燒海鮮

傻馬有個舊同事o黎咗東京玩.尋日同其他舊同事一齊食晚餐,聚聚舊.傻魚都"有幸"同行.今日約咗另一班人去六本木飲嘢.原本傻馬叫傻魚唔好去...傻魚都冇所謂,喺傻家整咗個"大餐"食.冇計...要清舊貨,唔係又會益鬼咗個死人垃圾桶.食完收到傻馬電話,叫傻魚都係一齊去...點呀?哎...好在係飲嘢啫...
去到,淨係飲嘢.傾咗好耐偈,傾得好開心...飲完散會之後,因為舊同事住新宿某酒店,都幾近傻家,所以就一齊搭電車,一齊行返去.舊同事之前好似冇乜點食嘢,有少少肚餓.

喺歌舞妓町見到有間燈火好強o既舖,好似幾得意喎...

未喺街食過燒海鮮...

價錢都可以接受...

食乜好?

十點幾十一點,都仲幾多人幫襯...

原本想叫魷魚鬚,點知叫錯咗成件鮮魷...

大蝦~傻魚冇食...

大鄉里,唔知要點處理...叫個姐姐仔o黎問下,順手處理埋.

一人一隻扇貝同大蛤.

擺埋啲大蝦去燒...兩位大爺都話啲蝦好正~

清完鮮魷,燒大蛤.

繼續燒埋啲扇貝...

唔識搞啲殼,結果搞到啲扇貝乾晒.不過個扇貝好鮮甜~大蛤燒得啱啱好熟,唔會太老.

舊同事想食蟹膏軍艦,叫咗件獨享.聽閒好好味~

叫咗兩隻栄螺畀兩位大爺.因為食之前清理得唔夠乾淨,所以有啲苦.

再o黎兩個蟹膏殼...

舊同事話落咗調味料,所以個味唔夠濃郁.但係都幾好味喎...
賣單八千幾円,舊同事堅持要請客.多謝~下次返香港一定要請返佢食整勁o既!