突發事件

又到咗一日一扑o既時間喇...係時間講下早排傻魚因乜事玩失蹤.

話說今次傻魚會返東京差唔多五個月,所以決定忍痛賣車.喺愚人節嗰日傻魚要去旺角買啲嘢,咁啱車行條友"阿大隻講"話有人想睇車.於是就約喺旺角交車畀"阿大隻講"揸去尖咀畀人睇.半個鍾之後收到"阿大隻講"o既電話,話喺佐敦畀架雙層巴士撞甩咗個車尾喎...嚇得傻魚個心都跌埋出o黎.意外o既嘢冇人想,傻魚當時都冇乜嘢.隔咗十分鍾,"阿大隻講"又打o黎話報咗警,等緊差佬o黎.又問傻魚啲牌保喺邊,又話要傻魚下次帶份車保畀佢...傻魚開始覺得唔多對路.佢畀人撞使鬼要傻魚份車保咩...人哋巴士公司會賠償o架嘛.講到口水都乾,"阿大隻講"都仲係堅持要.如是者講咗幾個電話都係話要車保...之後又收到電話,今次"阿大隻講"要傻魚打去保險公司備案喎...仲話車尾有個位凹咗...搞錯呀...做乜之前唔一次過講埋啫...傻魚就話唔使向保險公司備案,因為對方會賠...之後幾個電話都係講緊要傻魚備案.越諗越唔對路,於是即刻打咗個電話畀個經紀.經紀小姐同傻魚個講法都係一樣,係唔需要通知保險公司.但係傻魚為咗安全起見,叫經紀小姐通知保險公司架車畀人撞,不過唔會索償...之後又收到"阿大隻講"電話,又係不停叫傻魚通知保險公司.收線前仲話有條軚爆咗...吓?又多樣嘢?唔係吓話...頂!究竟係畀人撞定撞人o架?搞到傻魚勁唔開心...

之後幾日傻魚都冇車用之餘,仲時不時收到"阿大隻講"電話.一時提傻魚連絡保險公司,一時又話要告巴士公司,一時又呻慘...喂喂喂~傻魚咪仲慘!同朋友傾完呢件事,個個都話條友有問題.諗諗下都係去睇下架車好啲.打畀"阿大隻講"話想拎返車裏面啲嘢,"阿大隻講"就話不如佢幫傻魚拎.傻魚話有啲嘢要拆,費時佢拎漏又要傻魚行多轉.結果"阿大隻講"就話會同傻魚安排下.安排乜鬼呀?架車傻魚o既,想幾時睇就幾時睇.再絕啲,拎返o黎自己整都仲得.傻魚當時好煩又好忙,費時同佢吵咋.喺上個星期五約咗黃氏三少一齊去睇車.的確似係畀人撞.但係唔排除係轉線時撞到人...不過,事件經過係點已經唔重要.最重要係"阿大隻講"整返好架車畀返傻魚就得喇.傻魚唔會畀架車佢賣,所以已經串通黃氏三少話有朋友想高價買傻魚架車.係唔係賣拎返架車至算.其實架車傻魚唔多想賣.只係唔想白交停車場錢,所以至諗住放.賣唔到,到時傻魚返香港咪有車揸囉...傻馬...聽完件事嬲到爆,話一定要拎返架車唔會畀"阿大隻講"賣.

就係咁,傻魚臨返東京前冇車用.日日搭巴士,搭西鐵,轉地鐵,轉巴士,搞到晚晚個頭都痛到爆又瞓唔到.嗰幾日啲時間亂到飛起之餘,個人仲燥到爆!早幾日返到傻家至真真正正休息到.條氣依家順返少少喇.遲啲收返架車,條氣就會順返晒!今次真係唔知係佢唔好彩,定係傻魚唔好彩喇...