最後的晚餐(啋!)

尋晚食完飯坐喺度諗諗下,突然記起之前買咗材料整布甸喎...即刻咋咋林整鬼咗佢.

傻馬開頭話好似好甜唔食咁多.點知一擺入口,跟住就停唔到係咁食...如果唔係之前食得飽咗少少,睇怕傻馬會一次過食晒所有布甸...

今日天陰陰,同傻馬出咗街買嘢.出門口之前收到朋友個漫游,話日本地震問傻魚有冇事...咁就嘥咗幾廿蚊喇.買咗好多嘢返屋企,拎到傻馬死死下.返到屋企又要開工喇.

之前關生去沖繩玩,傻魚叫關生一定要試下啲海葡萄.點知關生冇試之餘,仲買咗包畀馬試喎...

倒出o黎隔咗啲水之後要用清水浸兩分鍾,跟住用清水沖三十秒再隔水就食得.建議點醬油或和式沙律醬食,不過傻馬一於少理,就咁倒晒入口.味道少少咸,口感好似魚子咁...

清雪櫃,清凈啲魚餅...提咗傻馬煮麵嗰陣記住整埋佢.成餐飯傻魚好似個八十幾歲阿婆咁,不斷重複吩咐傻馬記住呢樣記住嗰樣,如果出差走之前要點點點...講到自己都覺自己好煩,有啲似食緊最後的晚餐咁.啋~食完飯傻馬自動波洗晒啲碗,但係就唔記得聽日係可燃日要倒個三角隔啲垃圾要傻魚提...真係好擔心八月尾返到o黎會做死自己~跟住用咗半個鍾就執完啲行李喇.其實都冇乜好執...得啲漫畫,手信,朋友搭買o既嘢同幾本傻馬o既書.咁多書可能會超重...點算?聽朝六點出門口,今晚都應該唔訓o架喇...哎...想訓都訓唔到喇...失咗三晚眠喇...