元旦

2011年,新年快樂~

今日瞓到好晏至起身.原本諗住會留喺傻家渾渾噩噩又一日,天黑之後傻馬話想去新宿行下街.見唔係好凍,決定漫步去.

元旦日o既新宿街頭,水靜河飛,車都唔多架.可能係因為有好大部份住喺東京o既人唔係地道東京人,所以有好多人都會回郷渡歲.加上啲大型百貨公司今日都休息,只有一小陪份細舖仔開市.當然電器舖同大部份食市都會營業,由其係連鎖店.

呢度已經係最多人o架喇!想行o既地方唔係冇開門就係收早,乜都冇睇到.仲諗住去西口間超市入貨,冇開...東口間超市,都係冇開...結果乜都買唔到.唔想喺街食,點算呢?兜個大圈,先去二手書店睇下有冇傻魚睇開o既漫畫.之後去中國雜貨店買凍貨,今晚一於o黎個點心餐.

小籠包,蔥油花卷同咸肉粽,蒸十分鍾...

啲小籠包唔知係穿咗定畀啲皮吸晒,乾咗啲.不過都幾好味.下次試第二款小籠包先.個咸肉粽...名副其實係咸肉粽,裡面只得咸肉...不過好好味.好懷念以前細個嫲嫲包o既超多料咸肉粽.好可惜,已經唔會有機會再食到.

生煎包,冰凍狀態落鑊...

加水加蓋半蒸半煎至收水...

有人好大口氣話可以食八個,結果食咗六個就叫投降...

食飽隔一陣又走去煲湯圓,擺落好有薑味o既紫心蕃薯糖水度,好好味呀!!!好滿足o既新年晚餐呀!!!突然醒起唔記得蒸埋啲魚翅餃,真失策!!!
此篇文章是日本國家旅遊局贊助的香港推廣活動日本新発売的一部份。