又加價

聽日,日本啲油又加價...今晚實好多人駕車排隊入油喇...乜都加價,連雞蛋都話要加價...以前用二千幾円買餸就塞爆個雪櫃,依家就要三千幾円...遲啲電同煤氣又話加價...出街又燒錢,留守家中又係燒錢...慘!
今日冇出街,留返喺傻家繼續裝軟件.部腦終於完全復甦,冇穿冇爛冇缺喇.求其執下間屋,做下手作仔,咁就大半日喇...諗咗好耐晚餐整乜好...又唔想出街買餸喎...喺雪櫃摷晒啲嘢出o黎,再開罐午餐肉...

好畀心機咁煎啲午餐肉,煎走好多油,粒粒都脆卜卜.整咗個番茄汁要o黎點午餐肉粒,絕配!!!傻馬用個番茄汁o黎撈飯食,搞到傻魚差啲冇汁點午餐肉...

飯後甜品...尋日喺東京駅買o既.好"朱古力"~雖然甜咗啲,但係好好味!八百円一條,呢度兩件加埋係半條...正~下次經過再買!

上個星期五買o既菠蘿,今日嗅到香味,好似夠熟喇...不過懶,聽日至切...聽日又要去買餸...睇o黎要先定個預算至得...

演唱會

尋晚畀個"咩成啫"玩咗兩鍾,裝極都裝唔到...諗住放棄裝個舊版就算,不過又心有不甘...好在到最後都畀傻魚裝到...裝埋其他軟件,搞到成四點幾至瞓...今日起身嗰陣已經係中午十二點幾,乍乍林梳洗完就出門口.落雨喎...傻魚鍾意!!!搭山手線經渋谷去到有樂町,醫肚先...

又係拉麵...其實傻魚想食飯多啲,但係傻馬就想食拉麵.搵咗一陣都唔見有飯食o既餐廳,唯有食拉麵囉...呢間同一蘭差唔多,有張紙仔畀人揀嘢...

傻魚不嬲都唔食蔥o既,自然唔會揀蔥喇...揀咗個普通湯底,好咸!!!早知揀淡味喇...

傻馬揀咗濃味湯底,當然又係"混醬"收場喇...

去到會場出面已經有好多人排隊等入場...

排咗差唔多半個鍾,終於入到場.見個工作人員行開咗,即刻偷影...邊個o既演唱會?係寶兒二十場巡迴演唱會o既尾場.個位太遠喇...

完全睇唔到寶兒個樣,仲有條"粉腸"全程企起身擋住傻魚o既視線...如果有粒石仔或橡筋,傻魚一定掟/彈鬼條友.

兩個半鍾o既演唱會,話咁快就完喇.行去東京站,買少少嘢就搭山手線經池袋返歸喇...今日搭山手線搭咗一圈,好玩!返到傻家已經好肚餓...

整咗個雜菜番茄汁そうめん,好在傻馬冇"混醬",淨係落咗"他巴士糕"...傻馬食得好開心,傻魚都好放心...呵呵~

花菖莆

今朝一瞓醒,傻馬就開工幫傻魚整部壞腦...傻魚冇腦用,見得閒就去廚房搵啲嘢搞下...用方包整咗...

麵包薄餅.切咗啲煙肉同青椒落去烤,好好味!
傻馬整咗成朝,畀部傻腦玩賤...都唔知乜事,修復唔到個"窗".冇理由就咁成日同部腦搏鬥o架...原本諗住去台場漫畫展,原來傻馬記錯咗,漫畫展係聽日...咁今日去邊好呀?傻馬話不如去原宿睇花...是旦囉...

行咗去明治神宮...

吓?!!乜明治神宮有花睇咩?

見到有人結婚.今日係好日,有三對新人喺呢度行禮.

之後傻馬帶咗傻魚o黎呢度,擺低一千円入場...

經過長長o既小路...好多樹,好陰,空氣好清新,好好味!

行咗一陣就見到塊花田...

一堆堆唔同顏色o既花...

呢種花叫花菖莆,由五月尾開到六月尾就完...

有好多唔同品種...

每個品種都有其獨特o既名稱...

唔記得影啲名牌添...

呢朶係分開種喺個花盆度...

呢個涼亭個頂用咗好多乾花莖整o既...

再行入啲有口古井,有好多人行埋去玩水...行到差唔多五點鍾就行完,然後走咗去行原宿.好肚餓添...醫肚先~

呢間嘢排長龍...食乜?

拉麵!傻魚叫咗碗招牌拉麵...好味!

傻馬就要個濃湯拉麵.食咗幾啖,傻馬又開始"混醬"...落咗好多蒜茸同辣油...唉~畀傻馬咁搞法,幾好味o既湯都係假...嘥晒人哋啲心機...
食飽再行一陣至返傻家,然後傻馬又繼續同部傻腦搏鬥.整咗一陣,都係冇乜進展,傻馬想宣告部腦死亡!傻魚就提議傻馬剷咗個"窗"重新再裝過.冇腦用,好清閒唔知點算好...見傻馬唔得閒,咪霸住傻馬部腦用囉...到咗九點幾,傻馬話肚餓...好得閒o既傻魚又屎忽痕,冇嘢搵嘢o黎搞...

除咗番茄,其他材料放晒落個蒸鍋度一鑊過蒸熟.然後煎下塊雞扒,等塊皮脆啲.再煮埋個汁淋上去,之後擺塊牛油落個薯仔度,半個鍾就搞掂!尋晚買咗支香檳諗住開,不過兩條友掛住食,完全冇咗件事...哈~
食飽之後等多一個鍾,部腦就起死回生喇~希望唔好再死機喇...聽日冇得去漫畫展,少少唔開心.不過聽日去睇演唱會,又好期待喎...唔...就o黎神經衰弱...

宣告死亡

傻馬畀部腦玩咗成朝,部腦又再一次宣告死亡...依家等緊傻馬重裝個"窗",所以霸咗傻馬部腦o黎用.唔知係咪人衰路打倒退,今年已經第二次死機...仲要係相隔兩個月...真係邪!打住咁多先...一陣等傻馬醫返好傻腦至報告今日o既日程.

壞腦

今朝起身竟然見到太陽喎...洗完衫諗住上下網,等個天陰啲至出街喇...點知部腦好似有病咁,開始"慢駛"兼"怪叫"...搞乜呀?唔通幾日冇熄過機,所以開始"塞車"?!!熄下佢再開返,喺入密碼個畫面出現後突然走咗個藍畫面出o黎...心諗搞乜呀?但係兩三秒之後部腦又正常咁啟動喎...唔係喇...都係再熄多次穩陣啲...傻魚好醒咁喺熄機之前留言叫傻馬打畀傻魚.好在做咗呢個動作,因為之後部機不停重複出藍畫面然後自動重新由頭啟動一次,總之就唔畀傻魚入密碼開機.都唔記得部腦咁樣行咗幾多次,搞到傻魚好擔心唔知係唔係中毒.又驚係畀人入侵,即刻拔條網路線...望住部壞腦,真係想喊!就喺呢個時候,傻馬打o黎問乜事,然後教傻魚點解開返部機.一開返第一件事就係睇部腦有冇中毒,然後睇下有冇畀人入侵,有冇畀人裝咗啲不明軟件...搞咗一輪之後冇發現,唯有用住先等傻馬返o黎至算...
畀部腦玩咗個幾鍾,乜心機都冇晒.不過傻魚有任務在身,所以就驅車出街.先去附近間二手家具店睇下有冇平凳執.間野啲二手凳仲貴過"企鵝仔",上網又搵唔啱心水喎...都係再睇下先...下一個任務,去買餸.去到超市見啲菠蘿都幾平下,買個畀傻馬食先.諗住買啲肉就走,結果又係買咗一堆嘢...水菜呀,番茄呀,長蔥呀,冬瓜呀,牛油呀...都唔多記得買咗啲乜...第三個任務,去"企鵝仔"買牛油.尋日去嗰陣賣晒,今日去都係賣晒...定係冇補過貨呀?!!買咗肉費時逛咁耐,即刻驅車返傻家塞爆個雪櫃.
講開牛油,今日睇新聞話日本依家嚴重缺牛油.唔怪之得早排出現搶雪印牛油潮,搞到附近幾間超市都冇貨喇...依家雖然有貨,但係牛油都係幾缺下.睇o黎都要入返啲貨至得...

冇乜心機,加上尋日食得太豐富,所以今晚整咗個雜菜雞鎚番茄湯扁烏冬.傻馬不嬲都好番茄湯,當然係大啖大啖咁食喇.食完傻馬話飽到上心口喎...哈~一陣同傻馬去行"企鵝仔",再去睇下啲凳先.部腦...好似冇乜事,聽日至整喇...

清倉

辛苦咗兩日,今日終於可以抖下喇...尋日天陰陰,傻魚竟然掛住做手作仔唔記得要出街行下...今日落咗大半日雨,見啲雨好似停咗,梗係即刻出街喇...唔知晏啲會唔會落雨,所以都係唔驅車喇.行咗去"企鵝仔"幫傻馬買少少嘢,順便去睇下啲木椅.行咗一陣,都係睇唔啱.算喇...都係上網買喇...喺個袋仔度摷個電話出o黎諗住打畀傻馬,一睇...咦?!!網友甲君打過o黎喎...回返個電話畀人先...原來網友甲君今日要食自己,咁咪約埋食個下午茶,順便食埋晚飯囉...喺"企鵝仔"等網友甲君期間,諗住買少少嘢,結果又買咗一堆嘢...
之後同網友甲君去咗駅附近一間餐廳坐低.傻魚叫咗個"朱力巴菲",網友甲君叫咗個咖哩牛肉飯.食食下講起流年運程,話今年唔係咁好,明年好似仲衰...明年?出咗喇?咁快?!!以傻魚所知,傻魚明年應該好過今年.不過流年運程呢啲嘢,唔係話邊個生肖嗰年衰就一定會衰.都仲要睇每個人條命生成點.況且,流年運程都只不過係一個指引,唔可以盡信.(唔係話唔好信,只係唔好太過沉迷相信)今年運氣差,咪按兵不動囉.可能傻魚比較樂觀,永遠都相信明天會更好.
傾咗個幾鍾,傻魚夠鍾返傻家煮飯.同網友甲君分咗手之後就打畀傻馬.原來傻馬就o黎返到傻家,即刻叫傻馬行返轉頭幫手拎嘢.返到傻家即刻開工...今日要清倉,食晒啲肉...正當傻魚諗緊要點整嗰陣,傻馬見傻魚今日買咗三罐粟米粒,話要食牛油粟米喎.

即刻整.傻馬話要勁多牛油,所以傻魚冇食...今晚餐飯勁呀!計埋個牛油粟米粒,四餸一湯呀!!!

日本啲滑豆腐係唔使煮都可以就咁食.所以今餐傻魚就整咗個蠔汁肉碎淋喺嚿滑豆腐上面,又快捷又好味.傻馬差啲連隻碟都想食埋落肚.聽日又去買餸喇...主要係入返啲肉.聽晚食乜好呢?
後記: 傻馬喺四個月前,傻魚返咗香港嗰陣買咗張座地有背o既椅,前幾日終於報銷要送去垃圾站...鬼咩...日日坐到成個小學生咁,係咁遙,唔爛就有鬼喇...好喇!爛咗又可以買過張新o架喇...今次輪到傻魚揀!呵呵呵~

手作仔

尋晚啪完特效止痛藥之後,搞到三點幾至瞓到.今日搞啲乜?繼尋日做完咕哩後又一"攰"作...張枱畀傻魚整花咗,咁咪去一百円店買咗塊布做枱布囉.塊布太長又唔夠闊,加上有啲邊飛晒線,所以咪要剪短加闊縺埋啲邊囉...諗諗下橫掂都係囉,整埋幾條繩仔用o黎綁住啲枱腳,咁張枱布咪唔會走位囉...度完張枱,剪埋啲布,跟住就開工喇...好耐都冇做過呢類手作仔,拎住支針線一時間無從入手...唉...唔理喇...再諗真係天光都整唔完...拮下拮下,又好似記返起點啲針法喇喎...就係咁,搞咗成日,縺咗十幾個鍾,終於搞掂喇~

雖然唔靚,但係一針一線都用足二百份心機.好在寶刀未老,冇拮穿任何手指.呵呵~遲啲執完啲位,買埋啲椅,砌埋張枱,舖完張枱布再影張完成品畀大家睇.
掛住做手作仔,唔記得煮飯添...搞到九點幾至放低啲針線,求其煮咗...

雜菜湯底そうめん.傻馬好捧場,食咗好大碗,仲叫傻魚過幾日再整.
後記: 呢排成日甩稿,搞到啲網誌遲晒出街,全因為傻馬好忙,成日唔記得幫傻魚搬相機啲相去電腦...所以話,求人不如求己...但係,唔使下傻馬做嘢,傻魚又冇癮喎...唔...好矛盾...

咕哩

今日傻魚一早起身執完間屋之後,求其整啲嘢食完之後就驅車去做咕哩.途經一百円店,屎忽痕走咗入去行咗一轉.諗住淨係買針,點知買咗成袋嘢...去到目的地,見張枱唔係好大,應該一轉可以拎晒,即刻畀錢走人.其實張枱都幾重下...好在傻魚有帶繩索,諗住綁喺架單車度...但係搞咗好耐都搞唔掂...算喇...就咁擺喺個腳踏度推返去囉...
今日鬼死咁好天,熱到飛起!推住架單車都冇五分鍾,已經出晒汗濕晒.開始頂唔順,想死...感覺到自己塊面紅晒,成個番茄咁...好在都好多陰暗位可以抖下.途中張枱仲跌咗兩次,撞爆咗其中一邊枱角,仲整花咗個邊...張枱都幾傷下,不過都唔夠傻魚啲手指傷...右手中指同無名指反甲呀!!!好鬼痛呀!!!差啲反到入肉流血呀...行咗半個鍾,終於返到傻家...搬晒啲嘢上樓擺低之後,氣都喘唔切又要驅車去買餸.走完兩間超市,已經冇晒力.返到傻家攤咗喺度,周身痛,攰到爆呀!!!個頭又開始痛,今晚都唔知瞓唔瞓到添o架...陰公~
傻馬返到o黎見到傻魚成條死魚咁,叫傻魚唔好煮飯出街食.唔煮點得呀?又益隻死垃圾桶?唔制呀!傻魚又o黎一鑊熟...

七彩冬瓜湯飯.材料有冬瓜,南瓜,青椒,紅椒,雞髀肉,蜆,金菇,蝦米...今日咁熱,食湯飯就至啱喇~傻馬話好味,不過如果唔落南瓜會仲好味.傻魚都知...不過個南瓜再唔食就會壞...不過都幾好呀...色彩繽紛...呵呵~

醒

尋日落咗成日雨,今朝瞓醒場雨已經停咗.天文台預測東京下午唔會落雨,咁就要乍乍林洗衫喇.晾完衫之後,傻魚一聽到類似雨滴聲就即刻沖出露台睇下...真係人都癲呀!!!咁o既情況又點放心出街呀...都係留喺傻家望天打掛算喇...雖然天文台話唔會落雨,但係依家啲天氣實在太難預測,都係小心啲好...傻魚好似傻婆咁每半個鍾就出露台望下個天.到咗四點幾五點,傻魚見烏雲蓋頂就o黎落雨咁o既款,咪即刻收返啲衫入屋囉.都唔知有冇十五分鍾,真係落雨喎...哈~傻魚今日真係好醒呀!!!見到對面樓啲人仲唔收返啲衫入屋,真係有股衝動想大嗌:「雨だ～」不過諗諗下,都係唔好咁多事...但係見到人哋啲衫畀啲雨淋濕晒,真係有啲難過...
傻馬打o黎話要加班,會遲一個鍾至返.咁傻魚咪慢條斯理,諗住仲有大把時間,唔使咁急趕住煮飯...況且,今日餐飯冇難度,十五分鍾都唔洗就搞掂.點知上下網,睇下電視,完全唔記得晒啲時間.到傻馬返到o黎至記得要按飯煲制...有餸冇飯,捉蟲喇...等咗差唔多一個鍾,終於開得飯喇...

多菜多汁白咖哩,好味!!!聽日係星期二,又係時候要去買餸喇...聽日仲要做咕哩去搬張枱返傻家...冇計喇...只可以喺今個星期平日十點到六點之間去拎,傻馬要返工嘛...唯有驅車分兩次抬囉...乜枱?遲啲至開估...嘻~

落湯雞

今朝傻馬一早去咗考試,但係唔使一個鍾就返咗o黎...十分鍾就答晒啲問題起身走人喎...搞錯呀?!!邊有人咁考試o架...見落緊雨,諗住今日唔出街喇...睇下戲,睇下演唱會,咁就大半日喇...正當傻魚諗緊今晚整乜好之際,傻馬話出街食喎.唔使煮就梗係好喇.見冇雨就驅車諗住去附近間家庭餐廳食.咁啱間二手書店喺餐廳隔離,咁就先去睇下漫畫.上次去嗰陣鬼死咁多人,想慢慢揀慢慢睇都唔得.今日就人少少,可能係食飯時間啩...就係咁磨咗個幾鍾,買咗五本漫畫三本小說.買完好鬼肚餓,即刻行過隔離搵食.

叫咗個小食...炸魷魚,好味!

傻魚個醬油蒜雞扒,跟飯同任飲.好好味!!!

傻馬個蔥鹽雞扒,跟任飲.傻馬話好味.傻魚分咗一半飯畀傻馬.傻馬食飽拎住部"任癲狂"打麻雀,傻魚就睇漫畫.一人飲咗四杯嘢,跟住傻馬見時候唔早就話走.畀完錢一出門口...嘩~好大雨呀!!!咁點呀?冇理由行返入去o架...都埋咗單囉...冇計...唯有喺暴雨中飛車狂驅返傻家.好在唔係去得好遠咋...不過返到傻家兩隻落湯雞咁...雖然濕晒,但係唔知點解,好似好好玩咁,兩條友係咁狂笑...乍乍林沖個熱水涼先,費時凍親病就大件事喇...

一鑊熟

尋晚落咗場雨,今日就天陰陰,隨時會落雨咁.咁"好"天,傻魚又點會留喺傻家做乾物女呀!執完間屋就驅車出街.先去郵局寄信,跟住去銀行提款.駅對面個提款機成日都係咁多人,次次都要排隊等...打咗個電話畀網友甲君,睇下佢會唔會去買餸,因為想畀啲嘢佢.約咗係"企鵝仔"等,咁傻魚拎完錢就驅車去"企鵝仔".逛咗半個鍾,收到友甲君o既電話,話見唔到傻魚所以走咗.咁唯有下次先囉.再行多一陣,買咗一堆嘢就返歸喇.
今晚食乜好?見個雪櫃有好多嘢就夠期...

傻魚至拿手o既"一鑊熟",乜都落晒一煲過...哈哈哈哈~落咗啲乜?睇下先...有蘿蔔,水菜,白菜,滑豆腐,豆卜,雞丸,魚蛋,金菇,蒟蒻,粉絲...應該係得咁多...個湯底係魚湯...都幾好味...呵呵~

清爽南風

又話今日開始関東將踏入梅雨期,點知今朝鬼死咁好陽光.到咗晏晝,都仲係陽光普照...約咗網友甲君兩點幾出去食下午茶,出門口嗰陣開始天陰陰.今日吹南風,好舒服.食個下午茶,傾下偈,跟住走咗去健身室見學.傻魚邊有咁鬼神心去做運動呀...係陪網友甲君去睇下環境.好在個見學都好快,幾驚會畀人捉住狂講呀...之後一齊去超市買餸.今日有好多西瓜,傻魚見到又忍唔住手...之後一人買咗一嚿冬瓜要o黎煲湯.今日傻魚冇狂買,因為雪櫃仲有好多餸.不過天熱唔可以買定一堆肉擺喺雪櫃.冬天仲話可以擺三日,依家頂多只可以擺兩日啲肉就開始壞.唉~以後要密啲去買餸喇...

傻馬鍾意食麵多過食飯,所以今晚整咗個番茄雜菜雞意粉.啲雞醃咗兩日,好好味~

啲肉碎擺咗兩日,開始唔得喇...諗諗下,整咗傻馬好鍾意食o既榨菜肉餅蒸滑豆腐.一時錯手落咗好多麻油,不過好香.雖然個意粉都好飽,但係傻馬依然食得晒呢大半兜肉餅豆腐...勁!!!

頭痛

瞓醒好頭痛...點解會咁o架?原本諗住搵網友甲君食下午茶,但係個頭痛咗成日...見網友甲君冇搵傻魚,咁就第日至食喇...聽日開始関東地方進入梅雨期,日日係咁落雨,氣溫大概廿五度倒.真係正到爆呀!不過傻家部洗衣機喺露台出面,落雨就洗唔到衫...所以今日一口氣洗晒所有衫,之後十日洗唔到衫都冇問題.哈哈~
個頭痛,諗唔到整乜好.見有皮蛋同豆腐...

今餐傻馬冇汁撈飯,所以食得好慢.唔記得叫傻馬放工順便去買檸檬,所以碗隔夜冬陰功湯依然係唔夠酸...好!食埋個西瓜,沖個靚涼早啲瞓.希望聽朝個頭冇事喇...

天陰

今日o既天氣好舒服,天陰間仲有陽光同涼風.呢啲咁o既天氣唔係日日都有,傻魚梗係唔會錯失良機喇~執完間屋就換衫驅車去附近一間家庭餐廳食個晏仔,一食就兩個鍾.點解一條友都可以食咁耐?因為帶咗部"任癲狂",一食飽就係咁狂打!跟住去二手書店蒲咗三個鍾,買咗本漫畫.見時候都唔早,所以驅車去超市買餸.
之前買咗次西瓜食完之後念念不忘,今日又買.呢間超市每個星期二都有啲平嘢執,今日竟然一個沙律菜賣七円喎...冇錯!係七円!!!係咪睇到人都癲呀?!!可惜傻家冇人好沙律菜...即刻諗起網友甲君好沙律,乍乍林打個電話畀網友甲君,因為特價至六點就完.原來網友甲君早傻魚少少去買餸,已經買咗兩個喇.個幾星期冇搵過網友甲君,約咗聽日下午茶.買埋其他嘢就一包細包返傻家煮飯仔.

呢餐飯傻馬都食幾快下,因為個蠔汁撈飯好正!個冬陰功就夠辣唔夠酸,一時唔記得買檸檬添...餐飯好飽,結果啲蛋仔全數留返聽日食.飯後抖咗個幾鍾,係時間食飯後果...都係上次嗰個西瓜甜啲...

流汗

今日好鬼好天...傻魚見到咁o既天氣,即刻取消晒所有出街o既行程.好天就梗係洗衫喇...啲衫乾得勁快...留喺傻家冇乜嘢做,睇下新聞留意下前日地震o既情況.之後打咗三個鍾頭機.冇乜點郁,但係啲汗係咁冒...好在間唔中都有啲涼風...
尋晚同傻馬一齊去超市買咗少少嘢,加埋雪櫃啲舊嘢,烚埋一堆又一餐...

傻馬自己溝咗個"混醬"...柚子醋加蒜茸加辣油加...唔知仲有乜...傻魚都懶得理...之後整咗杯黑芝麻酒溝鮮奶飲...聽日,要出去行下至得...

東武動物園

一早起身食少少嘢,然後起程...搭咗成個鍾電車,去到...

東武動物園.入園位位千五円,唔包任何機動遊戲機同水上樂園.傻馬都係志在睇動物啫...

先求其食個晏仔...

覺得呢隻嘢幾搞笑...

幾得意...行行下見到遊行隊伍,可惜已經行到尾段...不過啲遊行動物之後可以畀人摸下玩下...

好神氣呀!

呢條大蛇就慘喇...佢超人氣,好多細路圍住佢係咁摸.有啲大人仲乘機搣下佢...真係慘...

好大隻龜呀!

好聽話o既猴子.同遊行隊啲動物玩完之後,就周圍行下...

唔知係唔係天氣開始熱,啲毛甩得好肉酸...

百厭猴仔,好搞鬼...

呢個動作做咗好耐...

「喂!你一係放我出去,一係比啲嘢我食.唔好係咁啤住我喎...」

唔睇真啲仲以為係假o架...就係呢隻海獅表演絕技畀大家睇.好勁o架佢!!!

嘩!有毛毛o既角呀!

可愛企鵝仔.

又一隻肉酸甩毛牛...

嘆到佢哋呀~

好鬼可愛呀!!!

呢隻馬好老o架喇...但係一啲都唔似老人家...傻魚仲喂佢食草...好玩~

白老虎...好瘦咁喎...

呢隻獅子啲毛...

顏色好靚!

可愛長頸鹿~

嘩~開水喉呀...好大篤喎!

好得意...

有個位可以畀人喂鯉魚...傻魚擺低一百円買魚糧...

睇下啲魚搶食搶得幾恐怖~

喺動物園裡面竟然有間咁o既嘢...但係又有人會幫襯喎...勁!
咁就玩咗大半日,又曬又攰...傻馬講咗好多日話想食寿司,所以今晚唔煮喇.返到新宿就去食平靚正迴転寿司.食完行去超市買少少嘢,跟住就返傻家喇...好鬼攰呀...