鍋ぞう

今日又係瞓到自然醒,又係天黑至出門...全因為屋主隻虎紋喵走咗上o黎"午睡",所以要等佢走至出得門口.今日條街突然多返好多人,一下子又回復返平時o既新宿.可能又遲咗出門口o既關係,去到收咗舖,傻馬又係睇唔到想睇o既嘢.見差唔多時間,去西口間超市入下貨先...買到差啲破產,拎到死死下.時候都唔早,去醫肚先.傻馬突然好想食牛肉,原本想去試另一間o架...不過到最後都係返返o黎呢間食.

呢間日式打邊爐店只有放題,限時九十分鍾.最平係一千九百八十円一位.牛同豬任食之外,蔬菜同豆腐都係.如果冇飯落肚唔得o既朋友,可以加四百八十円,白飯任裝另加飲品一杯.想一次過試兩款湯o既話,可以揀二千一百八十円.

今次揀咗鹽豬骨湯,凈係個湯已經好好味.第一輪自動上一盤雜菜同豬牛各兩兜.牛豬豆腐唔夠食可以再叫侍應再攞,而蔬菜就要自己去攞.每個湯都會配唔同醬同蔥,食完可以無限添加.

第一盤菜都未食完,傻馬已經急不及待叫傻魚去拎多一碟.

之後叫咗兩兜牛同四兜豬,再加一大碟菜...食完飽到上心口,今次又係畀錢買難受.冇計,叫咗拎咗費時嘥嘢呀...
真係要去試下其他店.雖然呢間好味,但唔可以一直都只係食呢間.
資料: 鍋ぞう