大日子

尋日係一個好重要o既日子.(唔好問係乜嘢日子,傻魚係唔會開估o架.)好可惜唔可以同傻馬一齊過...好遺憾~好在尋日唔係自己一個留喺屋企,如果唔係可能會喊死!報導一下尋日搞啲乜先.

朝早起身上網唔見傻馬,好失望.跟住冇乜心機咁坐喺張床度發呆.好友最近頻頻去睇樓諗住買層樓年尾結婚,所以約埋傻魚去幫下眼.見仲有啲時間,個肚仔又餓,咪同奶奶落樓食個晏仔先囉.坐低冇幾耐,好友同男友打o黎話會一齊食晏,叫傻魚等埋.食完之後,奶奶自己返屋企,而傻魚就同好友搭車過海.去到銅鑼灣轉車嗰陣,好友話睇完樓想睇哈理波特,咁咪去時代買定飛囉.之後就搭車去香港仔睇樓喇.真係大熱天時唔好搵啲咁o既嘢搞呀~會死人o架~三條友大汗疊細汗,好似濕水雞咁,成身又濕又臭!兩個鍾睇咗都有大概成十個單位,眼都花埋.結果搭返車出銅鑼灣嗰陣好友係頂唔順暈鬼咗,而傻魚就死撐到落車...總之好鬼辛苦.最衰o架車仲未拎返喇~下次再去睇樓,傻魚一定會出車~去到時代,時間啱啱好,買埋汽水零食就入場喇.睇完戯好鬼肚餓,好友話想食日本嘢.行過對面諗住食人魚,諗起仲有間沖繩料理,咁就走咗入去.之前食過覺得都唔錯,當時仲有蟹放題添.一入到去,原來仲有得食蟹放題喎.好友o既男友係蟹痴,見到興奮到極點.傻魚唯有捨命陪君子,死就死喇~結果三個人食咗八碟蟹,食到人哋收舖.

返到屋企都成十二點幾,諗住傻馬應該訓咗.上網仲見到傻馬咪諗住睇下傻馬會唔會應囉...點知傻馬仲未訓等傻魚返o黎喎...開心死呀!原來傻馬係想話畀傻魚知傻馬好叻,喺超市買咗啲麻婆醬同豆腐自己整麻婆豆腐!!!仲買咗啲菜同芽菜烚熟o黎食.勁呀!傻馬知傻魚擔心傻馬成日食垃圾,又知自己要食返啲菜至得.算傻馬醒目~

傻馬:「正話喺超市,望住啲餸都唔知買乜好...想買肉,但係又唔識整喎...」

傻魚:「哈~傻馬依家知傻魚次次去買餸嗰陣有幾頭痛喇~」

傻馬:「嘻嘻~」

傻魚:「等傻馬仲諗住傻魚日日喺屋企唔使做好嘆咁...一起身就要諗嗰晚要煮乜,有時諗到六點幾都仲未諗到呀!真係諗到頭都爆,人都會癲~」

傻馬:「呵呵~」

傻魚:「咦~咁以後傻魚咪可以慳返唔使煮,等傻馬煮飯囉~」(古古惑惑咁~)

傻馬:「邊似傻魚咁會整咁多餸呀...傻魚整o既好食好多~」(賣口乖!!!)

傻魚:「唓~仲諗住可以唔使做嘆世界添~」

傻馬:「呵呵~」

傾咗一陣,見日本都成兩點鍾,乍乍林叫傻馬訓,費時今朝起唔到身返工喇~今晚叫傻馬影啲晚餐相畀傻魚睇先~好期待呀!