判刑日

尋晚成晚係咁來來回回去廁所坐,結果半粒屎都痾唔出...仲搞到成晚冇瞓!!!今朝倒屎咁早就要出門口,八點半去到醫院...登記完之後就去換醫院袍...
先o黎量個身高同體重...縮咗少少水添...可能重得滯,壓矮咗...跟住量血壓,正常!之後見傻馬去抽血,傻魚八掛走去望...跟住畀人嗌咗去量聽覺,跟住去量肺活量...之後到傻魚要抽血,傻魚即刻好鬼驚...因為傻魚係"隱藏微絲血管"一族,次次都畀人拮到隻手花晒,仲瘀埋添...今次個護士姐姐都話搵唔到條血管,要帶傻魚入"特別病房"瞓低抽喎...仲唔嚇死咩...入到去瞓低,護士姐姐搵完左手話唔見,再搵咗一陣右手...終於見到少少...護士姐姐千叮萬囑,叫傻魚千祈千祈死都唔好郁,因為好難,驚拮錯隔離...嚇到傻魚即刻變咗嚿石頭...好在一嘢搞掂,幾鬼想咀啖阿護士姐姐呀!抽完暈暈地,攤咗一陣至出返去...咦?!!唔見傻馬o既?
跟住畀人叫咗去照磁力共震,然後去照超聲波,照晒啲心肝脾肺腎...啲啫哩暖暖地,好得意.超聲波照埋對胸,但係好唔舒服!然後畀人叫咗去影胸...點影法?痛苦囉...喺將一邊胸擺上張黑色枱面仔,跟住個護士姐姐就會調整個枱仔o既高度,去到啱啱托住個胸,然後就壓個透明兜夾住個胸...真係痛到喊!!!上下夾完到左右打直夾...真係攞命!夾完左邊夾右邊,夾完真係眼濕濕...出到去見到傻馬個嘴角白白地,唔知食咗啲乜...仲諗住同傻馬呻,點知傻馬跟住個護士姐姐唔知去邊...
坐咗一陣就畀人咗入去間房仔度,個護士姐姐畀咗一杯仔白色粉末傻魚,叫傻魚飲咗佢.擺入口再飲水沖落口,即刻感覺到有好多氣谷緊上o黎.護士姐姐話要忍住唔好"放氣"...之後跟住護士姐姐o既指示,一啖一啖咁飲一杯白色液體.啲白色液體中文好似叫鋇.飲一啖,轉左,再飲一啖,轉返中間...轉咗幾轉,護士姐姐話要飲晒成杯鋇喎...都好大杯下,傻魚唯有慢慢飲埋去.跟住部機升起,成個人橫瞓.護士姐姐話要轉左,又轉左,再轉左,轉到傻魚暈暈地.要轉三個圈,轉咗兩個以為轉晒,點知仲要轉多一次.成肚都係水同氣,真係好辛苦.到咗最尾個次,忍唔住放咗少少氣出o黎...終於都知點解傻馬正話個嘴角白白地喇...照完就跟住個護士姐姐去更衣室,護士姐姐畀咗包輕劑量瀉藥傻魚,叫傻魚用大量水飲用.因為啲鋇係唔會被吸收,如果唔排返出o黎o既話就會變硬塞住啲腸.仲話仲有兩劑,一陣食完午餐同晚餐都要食一包.如果到咗今晚都仲去唔到廁所,就要食一粒高劑量瀉藥.如果食完第二日都仲係冇得痾或有肚痛就要返o黎睇醫生.傻魚乍乍林用三杯水飲咗包藥,然後刷埋牙至出去.一出去見到傻馬,傻馬話搞掂喇喎...十點咋...咁快?傻魚仲有幾個未做喎...傻馬換完衫就坐喺度等傻魚.
到驗眼,一開始傻魚白痴痴搞錯晒...跟住再o黎多次...驗完入房仔,部機會有一下強光閃一閃...唔知驗乜...然後又出返去驗青光眼.再等叫名去驗婦科...好驚添o架...好在係女醫生,仲要係有塊布遮住.做完抺片之後,個醫生伸兩隻手指入去,然後撳傻魚個肚...之前飲咗咁多水,又唔畀人去廁所...第一嘢撳落o黎,傻魚個自然反應就係用少少力頂住喇...會瀨o架嘛...醫生即刻叫傻魚放鬆,然後再撳多兩嘢...真係好驚會忍唔住"爆胱"...咁就完咗整個身體檢查喇...約咗一點鍾返去見醫生睇驗血報告...好驚呀!!!
醫院畀咗張午餐券傻馬同傻魚,喺附近行咗一陣就去食午餐.食乜?下一篇再介紹.一點鍾返到醫院,諗住同傻馬一齊入去聽.點知個護士姐姐話傻馬之前講咗唔會聽,所以冇準備到喎...咩呀?明明喺朝早傻魚講咗會聽埋傻馬嗰份o架嘛,點會冇準備o架...傻馬見冇得聽,就走咗去返工喇...冇錯!傻馬今日要加班...
一入到去見院長,院長話傻魚一切都好正常,係血脂過高,血管會硬化喎...院長畀咗張卡片傻魚,話每個星期六都會會診,叫傻魚考慮食藥.好似畀人判咗死刑咁,嚇死喇~諗諗下,都係等埋個完整o既報告至算...唉~要開始飲黑醋至得...噢...搞肚~又要去廁所痾啲白色嘢出o黎喇...