焗

晴天畀人o既感覺應該係開心,陰天係憂愁,雨天係悲哀...可惜對於傻魚o黎講,晴天係煩躁,陰天係舒適,雨天係愉快.所以呢兩日咁好天,傻魚都幾燥下.感冒好咗好多,係有兩聲咳同啲頑痰死都唔肯走.出奇地今次病竟然冇傳染畀傻馬,所以傻馬話傻魚應該唔係感冒...唔係感冒咁係乜呀?唔通係暗病?唔理得咁多,又未死得...
今日望住出面咁"光猛",原先諗住出去行下o既念頭即時告吹.咁曬去得邊?又唔想一個人行商場,然後一個人食午餐喎...傻馬又畀公司派咗去舞浜咁遠,唔可以好似以前喺六本木咁近近地可以去搵傻馬食晏...以前曾經有一段時間好鍾意自己一個去行街,睇戲,食飯...不過去咗日本讀書之後就完全冇咗嗰種獨行俠o既"樂趣".新宿已經行到爛,一條友可以行去邊?
唔出街留守傻家冇乜野做,又唔想做家務喎...煲咗一輪劇之後,走咗去摷雪櫃睇下今晚整乜食好.

焗咗白汁雞通心粉.開咗罐罐頭白汁,因為懶得開粉.亦因為懶整西蘭花,所以少咗綠色冇咁靚...不過好在冇加埋西蘭花,如果唔係實滿到裝唔晒...傻馬嗰碗落咗勁多芝士,傻馬食得好開心.依家傻馬食飽出咗去打波子機,希望冇輸錢喇~