新朋友

今朝醒咗覺得好凍...賴咗成朝床,唔願起身...到咗十一點幾打咗個電話畀網友甲君,睇下甲君會唔會同傻魚一齊去見新朋友.可惜甲君今日都仲係唔係咁舒服...可能天氣太凍喇...傻魚唯有單人匹馬去見新朋友-網友媽咪同小朋友.之前同網友媽咪喺網上傾過幾次,今日終於見到面喇~好興奮!

約咗十二點九喺惠比壽駅會面,十二點七就收到網友媽咪電話話到咗.傻魚十二點九準時到達,見到網友媽咪嗰陣小朋友喺車仔瞓緊.傻金魚婆見到咁得意o既小朋友即刻發花癲...搭緊升降機嗰陣小朋友醒咗,兩大一細搵咗間有高椅o既餐廳食晏.入到餐廳就畀小朋友坐高椅.可能啱啱瞓醒,小朋友唔係咁睬傻魚.知道小朋友為食,就畀啲食物小朋友食.同網友媽咪一路食一路係咁傾,好開心.食完餐飯,小朋友己經肯同傻魚玩.行咗一陣之後上咗頂樓個空中庭園,畀小朋友行下玩下咁.兩個大人係咁傾,傾傾下小朋友扭計要飲奶.網友媽咪沖奶陣,傻魚抱住小朋友.哈~第一次見就肯畀抱喎...小朋友飲完奶扭眼瞓,所以行多一陣就散會喇.今日真係好鬼開心.住得咁近,得閒可以多啲出o黎玩.

返到傻家附近,諗起網友甲君唔舒服,今日又咁凍...諗住打畀網友甲君睇下有乜可以幫佢買,咁佢咪唔使落街吹風囉.可能網友甲君唔舒服瞓咗,冇接電話.冬天唔舒服真係好辛苦o架.返到傻家,可能焗親,個頭抽下抽下咁痛...網友乙君打o黎搵傻魚食晚飯,傻魚推咗...多謝網友乙君o既一片好意,傻魚個頭痛,條街又凍喎...下星期喇~

今日好開心識到新朋友.求其食完個晚餐,個頭己經冇事喇.聽日...原來係假期喎...聽日去邊好呢?