新年會@汐留和えん

傻馬今日開始返工...今朝差啲唔知醒...收工之後同事間搞咗個新年會,順便慶祝其中一位同事新婚.呢啲咁o既聚會通常傻魚都冇份參與.但係今次唔知點解,傻馬預埋傻魚喎...有得食有得玩,傻魚又點會唔去喎...約咗七點鍾喺汐留一間叫和えんo既和食餐廳.傻魚喺六點九同傻馬會合之後,先去睇燈飾.七點正準時到達餐廳,有啲同事已經到咗.雖然仲未齊人,介紹完一輪之後開始點飲品.今次除咗同事之外,仲有已經離開咗公司o既前同事.

乾杯~可能係有酒落咗肚o既關係,大家開始多嘢講.未人齊,但係在場個個都話好肚餓...結果又係唔等,食住等.上菜前o黎多三位,啱啱好十位~原本仲有幾位,可能工作忙,到最後都冇出現.

個雞同蛋都勁好味~可能肚餓o既關係...人多,每款食物都叫兩份.傻魚咁啱坐喺中間位,可以左右逢源...呵呵~失禮晒!

呢個係黑芝麻豆腐,好味~

西京燒銀鱈魚,傻魚愛.好好味,但係太細件...傻魚一條友可以隊三碟都仲可能會覺唔夠喉.

呢個大根炆牛筋,個個都話勁好味!冇傻魚份,傻魚唯有食其他嘢...

呢個炸雞,好好味呀!!!

呢個係同炸咗o既鮮腐竹包住啲魚,又係勁好味!除咗以上o既食物,仲有啲唔記得影相o既...太開心,已經唔記得自己食咗啲乜落肚...食到咁上下,有位同事話唔夠飽.由於呢位同事唔識睇日文,所以拜託傻魚發板.

之前有同事想嗌,但最後都冇叫到.所以傻魚就叫咗個旬の野菜天麩羅,點鹽食都好味道~

另外仲叫咗個岩鹽燒真鯛魚腮...個個都激讚,太好味喇~

間餐廳喺四十二樓,對住咁靚o既夜景食嘢,又點會唔好味.仲會酒不醉人人自醉.食到最後個個都開始"o黎料",不斷咁影啲怪表情相.仲叫對新人係咁狂親吻畀佢哋影.難得對新人又唔介意,個個都玩得勁開心.唔覺唔覺玩到差唔多十一點,個個都仲好唔願咁散會.有位好搞笑o既女同事係咁拉住傻魚,話遲下再約出去食飯喎.新的一年,新的開始.個開始咁開心,今年一定會係個開心年.
此篇文章是日本國家旅遊局贊助的香港推廣活動日本新発売的一部份。