機票

尋晚煲咖哩太大煲食唔晒,留返今日做午餐.煮咗啲素麵,淋埋啲咖哩上面...

好大碟...分咗兩次o黎食...食完出街...近排又肥咗,所以今日唔搭車,行路去南口.去做乜?咪去問機票價錢囉...
一時唔記得上次個姐仔叫乜名,求其搵咗個o黎問...點知條女好似唔想做傻魚生意咁,全程冇笑容之餘,問多兩句就好似傻魚有口臭咁...把幾火,求其問完就算...雖然七月開始唔使再畀燃油附加費,但係八月啲機票好貴呀!傻馬嗰張最平都要十萬円,而傻魚因為唔搭"西筆"所以都係咁上下.反而九月就平啲...睇o黎傻馬都係九月至返香港o架喇...問完打咗個電話同傻馬講,傻馬叫傻魚去東口嗰陣再問清楚啲...諗住行東急手o架嘛,搞到傻魚冇晒心機...
去到東口嗰間拎咗張飛仔等咗一陣,阿課長親自o黎招呼傻魚.服務態度梗係好喇.同有問必答.雖然期間去查機票價嗰陣要傻魚等咗差唔多半個鍾,但係啲資料好詳細.等下到低喇...七月尾同八月頭,前後差十日都冇,個價就差三萬幾円...睇o黎傻魚都係疊埋心水七月尾走喇...唉~問下傻馬再諗諗先...
問完又行返去,經過超市去入貨.求其買咗十一樣嘢,擺低二千幾円.由於冇驅車,拎到傻魚死死下.返到傻家執下個雪櫃,但係都擺唔到支奶.算喇...一陣傻馬返o黎就會清咗支舊o既,咁咪擺到囉.

買咗個冬瓜仔同蜆,又o黎冬瓜湯飯.右邊隻大蝦係嗰日去捕平嘢嗰陣買o既...唔記得食,擺咗幾日.傻馬食完半隻都飽飽地喇...
今日啲粟米唔靚,聽日再去睇下.果然係平嘢冇好嘢...當然都會有例外,但係少囉...

姿整

傻馬近排唔知係咪有女溝,變得好鬼姿整...又話開始脫髮,就o黎變"蘇師父"...一陣又話要美白...依家晚晚沖完涼仲拎傻魚啲護膚品o黎搽...都好o既...近排少咗用毛巾洗面,識得用洗面乳洗...傻魚仲乘機嚇...都唔係嚇o既...話傻馬混咁多醬,唔甩頭髮就假喇...話時話...傻魚唔記得幫傻馬買美白乳添...

晚餐整咗個野菜咖哩.除咗有薯仔,洋蔥同紅蘿蔔之外,仲落咗茄子,椰菜,羊角豆,燒豆腐...另外用肉碎整咗肉丸加埋落去...用咗個中辛咖哩磚,不過一啲都唔辛.

尋日因為要蒸扇貝,結果搣咗衣o既粟米就咁擺咗喺度.見啲粟米開始乾乾地,蒸埋o黎食.大家係點樣食粟米o架?直接咬?食完有排撩牙...傻魚會用手一粒粒搣出o黎食,搣一條"坑",然後就可以幾粒幾粒"推"出o黎...最多可以一排推五粒出o黎.到咁上下隻手開始攰就改用牙去推.食完條粟米心好"靚仔"o架~嘻!

又落雨

尋晚燒完烤搭電車返到新宿,傻馬話要去西口捕平嘢...之後順手買咗幾個包...

早餐...

午餐...

下午茶...

呢個係傻馬o既...傻馬話聽日做早餐喎...
今日冇街去,留喺傻家攤抖.睇睇下漫畫,落雨喎...好在尋日好天有雨咋...関東好似正式進入梅雨期...早排係咁落,仲諗住過咗添...o黎緊日日都會落雨,啲衫唔使洗喇...呢幾日好焗,傻魚已經頂唔順開住冷氣瞓...真係坐喺度一舉手就成個人濕晒...煮飯嗰陣仲攞命...由頭濕到落腳,會滴到一地汗嗰隻...試過唔開冷氣,瞓唔到...

尋晚捕咗盒刺身,半價...另外就係扇貝,六個大大隻三百円.傻馬一見到即刻話想食.用咗闊條粉絲,蒜茸去蒸,凈返啲粉絲就要o黎煮咸湯...姇完都好飽下...

飯後食埋嗰半嚿黃肉西瓜...下次再買先...

燒烤

上個星期日因為落雨而被迫改期o既燒烤,今日終於都實行到喇...天氣好到想曬死人...傻魚當然做足準備,狂搽防曬喇...傻馬見到又要搽埋一份喎...就係因為咁搞到遲咗出門口...應該係話傻魚等到唔耐煩,自己先出門口.由於靚仔尋晚唔舒服,今日去唔到,但係靚仔媽整咗好多雞翅,所以就約傻魚去渋谷交收.傻魚遲到,打咗個電話畀靚仔媽叫靚仔媽等下傻魚.未去到駅,就收到靚仔媽打o黎話會直接去燒烤場喎...好嘢!可以見到靚仔.收咗線即刻打畀傻馬,叫傻馬快啲出門口,傻魚喺月台等...真係等到個人濕晒都仲未見傻馬...結果等咗差唔多半個鍾,搞到遲到要成車人等...真係激鬼氣...
去到就見到"大廚"喺度燒緊軟骨串.數一數...嘩~有十七大六細,陣容好鼎盛呀!見到靚仔冇神冇氣咁,傻魚都唔敢打擾靚仔食嘢.點咗傻馬去幫"大廚"手,自己就行行企企...

燒到咁上下,連燒烤叉都搬埋出o黎...小朋友好鍾意燒綿花糖食...啲人可能開始飽,食得比較慢...到傻魚出手...

一不做二不休,燒晒成盒...呢味好受歡迎,多謝靚女媽~

清道夫傻魚再大顯身手,o黎第二輪大蝦...

燒埋啲茄子串...

清埋最後三塊豬扒~

食得好飽o既大人開始圍埋樹低傾偈,啲小朋友就自己玩...

呢個燒烤場仲可以露營...

最後,清道夫傻魚一嘢燒晒啲雞翅,但係已經冇人食得落.結果傻魚掃晒返傻家做宵夜...靚仔媽,啲雞翅真係好好味呀!!!
傻魚除咗做清道夫之外,其實仲負責煲糖水.整咗個腐竹薏米百果糖水.少少地一人半杯,做唔到個反應都唔錯.傻魚係第一次煲腐竹糖水,事前上網摷咗好多資料,仲狂問黃小箎點整.整完好擔心失手,雖然試咗味覺得都可以.真係好多謝各位咁賞面.
今次又識咗唔少新朋友,希望傻魚冇嚇親大家.有機會同時間,再出o黎食下飯喇...今日真係玩得好開心...今次真係辛苦晒紅茶,準備咁多食物同用具.燒完之後仲要車埋啲垃圾返去分類.真係萬分感激.另外就係"大廚",拮到手指穿晒之餘仲要熱辣辣企喺爐邊狂燒.傻魚?冇建樹o架...只係帶咗個阿四傻馬o黎幫手咁大把...呵呵~下次玩乜好?花火大食會?!!嘻!

被遺棄

今晚傻馬約咗同事食飯,傻魚被遺棄在傻家中...唔緊要...係有代價o既...傻馬聽日要服侍傻魚...玩得咁開心呀喇...哼!!!
一條魚食乜好?諗咗成朝,個頭好痛...出街去二手書店蒲下先...一蒲就三個幾鍾.買咗七本漫畫,開心開心~之後又走咗去超市...買少少嘢都要二千五百円,真係離晒譜呀!返到傻家即刻拎本漫畫出o黎"煲"...

七點幾炒咗個海皇醬烏冬食.傻馬唔喺度,可以煮淡味啲...正!!!睇o黎傻馬都唔會咁早返...應該係搭尾班車o架喇...都費時打去問,唔想傻馬玩得唔盡興.開個冷氣,沖個涼出o黎再慢慢"煲漫畫"...呵呵~真係嘆...

熱氣

今日約咗網友甲君食晏.又係口水多過茶,唔記得影相...真係辦事不力呀!!!食完晏之後網友甲君有事走先,傻魚就搭"綠線"返傻家.先去藥房買日用品,然後去書店同便利店買雜誌...係咁喺條街度行o黎行去,去完一間便利店,再去另一間搵...冇o既?去書店再搵...都係冇...唯有打畀傻馬叫傻馬放工自己搵...
近排傻馬唔知食咗啲乜,生晒痘痘好鬼熱氣.馬又唔知搞乜,姿姿整整咁話近排曬黑咗要搽美白膏...吓?!!傻魚都冇用,冇喎...咁點呀?買?傻馬竟然話好...好...買囉...
熱氣食乜好?

晚餐整咗冬瓜湯飯,唔畀傻馬"混醬"...

再加一人一條粟米,尋日買o既...好甜...要再去買至得...

飯後有尋日買o既黃西瓜,都幾甜o架...呢個黃肉西瓜係傻魚屎忽痕見同價,買o黎試下囉.又冬瓜又西瓜,應該降到火啩...

煮大餐

尋日真係爽,唔使煮.今日諗住整返餐好o既.見雪櫃冇貨,驅車去入貨...一買又係四千幾円...真係要搵返部印銀紙機至得...買完走咗去麥記,諗住食個"大餐"換嘢...點知冇咗喎...算喇...都排咗隊,買個普通餐食囉...等緊個餐嗰陣收到傻馬電話,仲諗緊點解會喺呢個時候打o黎...原來傻馬返咗傻家喇...望下個錶...四點咋...咁早收工o既...拎咗個餐就"飛車"返傻家,然後分甘同味食咗個下午茶.
仲乜大餐咁巴閉?上次煲帶子飯引咗黑貓上o黎,今日又諗住照版煮碗再o黎多一嘢,希望黑貓又走上o黎玩...

傻馬個三成熟西冷牛扒,三百円咋...傻馬配黑椒汁食...

傻魚個雞扒妳鬼厚身.雖然已經喺塊皮度狂拮,但係都係啱啱熟...今次冇開紅酒或香檳,費時傻馬又話身痕呀...

飯後食咗一半櫻桃,酸酸地好味道~呵呵!

唔使煮

尋晚笑住瞓,幾開心呀!今朝又笑住醒...扒喺張床度望住"屎的仔",成個傻婆咁笑笑笑...
午餐求其食完,唔知做乜好...又望住"屎的仔"喺度笑...真係痴咗線!!!等到傻馬返o黎...食乜好?傻馬買咗兩條粟米同番薯返o黎...

即刻蒸咗o黎食...飽晒...唔使煮喇...都食唔落囉...

咁就切埋個紅肉蜜瓜食...都甜o既...但係上次買嗰兩個蜜瓜仲甜...叫咗傻馬捕住,一見有平就即刻買...呵呵~生果怪點可以冇生果食o架~

換新裝

近排成日落雨,濕度都幾高下,搞到個人好攰...尋晚浸咗啲菜乾同蠔豉...

午餐煲咗蠔豉菜乾瘦肉粥...好味~
吸完塵就吽咗喺度...左諗諗右諗諗...唉~算喇...返香港至算...得閒至睇下份保險包唔包...應該係話冇咁懶至睇...喺日本睇醫生都係難搞o架喇...無謂畀錢去睇人面色...飲住黑醋先...應該唔會死住...

晚餐整咗個茄汁菠菜雞肉闊條麵...傻馬又o黎"混醬"...傻魚真係冇眼睇...

左邊係傻馬個什菌湯,右邊係傻魚個南瓜湯...唔...個南瓜湯麻麻地,飲咗一半畀咗傻馬飲...呵呵~
食飽飯,終於拾得換床單喇...其實係之前唔記得洗啲新床單,所以冇換.早兩日終於洗晒兩套.雖然落雨,但係早排買咗塊浴廉,所以落雨都洗到衫喇.張床換咗新裝喇~

"屎的仔"與大龜!!!好在套到唔使嘥咗要拎返香港...見到都開心...今晚實好好瞓!

車展

今日原本係去燒烤,可惜落兩被迫要改期.所以傻魚就一袋二袋走佬咁去咗網友甲君屋企滾搞.網友甲君仲親自落廚整咗個意粉畀傻魚食,可惜傻魚掛住講嘢,口水多過茶,唔記得要影相...
傻馬一隻馬搞乜?去咗車展囉...

傻馬對紅車情有獨鍾...

隻眼好型呀~

美女與香車...

個軚軨好特別...

有好多款...

又見到呢架車...

個鼻冇咗咁...

法記...

"飛門"...

黑到令立立...

古董車...

仲有市場o架...

好長...

咁似美國某電視劇架車o既...

兩架都係玩具車...

大車,傻馬鍾意...

四百四十五萬円?!!貴!!!

呢仲貴...九百幾萬円...

呢個黃色唔錯...

嘩~越睇越貴...

個尾幾特別...

烈火戰車?

個軨着燈...

好凶o既眼...

"動畫車"...

細細o架...傻馬應該入唔到...

車頭突咗塊出o黎喎...

環保車...

呢架傻魚幾鍾意...

環保車,得兩個位唔多夠喎...

都幾多人...

又見到呢兩個"人仔"...

又係細細o架...

呢架幾惡下...

好似玩具車...

仲行唔行得o架?

殺車制...

三輪車?

哈哈~笑得好開心呀!!!

重量級音響...

好靚呀!

七彩車...

林記...
傻馬睇到五點幾就走咗返傻家.傻魚就玩到六點幾至走,返到傻家差唔多八點.仲走咗去買少少日用品至返傻家.

傻馬又話唔食飯,所以煮咗"咸咸湯"烏冬.