御用阿四回歸

失蹤咁耐去咗邊?發生咗啲"突發事",所以啲時間亂晒...乜事?今日唔講啲唔開心o既嘢,所以下回分解!

傻魚尋晚終於返咗東京傻家喇!尋日朝早十一點半,黃氏三少載傻魚,老爺同奶奶去機場.老爺見傻魚好似走難咁一袋二袋,話幫傻魚拎啲...咁奶奶見老爺去送機,又話要一齊去.去到機場十二點二,搞埋啲登機手續,寄埋行李...件行李一上磅,三十一點三公斤!!!好在搵人加咗磅啫...仲諗住寄埋個細袋,一磅...六點二公斤,太重過晒磅要加錢...唯有拎上機囉...同老爺奶奶去食越南嘢,兩點鍾就入閘喇...入閘前老爺少有咁叫傻魚返到傻家打個電話返去報平安.三點三準時起飛,到成田因為落雨遲咗十五分鍾.落機已經係八點七.打咗個電話畀傻馬,叫傻馬去日暮里接傻魚.過咗關拎埋行李都成九點喇...慢慢行去駅搭九點三十四分班車去日暮里.返到傻家十一點半,一入屋...暈低!!!仲諗住自己入錯咗垃圾房...望真啲,一屋一地都係嘢.行每一步都要望實個地下,搵個空位落腳...傻馬仲好"神氣"咁話都不知幾方便.坐喺部腦前面唔使點郁都可以拎到想要o既嘢...激死!倒晒行李啲嘢出o黎,求其執埋一邊就算.跟手打咗個電話返屋企,傻魚同奶奶講咗兩句就交個電話畀傻馬.傻馬同奶奶傾咗幾分鍾,跟住又同老爺傾咗一陣.傻魚沖咗個靚涼之後已經攰到散晒.

今朝起身望住間屋,都唔知點執好...執起張床吸塵,再慢慢執埋其他嘢.一路執一路吸塵,搞咗兩個幾鍾至執完間房.之後用一個鍾執埋個衣櫃,跟手執埋傻魚啲"禮物"(不日公開).抖咗一陣,又開始洗廚房.經過一個鍾o既"勞力",個廚房又恢復返之前咁整齊.然後洗廁所...點知洗到尾聲,發生流血事件...畀個濕紙巾樽個蓋"挾"走尾指一嚿肉,痛到入心...又攰又痛,唔想出街,唔想煮飯...最後打咗個電話畀傻馬,叫傻馬收工去便利店買便當返傻家食.傻馬買咗一個便當畀傻魚,傻魚就去整返熱包韓國人參雞畀傻馬食.食食下傻馬周圍望,講咗句:"噢...唔知啲嘢去晒邊添..."間屋有幾大啫?!!搵唔到咪問傻魚囉...御用阿四返咗o黎,開句聲就有"專人"服侍喇.雪櫃乜都冇...聽日要去入貨,煲湯煮飯仔喇...