築地玉寿司

成大半年冇食過寿司,今日放監食返夠本至得.

久違了的寿司放題.可能係週末o既關係,五點鍾去到已經排晒大隊.攞完籌,要等十一張枱,需時大概個半鍾!!!咁耐,梗係去行下街先喇...先落一層行"要你苦惱",買咗個毛背囊同一條褲.見仲有時間,又落多幾層行"凍急手".行到咁上下就返上去,見仲有兩張就到.坐咗一陣就可以入座喇...

咦?!!幾時膊咗個人頭o架?

今次坐喺櫃檯位...

睇住啲新鮮材料...

望住啲板前握寿司...

第一轉,傻馬必叫海膽軍艦.

先o黎啲肥美啲o既...

傻魚o既...

第二轉,傻馬又返兜海膽軍艦同蟹膏軍艦.

見到熟嘢就知係傻魚o架喇...

今日做推介,每位客人送兩件真鱈寿司.先o黎兩件試下先...

第三轉,傻馬依然繼續叫海膽軍艦.前面兩件係燒吞拿魚筋軍艦,亂咁叫但又幾好味喎.

上一排係傻馬o既,下一排係傻魚o既...

再食埋另外兩件真鱈寿司.

今次總共食咗六十二件!兩條友都飽到上心口.

呢個放題係要兩人起至會招待,所以一條友係食唔到o既.價錢係,一男一女要七千三百五十円.兩位女士就要六千三百円,而兩位男士就要八千四百円.如果多一位男士就另加四千二百円,而女士就加三千一百五十円.最重要o既係,完全冇時間限制!如果你食到o既話,可以食四五個鍾都冇人會趕你走.亦都因為咁,等位比較難予時間.所以週末假日通常都要等兩個幾鍾至入到座.要注意o既係,如果太多人o既話七點半前就會截止派籌.有興趣o既朋友記住早啲去喇~
除咗放題,亦有一般散叫寿司或拼盤等.唔想食放題o既一樣可以散叫.
資料: 築地玉寿司
此篇文章是日本國家旅遊局贊助的香港推廣活動日本新発売的一部份。