泰國餐

無無聊聊留喺傻家吽咗成日,見傻馬成日都話想食韓國嘢,所以今晚唔煮出去食.出門口之前已經叫咗傻馬諗定食乜同去邊間,點知驅車去到附近傻馬又開始"發作".傻魚唔理傻馬,由傻馬自己諗掂佢.點知傻馬發脾氣,話傻魚唔幫手諗下食乜喎.阿大爺,好似次次傻魚話想食乜都一定食唔到o架喎.咁傻魚諗o黎做乜?結果傻馬都係揸唔定主意,而傻魚餓到就o黎發癲,所以傻魚話去食泰國嘢.

揀呢間係因為有泰國商務省認證,實冇衰喇...

呢間除咗有泰國嘢食,仲有越南嘢食.

炸春卷,好味~

冬陰公麵,傻馬o既...好辣喎...

炒金邊粉,落咗冬陰公...幾辣下...

再叫個越南奶茶加珍珠...個味道幾得意.

傻魚好鍾意餐廳內o既木裝飾.呢間唔錯,過一排可能會返兜~
同場加映:
今日突然收到個電話,叫傻馬落樓收嘢.收乜嘢呀?近排都冇上網買嘢...原來係傻馬唔聲唔聲上網買咗箱栄螺...吹漲~

食完泰國嘢返到傻家,傻魚整埋啲栄螺畀傻馬食.栄螺,唔啱傻魚胃口.傻馬話幾鮮,但係都有啲苦.應該又係食咗少少"條尾"喇...傻馬,唔該下次唔好搵啲咁o既嘢搞喇...