再焗

今日傻魚好開心.因為...落雨呀!由尋晚一路落到今日晏晝,爽呀!真係好鍾意雨後嗰種清新空氣o既味道,好舒服好醒神.食晏前哼住歌仔做家務,一口氣執晒成間屋,感覺超正!一見啲雨停咗就即刻洗衫,然後就出街逛.其實都係行去超市買啲嘢,不過就心情超輕鬆咁漫步,享受雨後o既超正味道.雖然係行緊條成日都行o既街仔,唔知點解今日覺得條街仔好唔同,有另一番風味.可能係因為今日不斷抬頭向上望o既關係啩...總之今日就好正喇~
心情咁靚,今晚整乜好?見靚仔爸整千層麵整得咁開心,諗起雪櫃有啲"舊貨"...去超市買罐番茄整肉醬,然後開粉整埋個白汁...

傻魚整咗個"三層麵"...哈哈~因為個長碟太細又唔夠深,淨係整到三層,仲要係滿到差啲流晒出o黎咁滯...再加上傻魚懶,煮肉碎變咗肉粒,咪搞到得返三層囉...傻馬話好好味,差啲想用條脷"洗碟"...氹得傻魚好鬼開心~嘻!

驚傻馬唔夠食,再加上啲大豆芽菜都擺咗幾日,塊雞扒又差唔多"夠鍾",整埋佢...兩日冇米落肚,飯桶傻魚好掛住啲飯...聽日煲粥仔食下先...呵~