今日都唔知做乜...正話無端端仲打爛咗隻碗添...打爛嘢好平常啫~弊在傻魚打爛咗最心愛o既熊仔碗呀!即刻赤到入心入肺,九秒九喊住話畀傻馬知...呢套熊仔碗碟本身係有兩隻碗兩隻碟同兩隻瓷匙.幾年前喺日本搬o黎香港嗰陣爛咗一隻碗同一隻碟,之後仲畀奶奶整爛咗一隻瓷匙.其後一次失魂,自己打爛埋另一隻瓷匙.雖然黐返,但係就用唔到收埋咗.當時喊咗成個鍾...次次去親日本都會四周圍搵,睇下搵唔搵得返.次次都失望而回.今次搬返日本都係咁...點知,今日仲要打爛埋隻碗喎...心痛死傻魚喇~
依家凈返呢隻碟,雖然唔係乜貴嘢,但係傻魚唔會捨得用.一陣出去拎返入房收埋佢.有冇人見過邊度有得賣呀?傻魚好想買返呀!搵咗幾年都搵唔到,唔通好賣到斷咗市?嗚~唔制呀!!!
今日去咗嫲嫲屋企開生日會.三點幾去到諗住會即刻開餐切蛋糕,跟住食到六七點散會.點知其中一位阿叔遲大到,成村人等佢一家等到六點...切完蛋糕食完嘢七點幾就同奶奶返歸同啲龍貓仔沖涼喇.
今日做過乜唔係重點.重點係尋日傻馬畀咗張相傻魚睇,搞到水浸房間...前日星期五,傻馬走咗去上野諗住買褲.結果買唔到褲,但係就記得去買之前傻魚帶傻馬去買過o既好好味超大餃子.
呢間舖其實係一間中華料理店.其他食物好唔好味,傻魚唔知.但係個超級大餃子就真係好好味.每次去親上野都一定會外賣返屋企.外賣o既話可以買已經煎過o既,又可以買未煎過o既大餃子.對於懶人傻魚o黎講,就梗係買煎過o既,返到屋企叮返熱就食得.今次傻馬確係醒...可惜傻魚唔喺傻家冇得食~咁點得o架!!!仲要畀啲相傻魚睇...搞到傻魚啲口水係咁流,成房都濕晒喇~唔制呀!!!十一月返到傻家一定要食返夠本至得!!!
今日係老爺生日.正話同老爺奶奶一齊去食咗餐晏仔當同老爺慶祝生日,跟住順手買埋個蛋糕仔今晚切.原本老爺話唔使買蛋糕,因為星期日喺嫲嫲度搞生日會有蛋糕.但係傻魚覺得正日生日冇蛋糕好似唔知點咁.所以食完飯就同奶奶一齊去買咗個蛋糕仔喇.一陣切完個蛋糕仔,傻魚就會起程去機場接關生,之後關生請食飯!開心開心~
正話好友天使打o黎講公事,開口一句劈埋o黎...
好友天使: 「點呀?畀人激死未呀?真係唔識話你...你明知自己額頭有行字o架喇...都唔係第一次喇~」
傻魚: 「傻魚諗住...」
好友天使: 「你次次都係咁...真係畀你激鬼死呀!」
件事搞成點?咪冇咗下聞囉...星期三嗰日太子女打咗兩個電話o黎,但係傻魚就冇接.一般啲人遇到咁o既情況都會留言叫傻魚覆電話.但係呢個太子女好明顯唔係一般o既人囉.冇留言之餘,到今日呢一刻為止都冇再打o黎喇...究竟佢想點啫?唔理喇...呢份工唔會做o架喇...就算依家佢話出埋機票酒店都唔會睬佢...點知之後佢會點使死傻魚o架...都係制唔過呀~
唔知點解,傻魚成日畀人搵笨...可能啲人睇中傻魚份人冇乜所謂,見傻魚唔介意,諗住使得就使啩~好似今次件事咁,傻馬係嬲到想殺人,連傻魚都鬧埋一份...結果咪又整喊傻魚囉!
話說關生有位同行朋友想開日本條線,但係又唔識日文,公司又唔想喺未有回報o既時候請個人坐喺度.咁啱傻魚跟傻馬過日本,關生見傻魚得閒,諗住個同行朋友既然都需要個識日文o既人幫手,咁咪介紹傻魚畀個同行朋友囉.原本都幾好o架.有錢收又可以打發時間.仲話八月尾會喺東京參展,搵傻魚幫手做翻譯.但係咁啱傻魚喺七月中返香港,八月唔會喺東京.關生就叫傻魚自己同佢哋傾睇下可以點做.
開頭間公司諗住傻魚喺東京,所以就冇預到要出機票畀傻魚.當間公司知道傻魚唔喺東京,就同傻魚講老細唔肯出機票,睇下傻魚可以點就.傻魚見係關生啲朋友,都諗住如果人工夠買機票同其他雜費,今次當白做,下次再賺過...傻馬已經好唔開心o架喇.但係見唔使自己貼錢,當時都冇出聲反對.之後關生個同行朋友帶埋女友(公司太子女)過日本視察市場,順便搵傻魚傾下.結果成餐飯凈係不停問傻魚之前做過乜翻譯,好似見工面試咁,完全乜講過想傻魚點幫佢,點同傻魚計...個感覺就係,山長水遠o黎日本搵傻魚凈係想知傻魚之前做過乜...咁都算喇.關生個同行朋友問傻魚拎咗個電話號碼,話等傻魚返到香港會搵傻魚食飯.但係當傻魚問佢拎返佢個手提號碼嗰陣,佢就話佢會搵傻魚o架喇,放心咁...有冇搞錯!!!
好喇~傻魚返到香港喇...佢之前喺日本嗰陣話會喺傻魚返到嗰個星期搵傻魚.等咗幾日都冇消息,咁咪問傻馬囉.因為傻馬之前同關生一齊去打波,咁啱關生個同行朋友都有去,叫做打過場波識得,上網見到會打招呼嗰隻.傻馬上網見到佢咪問佢幾時會搵傻魚囉.佢話一兩日內會搵.咁傻魚又等囉.傻魚唔係因為要等佢嚿錢o黎開飯,而係若果係傾得成,傻魚要即刻訂機票o架嘛...咁拖法,傻魚啲時間都唔知點算好.等到佢打o黎話約食飯,諗住可以同佢單獨傾,點知佢又係同太子女女友一齊見傻魚.咁咪即係話佢冇權話事,實質上傻魚係要同太子女傾囉.結果約咗星期二食飯.
前日星期二,佢哋請傻魚去食泰國嘢.一坐低已經問個太子女,公司係咪一定唔肯出機票.太子女話係.咁傻魚已經好坦白咁同太子女講,如果啲人工係夠畀傻魚啲經費o既話都冇問題.太子女即時問機票要幾錢,雜費係啲乜要幾錢.當時心諗,邊有人咁傾嘢o架?都算喇.之後太子女問傻魚之前幫日本啲同行做翻譯收幾錢.話咗畀佢知,佢就話佢哋之前係美國係畀開一日八十蚊美金o既...咁啫係點呀?傻魚好想講,阿姐姐仔,依家你係講緊日本唔係美國呀!傻魚喺香港都唔只收呢個價喇!傻魚當佢入世未深,唔同佢計較.太子女仲同傻魚講佢有個日本人好朋友喺日本...咁啫係點呀?跟住大家傾啱一個做四日o既價錢同其他津貼,其實係老友價大贈送嗰隻,跟住諗住搞掂走得.點知臨走嗰陣講開佢哋會幾號過日本同幾號會走,阿太子女突然話其實第一日係執場,唔需要傻魚在場.阿同行朋友就話,唔緊要,可以叫傻魚幫手執嘢.跟住阿太子女就打晒眼色話一陣至同佢講.跟住就遞咗袋嘢畀傻魚.裏面有一大疊邀請信同一張地址清單.太子女話聽日會電郵一份嘢畀傻魚,想傻魚印出o黎入埋落封邀請信裏面,跟住寄去日本.然後仲會電郵一封英文邀請信,要傻魚翻譯成日文跟住幫佢電郵畀佢啲日本客,仲叫傻魚用自己個名出喎.咁傻魚就問佢,傻魚以乜嘢身份去做呢樣嘢?佢叫傻魚以佢公司員工身份去做.跟住傻魚就話,咁如果啲客打去你公司搵傻魚,咁點呀?傻魚唔會喺你公司o架啵.咁傻魚係咪要落埋自己個手提呀?太子女唔知傻魚係暗寸緊佢.太子女話,咁傻魚落埋個電話囉!之後仲話寄咗幾錢到時出糧會一齊畀返傻魚,仲問呢啲嘢唔會左傻魚好多時間o既啫呵...佢完全冇個意識係要出返糧畀傻魚.傻魚拎住袋嘢呆咗一呆,跟住佢哋就話拜拜喇.
一路返屋企越諗越唔對路.返到屋企完完整整話返畀傻馬知.傻馬越聽越嬲.傻馬話,佢哋一句唔肯出機票,傻魚已經係蝕緊畀佢哋.仲要咁老馮叫傻魚做埋佢公司庶務o既嘢.邊會有人肯貼埋錢用自己o既紙,墨同電去幫人哋公司做嘢o架?仲未計啲時間同勞力喎...原本收咗線訓覺,結果係嬲到訓唔到起身再搵傻魚傾.傾到興,仲叫傻魚收聲喎...做乜鬧傻魚啫?!!即刻爆水管呀~傻馬話傻魚一定唔可以做呢份工.跟住傻魚即刻畀個短訊關生,叫關生打畀傻魚.由於關生身在米國,所以冇即時搵傻魚.尋日傻魚專登唔接太子女電話.同網友公主去食飯之前咁啱見到關生上網,即刻同關生報定案先.之後關生見事態都幾嚴重,就打畀傻魚傾,仲話可以唔使理關生,如果傾唔掂就唔好做.尋晚再同傻馬傾咗個幾鍾,傻馬係死都唔畀傻魚做呢份工.依家,咪唯有等太子女打o黎睇下佢想點,跟住推鬼咗佢囉...八月尾...冇得返東京...哎~點解成日都會遇到啲咁o既嘢?成日畀傻馬話傻魚豬咁蠢,激鬼死傻馬...
尋日係一個好重要o既日子.(唔好問係乜嘢日子,傻魚係唔會開估o架.)好可惜唔可以同傻馬一齊過...好遺憾~好在尋日唔係自己一個留喺屋企,如果唔係可能會喊死!
朝早起身上網唔見傻馬,好失望.跟住冇乜心機咁坐喺張床度發呆.好友最近頻頻去睇樓諗住買層樓年尾結婚,所以約埋傻魚去幫下眼.
返到屋企都成十二點幾,諗住傻馬應該訓咗.上網仲見到傻馬咪諗住睇下傻馬會唔會應囉...點知傻馬仲未訓等傻魚返o黎喎...
傻馬:「正話喺超市,望住啲餸都唔知買乜好...想買肉,但係又唔識整喎...」
傻魚:「哈~傻馬依家知傻魚次次去買餸嗰陣有幾頭痛喇~」
傻馬:「嘻嘻~」
傻魚:「等傻馬仲諗住傻魚日日喺屋企唔使做好嘆咁...一起身就要諗嗰晚要煮乜,有時諗到六點幾都仲未諗到呀!真係諗到頭都爆,人都會癲~」
傻馬:「呵呵~」
傻魚:「咦~咁以後傻魚咪可以慳返唔使煮,等傻馬煮飯囉~」(古古惑惑咁~)
傻馬:「邊似傻魚咁會整咁多餸呀...傻魚整o既好食好多~」(賣口乖!!!)
傻魚:「唓~仲諗住可以唔使做嘆世界添~」
傻馬:「呵呵~」
傾咗一陣,見日本都成兩點鍾,乍乍林叫傻馬訓,費時今朝起唔到身返工喇~今晚叫傻馬影啲晚餐相畀傻魚睇先~好期待呀!
開估喇~一返到屋企氣都未抖順就即刻報導下...由於題材敏感,所以傻魚用咗代號.明o既就至好喇.唔明o既就唔好意思,傻魚不多作解釋喇~
今日返乜工?其實之前有寫過...係幫一間顧問公司做翻譯.呢間顧問公司專門幫啲"外國小朋友"喺香港某間大型"遊樂場""咸豐"o既總部度申請"會籍"擺"玩具".原本一向都相安無事,直到幾個月前"咸豐"出咗個新"會籍".呢個新"會籍"o既賣點係放多過某件"玩具"就唔需要畀手續費,比舊"會籍"低好多,但係服務就當然會差啲喇.轉咗申請呢個新"會籍"個幾月,問題開始出現.
話說新"會籍"o既服務低咗,本來唔會再有專人接待.公司多次以人多為由向"咸豐"要求專人接待.但由於服務質素差咗,申請o既過程亦因而拉長,搞到之後o既行程亂晒.公司咪向"咸豐"有少少微言囉."咸豐"就回應,其實如果冇專人接待,可能仲會快啲.所以上次就冇要求專人接待,改用普通街客流程.問題就o黎喇..."咸豐"見公司啲人一次過拎咁多份申請表,覺得公司左住佢啲街客,所以就唔理啲"外國小朋友",做咗自己啲街客先.結果"外國小朋友"要等好耐,嚴重拖慢咗個行程,仲搞到要取消嗰日之後o既所有行程.當然,公司又再搵"咸豐"高層投訴喇.
到今日,都預咗個情況唔係咁樂觀o架喇.結果今日"咸豐"玩嘢,差啲整死公司.一早去到已經有另一班"外國小朋友"排緊隊.入到"遊樂場"拎申請表嗰陣,前面已經有二十個小朋友.等咗半個鍾,凈係做咗一個小朋友.再等多半個幾鍾,先至去到第五個.咁搞法,又有排搞,去唔到下一場o架喎.見形勢不對,負責人即刻打畀老細,老細九秒九跑o黎睇下乜情況.跟住老細搵"咸豐"高層傾偈.結果談判破裂,即時發難話唔會再批"會籍"畀唔識中英文o既"外國小朋友".
當時傻魚幫緊其中一個"外國小朋友"填"會籍",見"咸豐"高層行埋o黎同員工咬完一輪耳仔之後,員工o既動作即時慢咗廿幾拍.搞咗大半個鍾終於搞掂,諗住去幫下一個.點知畀負責人叫咗去幫另一個填緊"會籍"o既"外國小朋友",因為個翻譯唔係咁熟手.喺完全唔了解發生緊乜事o既情況下行埋去,一問之下...奶嘢!!!原來呢兩位"外國小朋友"帶太多"玩具"過o黎,但係都有"外國遊樂場"o既"會籍"簿証明啲"玩具"o既來源.以往都係咁做完全冇問題.今日突然話如果冇"外國遊樂場"o既信註明啲"玩具"真係喺嗰間"外國遊樂場"度拎出o黎o既話,"咸豐"係唔會接受"會籍"申請.結果嗰兩位"外國小朋友"同另一位咁啱仲未輪到o既"外國小朋友"申請唔到"會籍".頂~
喺"咸豐"申請唔到"會籍"咁點算?!!傻魚同另一個公司人唯有帶啲"外國小朋友"去"查丁遊樂場",睇下可唔可以申請囉.一問之下,"查丁"話冇問題,但係就要提交有法律效力o既英文住址翻譯証明.一時間去邊搵呀?!!結果又唯有放棄.兩個"外國小朋友"帶住一大袋"玩具"返去"咸豐"會合負責人,跟住就帶佢哋去食飯.嗰時已經過咗十二點半.食完晏仲有另一班"外國小朋友"."咸豐"總部話明唔會再接受公司o既申請.負責人認為只係總行玩嘢,所以分散晒幾隊去唔同o既分行試下,希望可以申請到"會籍".
傻魚帶住四個"外國小朋友"飛的去隣近"咸豐"分行.一行入門口,個員工就問傻魚o黎做乜.傻魚話想申請"會籍",咁個員工就問係邊幾位申請,仲問傻魚係唔係啲顧問公司職員.傻魚梗係話唔係喇.個員工之後又問啲"外國小朋友"識唔識英文.傻魚話識,咁個員工就畀咗啲申請表佢啲.填申請表嗰陣,員工唔畀傻魚埋身做翻譯.之後見啲"外國小朋友"唔係咁識英文,就話唔接受申請.冇計咪唯有拉大隊走,跟住打畀負責人.負責人話其他隊好多都係申請唔到,叫傻魚帶啲"外國小朋友"去"絲帝遊樂場".最終成功喺"絲帝"申請到"會籍".
之前帶咗好多"玩具"o既兩個"外國小朋友"結果點?梗係怒髮衝冠喇.公司派專人帶佢哋去"咸豐"開高級"會籍",結果都係因為唔識英文而被拒於門外.最終都係要喺"絲帝"申請"會籍".但係由於"絲帝"唔接受當場入"外國玩具",所以所有"外國小朋友"要帶返啲"玩具"走,返到"外國"再電滙過o黎.第二批"外國小朋友"只有兩個成功喺"咸豐"申請到"會籍",原因係個翻譯唔似翻譯,似朋友,所以成功咗.另外之前亦見到有"外國小朋友"成功擺低超多"玩具"...仲唔係玩嘢?!!
今次"咸豐"咁玩嘢,下個星期一唔可以再去"咸豐",要搵過另一間"遊樂場".咁大間"遊樂場"竟然做埋啲咁小家o既嘢...傳咗出去畀人笑死喇~老細仲未諗到可以去邊間,真係頭痛.傻魚已經打去"哈生遊樂場"問過,"哈生"話冇問題.之不過就冇專人接待.呢個都唔係重點.重點係申請到"會籍"就得喇...星期一...睇下點囉...傻魚依家身心疲累,心力交瘁...今晚要早啲訓...(聽住先喇~)
前日...成晚冇訓,上下網又望下傻馬.朝早五點開始落狗屎.諗住唔會落好耐,點知到六點幾出門口嗰陣都仲係咁...傻魚拎住盒桃,加個布袋同拖住個行李,好鬼狼狽~如果冇雨,傻魚會將個布袋放喺行李上面,咪唔使拎咁重囉...落雨驚個布袋會濕,加上把傘遮唔到個行李箱,結果拎住十幾公斤o既布袋加把傘再推住個廿二公斤o既行李,用咗十幾分鍾至到電車站.
搭唔到原定架電車,唯有打畀傻馬問下班車幾點,去到機場幾點咁.傻馬即刻上網摷,跟住話下班車去到機場八點四喎...大鑊喇...十點二起飛,得返個半鍾,唔知會唔會排長龍添o架...冇計...都係焗住要搭o架喇.去到機場,望下個錶,八點半!!!弊!!!由於啲行李太重,傻魚想快都唔得.去到櫃位,好在都唔使排好耐.九點鍾就拎到登機証.乍乍林行入去過關,點知就發生咗大和國搶錢事件喇.傻魚梗係唔會畀錢,乖乖咁交出外人証,跟住就去逛書店買雜誌喇.之後喺候機室坐低諗住上網搵傻馬,點知成田空港係冇免費無線上網服務o架~乜都係錢...梗係唔會畀喇...咪打電話囉.家族計劃廿四小時任傾,梗要用盡佢喇.坐咗十分鍾都冇,就登機喇.
上到機又同傻馬講咗次電話,跟住咪飛線去傻馬度囉.咁啱畀個空姐見到,即時要求傻魚熄電話.傻魚咁聽話,梗係乍乍林飛埋條線熄機喇!起飛之後訓咗半個鍾,食咗個午餐之後又訓咗個半鍾.一點半到香港,拎埋啲行李出到巴士站兩點鍾,竟然又落雨喎~係都要淋下傻魚至甘願!吹漲~返到屋企三點幾,老爺喺屋企等緊傻魚.擺低啲嘢入房,即刻走出廳搵啲龍貓仔.天氣好熱,隻隻都熱到灘咗喺度...跟住開始執行李.老爺見傻魚平安返到,跟住就出街,凈返傻魚同奶奶兩個人食飯.
奶奶抬咗半個大西瓜返o黎,問傻魚想食乜,傻魚例牌話是旦.奶奶擺低啲嘢又落街買餸.執完行李上網見到傻馬,傾咗幾句傻馬話收工返傻家.一個鍾都唔使,又見到傻馬上網喇.傾下傾下傻魚開始喊.點解?因為傻馬話返到屋企見唔到傻魚,覺得好悶.講嘢又冇人應,好慘~仲話想傻魚早啲返傻家.聽到即刻收唔到制呀~摷返個眼仔出o黎裝完,見到傻馬一個人食即食飯...
傻魚知傻馬掛住啲龍貓仔,影定一堆相畀傻馬睇.跟住又帶咗幾隻入房放喺眼仔前面畀傻馬見下囉.之後到傻魚食飯嗰陣,見到樣樣都係傻魚鍾意食o既,但係就冇胃口.返香港之前話要返去食呢樣食嗰樣.返到有得食,但係就唔想食...鬼咩?!!都冇人一齊分享,就算幾好食都好,擺入口都覺乏味.再諗起傻魚有咁多好味嘢食,但係傻馬就要食即食飯喎...(死喇死喇...又漏水喇~轉話題!)
食完飯一路換床單,一路同傻馬視像.跟住關生打o黎話夜啲搵傻魚拎嘢.同傻馬又傾咗一陣,傻馬話眼訓,仲話開住個視像畀傻魚望住傻馬訓...但係傻魚要拎埋啲嘢落街去車站等關生.結果叫傻馬熄咗個視像訓.同關生傾咗一陣,行出個車站一睇...搞錯呀?!!又落雨?傻魚仲唔係條富貴魚?次次出門口就落雨...返到屋企奶奶切好晒啲西瓜畀傻魚食.明明好想食o架...如果係平時,傻魚一定會食晒半個,尋晚食咗幾嚿竟然唔想食喎...之後沖咗個涼,坐喺張床度又收唔到制係咁漏咗成個鍾水...今朝起身對眼腫腫地...出街又鬼火咁熱~冇乜心情,唔整洋蔥頭仔喇...今次睇住啲字先喇...
入境時,傻魚已好醒目咁問個入境處姐姐,如果傻魚離境使唔使再去申請再入國.當時得到個答案係唔使.咁傻魚梗係勁開心喇.
點知...今朝一埋個櫃位,阿哥哥仔就問傻魚有冇申請再入國.傻魚話冇,跟住個哥哥仔就話要收返傻魚張外人証...傻魚即時呆咗.
咁傻魚話個半月後會返o黎o架喎,咁都要收?搞錯呀~
點知個哥哥仔話冇申請再入國就要收返張外人証,之後返o黎再去申請過張外人証...真係啤一聲呀!雖然做張外人証係唔使錢,但係麻煩之餘仲要等成個月至收到.下次返去一個星期,唔使搞喇!單次再入國要千幾円,多次就要六千幾円...如果係硬收錢,就唔好畀張多次出入境家族簽證人喇...仲唔係搶錢?!!
尋晚食完飯坐喺度諗諗下,突然記起之前買咗材料整布甸喎...即刻咋咋林整鬼咗佢.
傻馬開頭話好似好甜唔食咁多.點知一擺入口,跟住就停唔到係咁食...如果唔係之前食得飽咗少少,睇怕傻馬會一次過食晒所有布甸...
今日天陰陰,同傻馬出咗街買嘢.出門口之前收到朋友個漫游,話日本地震問傻魚有冇事...咁就嘥咗幾廿蚊喇.買咗好多嘢返屋企,拎到傻馬死死下.返到屋企又要開工喇.
之前關生去沖繩玩,傻魚叫關生一定要試下啲海葡萄.點知關生冇試之餘,仲買咗包畀馬試喎...
倒出o黎隔咗啲水之後要用清水浸兩分鍾,跟住用清水沖三十秒再隔水就食得.建議點醬油或和式沙律醬食,不過傻馬一於少理,就咁倒晒入口.味道少少咸,口感好似魚子咁...
清雪櫃,清凈啲魚餅...提咗傻馬煮麵嗰陣記住整埋佢.成餐飯傻魚好似個八十幾歲阿婆咁,不斷重複吩咐傻馬記住呢樣記住嗰樣,如果出差走之前要點點點...講到自己都覺自己好煩,有啲似食緊最後的晚餐咁.啋~食完飯傻馬自動波洗晒啲碗,但係就唔記得聽日係可燃日要倒個三角隔啲垃圾要傻魚提...真係好擔心八月尾返到o黎會做死自己~跟住用咗半個鍾就執完啲行李喇.其實都冇乜好執...得啲漫畫,手信,朋友搭買o既嘢同幾本傻馬o既書.咁多書可能會超重...點算?聽朝六點出門口,今晚都應該唔訓o架喇...哎...想訓都訓唔到喇...失咗三晚眠喇...
今日打風,傻馬同傻魚留守家中睇雨,非常寫意.尋晚奶奶打電話o黎傾咗成個鍾.傻魚即刻問清楚啲雪耳湯要點整,氹到奶奶好鬼開心.臨收線仲叫奶奶買定西瓜畀傻魚食.嘻嘻~而老爺就問傻魚啲行李重唔重,使唔使去機場接傻魚喎.傻魚梗係叫老爺唔好咁頻扑喇.講完個電話,搵埋傻馬一齊做阿茂.兩條友搞咗個半鍾,拆埋個廚房,整咗兩個芝士菠菜批仔.期間好多蝦碌嘢,又倒瀉牛油,又搞到成地麵粉...總之好鬼搞笑.焗完個芝士菠菜批,見個賣相唔靚,相都唔影就食咗落肚...好在味道都唔錯.下次再整個靚仔啲o既批再放上o黎晒下~
問完奶奶就梗係要煲喇.煲湯好濃參味,傻馬話好味.仲凈返聽晚一餐,但係就仲有兩個半蒜頭...點算?諗咗一諗,叫埋傻馬幫手搣衣.跟住切成碎粒,加埋啲辣椒乾,用個密封樽裝起,再倒啲橄欖油浸住.搞掂~咁傻馬喺食麵或食意粉嗰陣可以加埋落去食.正~仲有有三十二個鍾倒數緊...唔捨得呀!というより心配...
諗住係傻馬飲咗杯隔夜橙汁搞成咁,正話出街買嘢嗰陣順手買咗樽喇叭牌看門口.
傻馬放工返到屋企話個肚仔仲好唔舒服,食咗三粒止痾丸之後去咗次廁所.諗住冇事喇.點知傻馬話個胃唔舒服,唔食飯喎!!!再問清楚啲,啲症狀同傻魚嗰次係一模一樣!!!仲唔係傳染病?!!
諗諗下可能真係個冬瓜玩嘢!冬瓜可以清熱毒...傻魚腸胃差,所以食兩次就領嘢,一鑊過清晒啲"劇毒".
之後再飲冬瓜花旗參清雞湯嗰陣已經冇毒可清,所以冇事.而傻馬啲腸胃強啲,所以一路都冇乜事...尋日飲咗杯隔夜橙汁,就引發起呢個清劇毒程序.
結果今日煲o既清潤去濕湯,傻馬一啖都唔敢飲.成煲湯,落晒傻魚肚...如果畀奶奶知,一定嬲死奶奶...
因為包湯料係傻魚話要煲畀傻馬飲,叫奶奶執包畀關生帶過o黎...而傻魚飲完咁大煲湯,聽日唔知又會唔會返發同傻馬爭廁所呢?驚驚~
警告: 內含不雅同核突用語.睇完千祈唔好幻想,嘔茄唔好賴傻魚!!!
有冇人試過成條腸都係液體呀?係呀!冇打錯字o架...係...液體呀!!!搞咗傻魚兩日半呀!!!真係多得佢唔少!!!又冇食啲怪嘢,點解會搞成咁?真係匪夷所思!!!
事件經過係咁o既...星期一晚,關生同友人到達東京o黎到傻家留宿.一行四人去附近居酒屋食消夜.當時點咗杯カシスソダグレープジュース...諗返起,可能係呢杯嘢...飲完食完都冇乜事o架...跟住星期二朝早關生同友人出發去沖繩,傻魚送佢哋去電車站之前一齊去咗附近吉野家食早餐...食咗個豚生姜焼定食...返到屋企好眼訓所以訓咗一陣...訓醒就出事喇...個肚係漲到好辛苦,但係又冇嘢排出o黎喎...最慘係見到食物會反胃.夜晚食飯要分開三次食,真係攞命!!!最攞命係成晚訓唔到呀!!!
跟住尋日星期三朝早,終於去到廁所...爆!!!諗住冇事喇!!!咪出街搵網友姐君同網友巴士食晏囉.點知又係一路食一路反胃...結果成餐飯都不在狀態!網友姐君同網友巴士,真係唔好意思呀!!!食完傾咗一陣就散會喇...原本諗住去買餸,但係好唔舒服所以直接返傻家.返到傻家又爆多鑊...跟住又有朋友o黎東京做嘢,夜晚搵傻魚同傻馬食飯.一行四人又去咗海鮮屋酒屋.傻魚又叫咗杯カシスオレンジ...飲完...仲大鑊!啲腸開始搞革命...結果尋日一共去咗四次,都係爆液體!尋日個腦係完全係運作唔到,手腳軟弱冇力...
可能連續幾日都冇乜點訓,尋晚都叫做訓到幾個鍾.今朝,起身嗰一刻,好明顯感覺到同聽到腸裏面啲液體o既流動.就好似有樽七成滿o既水樽打横訓咗喺度,跟住有人慢慢拎起擺返直咁...好恐怖!!!正話爆完一次,感覺好返好多喇...但係可能因為係液體o既關係,條腸冇咁多位裝載,所以依家仲係成肚都係"水"...排晒啲"水"之後,應該冇事o架喇...咪當係排毒囉!呵呵~唔知今次咁搞法會唔會瘦到身呢?!!
聽日關生同友人喺沖繩返東京,玩多兩日又返香港喇...關生o黎咗,傻馬好開心呀!!!所以傻魚唔可以咁掃興,聽日要變返做條生猛傻魚至得!!!
尋日超興奮玩完一日,都未抖夠又要再去玩.一早畀傻馬摷醒,食咗個麵就出門口向台場出發喇...
例牌o黎到都會影一影...
原本係買細抺茶同中雲尼拿.點知店員掉轉咗,整咗個中抺茶同細雲尼拿喎...咁梗係要出聲喇...個店員問杯中抺茶收唔收貨...仲諗住佢問就咁得唔得...心諗是旦喇,掉轉咗啫.哈~點知個店員擺低杯抺茶,跟住走去整返杯中雲尼拿畀傻魚喎...結果用咗細杯價買杯中抺茶...執到~呵呵呵!!!
行行下見有人派新味薯片.一人一筒收入袋之後又遇到另一個人派...結果無拉拉執到四筒薯片.哈~
行到攰攰地坐低休息見到有小丸子喎...傻馬話個鹽汁味勁好食~
之後行咗去台場小香港...其實之前都去過幾次...一啲都唔似...仲有就係,今日係星期日,好多人帶埋細路o黎家庭樂...見到好多父母用手推車載住六七歲o既細路...感覺好怪.個細路咁大,自己行喇!仲坐乜鬼車仔啫?!!另外仲見到有啲細路係咁亂拋垃圾同破壞公物,個父母睇住都唔出聲喎!!!有啲仲離譜...同個細路玩埋一份!!!搞錯呀?!!點教仔o架!!!畀著傻魚實兜巴星過去喇...見到都嬲呀!!!
返到屋企冇乜胃口,又攰又懶...見尋日買咗個"大冬瓜",就簡單o黎個冬瓜湯飯算喇~最衰冇乾瑤柱,如果唔係會更加好味...
今日行咗成日,買咗幾件衫仔畀契仔契女,仲買咗個波波畀嫲嫲隻大狗仔,跟手又畀傻馬迫咗去買咗幾件衫畀傻馬同自己...今日傻馬個傷口冇再出血,不過傻馬個荷包就大出血呀!!!慘~
