打邊爐

今日幾好天,傻魚梗係留喺傻家做條大懶蟲喇...晏晝煲咗粥仔食...

係牛蒡粥,具有去熱補肺,消腫解毒o既功能.其豐富o既礦物質同維他命,可以改善膚質,美白皮膚.內含豐富膳食纖維,可以延遲糖類吸收速度,有益於糖尿病患者.感冒咳嗽,喉嚨發炎食用牛蒡,可以止咳去熱.啱晒傻魚.由於牛蒡利尿,可以促進新陳代謝,改善循環.好嘢o黎o架!
食飽睇下電視,諗下好唔好去二手書店買漫畫...之後收到傻馬個電話,話會遲啲返,因為要加班...傻馬仲話不如唔好煮飯,出街食算喇...又好!又唔使煮,不過雪櫃啲嘢唔知過唔過期...等傻馬再打o黎,之後就驅車去新宿.今晚去咗食乜?

係一間泰國餐廳...

傻馬話要打邊爐,所以叫咗兩人份邊爐套餐.左邊係麻辣湯,右邊係白湯.個餐牌寫明話個麻辣湯好辣,請勿飲用...不過傻馬梗係話之佢喇...

先落菜...前面嗰片黃色物體唔知係乜,傻馬話個味似南瓜喎...

跟餐有三款肉.上面係雞肉,左邊係豬肉,右邊係羊肉.想食牛o既朋友,唔好意思,呢個餐有牛食.

跟餐有兩款麵.左邊係拉麵,右邊係河粉.呢個邊爐餐冇醬跟,因為個湯已經好濃味,唔使點醬啲料都好夠味.傻魚冇食麻辣湯,所以唔知係點.傻馬話辣辣地,好味.個白湯就好重香芧味,好"東南亞"...

未開餐之前傻馬驚唔夠食,所以叫多個魚手指薯條,好好味!!!仲叫咗一人一杯蘇打醋,幾好...今餐食咗五千七百四十円,可以接受.呢間嘢喺新宿,佢仲有個泰式邊爐好似都唔錯,會再返兜.
食飽就拖手仔去攞車,跟住漫步行去"企鵝仔".原本諗住買包米,點知越睇越多嘢,買到成個購物籃滿晒.結果擺低七千円至出得個門口...恐怖!!!
後註: 有興趣o既朋友,可以去試下!
ASIAN GARDEN
東京都新宿区新宿3-28-9新宿ライオン会館4F             (03-3352-6606)
http://r.gnavi.co.jp/g008219/