰骨仲痛到死添...
咁攰,今晚都係唔好搵咁多嘢搞...話口未完,又屎忽痕冇嘢搵嘢o黎搞...前日送完關生關太去駅之後,買完日用品經過一百円店,走咗入去買少少嘢...結果手痕買咗個方鑊...今日屎忽痕見個雪櫃有蛋,學人整日式煎蛋...

味道唔錯,但係有待改良...其他就切切切,擺埋一堆...西蘭花烚一烚,開個罐頭螺片,拎起啲螺片堆埋一堆用西蘭花圍起,啲汁就倒落鑊,加啲瑤柱絲,埋個芡淋上面...搞掂!!!算係咁喇...咁攰都有四餸一湯...

忙加攰

可能慣咗早起身,今朝九點幾就起咗身...尋日洗咗一機淺色衫同一張大毛被,曬咗張細床褥...今日繼續再曬張細床褥,洗多機深色衫,再洗細床單同啲枕頭套...真係又忙又攰...仲有三機嘢要洗,不過由於冇位晾,要等聽日同後日至洗...洗完晾完都成兩點幾...休息咗一陣,又要開始執啲"戰利品"...買咗咁多嘢,都唔知擺邊好...仲有就係,買咗咁多零食,都唔知要點食同食到幾時至食完...今次仲唔肥上加肥?!!食完上唔到飛機返唔到香港點算?唉~最衰都係傻馬,呢樣又話係傻魚鍾意食,嗰樣又話係傻魚想食,結果買晒返o黎傻馬又唔食...
執完嘢攰到想死...抖咗一陣,見好似好耐冇煲湯,乍乍林煲返煲湯潤下先...出遊之前買咗包水菜,再唔整就要益隻臭垃圾桶...問傻馬點整,傻馬話不如整腐乳水菜...吓?!!

都係腐乳通菜好味啲...清埋之前買o既番茄仔...雪櫃裡面啲舊材料終於都食完喇~

北東北之旅的總結

今次出遊算係咁多次以來最舒服o既一次日日食完早餐可以返房休息,每日行程都係差唔多中午至起行,天黑就收工...但係對關生關太o黎講就辛苦喇...因為關生關太慣咗去旅行係去嘆世界,唔會好似今次趕騾仔咁...最弊o既就要數關生唔舒服,以致好多行程都要取消或延遲...不過唔緊要...出遊最緊要玩得開心.希望關生關太玩得開心.
今次使咗幾多錢?以二人價錢計,最貴要數酒店,用咗九萬四千四百三十円.跟住就係車錢,用咗五萬二千七百六十円.都唔知食咗啲乜,可以食成二萬七千三百七十五円...勁呀!!!買手信同物產都唔少嘢,用咗一萬五千四十二円.而其他啲入場費同雜費就用咗三千七百零六円.今次出遊算係最金o既一次,兩條友總共使咗十九萬三千三百一十三円!!!玩完返到東京,正式宣布破產~
再講多少少有關今次之旅...關生關太o既三大行程...

上車瞓覺,落車食飯,狂逛超市便利店...而關生就再多兩樣,食完就嘔,嘔完再痾...佢兩個真係好勁o架...上車瞓到落車,落完車再上車再瞓過...仲有就係去親超市同便利店都一定買到嘢...關太係咁食布甸,軟雪糕...係日日都食,一日食幾杯嗰隻喎...勁~

呢啲係關生關太今次o黎日本o既"戰利品"...好似話仲有啲冇拎出o黎影喎...
傻馬同傻魚都唔弱o架...買咗...

蘋果汁...

蘋果沙律醬...

青森產有名蒜頭粉...

秋田o既稲庭烏冬...

買畀老爺奶奶食o既稲庭烏冬...

買畀奶奶食o既昆布零食...

買畀老爺食o既黑醋蘋果乾...

傻馬買畀傻魚食o既南部煎餅...另外買咗一筒畀老爺奶奶,再買一盒大o既畀嫲嫲...

傻馬買畀自己o既蘋果朱古力...另外仲有另一款蘋果朱古力...

左邊係傻馬o既,右邊喺傻魚o既...仲有其他,但係唔放咁多上o黎,費時嚇親人喇...

出遊當然唔少得要儲印仔喇...呢度只係四份一...
出遊總結報告完畢!講返今日...今朝傻馬返咗工之後,關生同關太就起身梳洗,出街食早餐然後去原宿.關生有叫埋傻魚一齊去,不過傻魚實在太攰同有太多嘢要做,所以推咗.等關生關太出咗街之後,傻魚就開始洗衫,吸塵,曬床褥,洗廁所,熨衫...啱啱熨緊最後一件恤衫嗰陣,關生就打o黎問傻魚食咗晏未,叫傻魚一齊去新宿食拉麵...當然係要傻魚諗埋去邊間好味拉麵店食喇...傻魚見關生關太今日返香港,即刻打畀傻馬問之前喺新宿食過好味o既拉麵店喺邊.
喺新宿駅東口會合完關生關太,就行過去歌舞伎町...啱啱行上樓梯,關生就話一係去傻魚話好味蛋糕間嘢度食...又好...不過三點幾呢啲時間一定好多人...去到見到有龍仔,傻魚話不如食拉麵算喇...呢間留返下次關生關太再o黎玩嗰陣至食.之後就穿地底過去歌舞伎町,好在好快搵到間拉麵店...啲相...喺關生度,唔記得抄添...哈~
食完行返傻家途中經過超市,走咗去買餸.求其買咗少少嘢,費時要關生關太等喇...而關生關太就梗係又有收穫喇...買完返到傻家,關生關太就執埋啲行李.關生關太休息咗一陣,五點鍾就起程去機場.傻魚送關生關太去駅,幫關生抬一件細行李上埋月台,等埋架車o黎,送埋關生關太上車.之後走去買少少日用品,返到傻家休息一陣又要開工喇...

好攰,加上近排食咗好多嘢,唔係咁想同埋唔知食乜好...求其整啲開胃嘢,咁又一餐.最重要係傻馬唔介意,整乜食乜嗰度好~嘻!今晚開始傻家又回復平時o既寧靜...但係硬係唔多自在...可能係因為少咗啲人氣同人聲...不過唔緊要...好快又會喺香港見!!!呵~

北東北之旅(六)-岩手

尋日暈車偏頭痛,結果瞓得唔係咁好...今朝諗住食埋酒店啲新鮮出爐麵包,然後早啲出發.但係因為唔係咁舒服,加上酒店最遲十一點退房,所以瞓多陣...退完房將啲行李擺喺酒店度,又係時候去醫下肚喇...

一行出酒店就見到蘋果...

一入地下街就見到"豬包"...想買o架...不過都係食咗個晏先算...

呢間好似幾好味咁喎...

傻馬個餐...正爆!!!

傻魚個餐,好味到暈~

關太個餐,好鮮~

關生見今日好似有乜嘢有返胃口,所以叫咗個餐...

食完行去駅...經過物產街...

想買包試下,不過傻馬話唔食,咁唯有放棄囉...慳返...

好多乾海產...

穿過駅...

得意...

行出駅去巴士站...

搭呢架巴士...

去呢度...又暈車,好唔舒服~

初詣...不過冇求簽...

呢個至係正門...

轉個彎,行五分鍾...

去睇啲舊建築物...

好得意...

再行...

呢間好舊...買家品...

好大個鮑魚擦...

好耐歷史o既消防局...

行到好攰...入去休息下先...

唔知可唔可以玩下呢?

坐低嘆下茶食個餅先...呢間舖免費提供茶水同餅畀入o黎o既客人享用...

飲咗人哋杯茶就梗係要貢獻返啲畀人喇...買咗啲手信...飲飽嘆完又繼續行...

成個箱咁...

咁熟口面o既...喺邊見過呢?

呢度直行就可以去返之前間寺廟...

呢棵個百年桜花樹,如果開花一定好靚...跟住又搭巴士去另一個地方...

點知去到至知今日冇開門...唯有求其影幾張相交差,然後搭巴士返駅...

終於畀傻魚喺駅條物產街搵到之前喺仙台食過好好味o既豆腐魚餅!!!即刻買半打~

冬天真係黑得快...見仲有時間,又返去酒店附近條地下街...

飲抺茶~

行下街見到毛毛"爸",個個都走埋去摸下佢...坐咗一陣又蕩咗一陣,關生同傻馬返酒店拎行李,而傻魚同關太就繼續行街...之後喺駅集合...

等呢兩架車"咀"埋之後就可以上車喇...回程又係得返企席...傻魚見對面架新幹線有自由席,而且冇乜人排隊,即刻叫關生關太過對面架新幹線...可以搭第二架又有位坐就無謂企三粒鍾喇...企企下...

呢位嬸嬸叫傻魚入去坐...原來有啲人買咗飛冇上車,有啲吉位係可以坐...不過就要加錢.好在傻魚嗰張係放題車飛,唔使加錢啫...坐咗個幾鍾架新幹線去到大宮之後好多人落車,傻魚即刻走出去叫傻馬入o黎一齊坐...返到上野駅傻魚個頭痛到就o黎爆,乍乍林去便利店買支水食藥,然後去查下關生關太搭嗰架新幹線幾點到.原來嗰架遲十分鍾開車,但係就遲成個鍾至到上野駅...即刻打畀關生同關生講傻馬同傻魚先返傻家,一陣喺新宿月台等...返到傻家即刻執埋啲行李,然後就夠鍾搭電車去新宿...咁啱大家都係搭同一架電車,咁就唔使等o黎等去喇...去新宿做乜?咪就係去西口食關生至愛o既咖哩囉...

傻馬個炸雞扒咖哩...

傻魚個脆雞咖哩,好味~

關生同關太嗌同一款牛肉咖哩...食完就行返傻家,費時抬行李上落月台咁麻煩...今晚又冇覺好瞓喇...關生已經奏緊交響曲...好在過咗今晚傻家就會回復平靜...不過熱鬧咗咁多日可能會唔慣...就係咁個假期就結束咗喇...