消暑

今日鬼咁陽光普照...冇乜嘢做,煲完一輪劇之後,醒起要去銀行提款喎...即刻換衫出門驅車去車站對面個提款機,咁好彩今日唔使排隊.有錢就身痕,走咗去"企鵝仔"諗住買日用品...點知日用品就一樣都冇買到,反而買咗一堆零食同芝士.載住大袋細袋轉戰超市,諗住買啲菜.菜,有買到,仲買到傻魚o既心頭愛...係乜?一陣至開估...返到傻家執下個雪櫃擺嘢,竟然畀傻魚"執"到...

過咗期三日o既三文魚扒...唔覺有臭味,應該仲食得啩...所以今晚食香煎過期三文魚扒配西蘭花,加埋尋晚煲番茄雜菜湯,又一餐唔使點整o既晚餐...飯後...主角隆重登場喇~

呢個就係傻魚o既至愛喇!終於姣婆守唔到寡,咳緊都照買o黎食.傻魚係水果怪,生果可以堂正餐食.試過一次過食晒一個超大西瓜當晚餐...呢六份一個西瓜,正話食咗一半,仲要再分一半畀傻馬食,真係到喉唔到肺...遲啲返香港一定會狂食...哈~