衰咗

今日開始三連休,應該一街都係人...傻魚今日進入半冬眠狀態...尋晚仲諗住瞓醒搵街去.今朝瞓醒掉完包垃圾之後,做下呢樣搞下嗰樣唔想出街.晾完機衫就走返入被窩裏面睇電視劇...見呢幾日咁凍,摷返個暖爐出o黎諗住抺乾淨用.呢個暖爐係傻魚好多年前喺日本留學嗰陣買o架.之後唔捨得掉,傻馬話帶返香港用.因為老爺話要駁火牛好危險,所以就一直擺咗喺櫃頂...今次搬返o黎東京就梗係帶埋個暖爐喇...抺完個暖爐發現個隔塵網好多塵...梗係傻馬之前唔記得清,就咁封咗幾年...見到個隔塵網就唔開胃,即刻掉咗聽日買過新o既...所以依家用唔到個暖爐...好在跟住o黎緊兩日回暖返廿度...不過之後又凍返...唉~

尋晚頭痛冇煮飯仔求其食咗個杯麵,今晚唔可以唔煮...又摷晒啲嘢出o黎一鑊過...

一時唔記得睇火,收乾晒汁燶低...衰咗...即刻撈起面頭嗰啲轉煲,加返啲水落少少鹽埋個茨...好在救得返,冇事~啲蓮藕,肉丸好入味,正!仲有四餐就清晒之前入嗰啲貨.下次唔可以咁買喇...